Esasy Kanunymyz bolan Konstitusiýamyzda bellenilişi ýaly, jemgyýetiň we döwletiň iň ýokary gymmatlygy bolan adamyň saglygyny goramak baş wezipedir. Hut şu nukdaýnazardan ugur alyp, ýurdumyzda bu wezipäni üstünlikli amala aşyrmakda ýokary bilimli hünärmenleri taýýarlamak we daşary ýurtly hyzmatdaşlar bilen özara gatnaşyklary giňeltmek boýunça netijeli işler durmuşa geçirilýär.

Türkmen halkynyň Milli Lideri Gahryman Arkadagymyzyň berk binýadyny goýan, häzirki wagtda Arkadagly Gahryman Serdarymyzyň parasatly baştutanlygynda kabul edilen maksatnamalaryň çäklerinde belent sepgitlere, uly üstünliklere ýetilip, soňky ýyllarda saglygy goraýyş ulgamynyň infrastrukturasy düýpli döwrebaplaşdyrylyp, ýurdumyzyň ähli welaýatlarynda häzirki zaman lukmançylyk merkezleri guruldy. Garaşsyzlyk ýyllarynda bu ulgamda üstünliklere ýetmekde Milli Liderimiziň başlangyjy bilen kabul edilen, häzirki wagtda hormatly Prezidentimiziň pähim-paýhasy esasynda durmuşa geçirilýän «Saglyk» Döwlet maksatnamasynyň örän uly ähmiýete eýe bolandygyny bellemek aýratyn buýsançlydyr.

Ýurdumyzda saglygy goraýşy ösdürmegiň, ony dünýä ölçeglerine laýyk getirmegiň esasy ugurlaryny öz içine alýan «Saglyk» Döwlet maksatnamasy raýatlaryň saglygyny goramak, olaryň hukuklaryny we mümkinçiliklerini giňeltmek, döräp biljek keselleriň öňüni alyş we bejeriş işlerini kämilleşdirmäge gönükdirilendir. Üstünliklere beslenen Halkara parahatçylyk we ynanyşmak ýylynda «Saglyk» Döwlet maksatnamasynyň durmuşa geçirilip başlananyna laýyk 30 ýyl doldy. Şol wagtyň dowamynda bu strategiýanyň çäklerinde ýokanç we ýokanç däl keselleriň öňüni almak we bejermek, olary ir anyklamak, raýatlaryň saglygyny goramak, ilata edilýän lukmançylyk hyzmatlarynyň hilini ýokarlandyrmak, iň täze anyklaýyş we bejeriş usullaryny milli lukmançylygymyza ornaşdyrmak, halkara hyzmatdaşlygy ösdürmek, sagdyn durmuş ýörelgelerini wagyz etmek ýaly ugurlar boýunça giň gerimli, netijeli işler amala aşyryldy.

«Döwlet adam üçindir!» diýen parasatly şygary öňe süren türkmen halkynyň Milli Lideri, lukman Arkadagymyzyň, peder ýoluny dowamata atarýan Arkadagly Gahryman Serdarymyzyň baştutanlygynda Berkarar döwletiň täze eýýamynyň Galkynyşy döwründe ilata hödürlenilýän lukmançylyk hyzmatlarynyň görnüşleri barha köpeldilip, olaryň hili has-da ýokarlandyrylýar. Bu ugurdaky amala aşyrylýan özgertmeleriň, tutumly işleriň netijesinde Diýarymyzyň dürli künjeklerinde tutuşlygyna durky täzelenen, häzirki zaman ösen lukmançylyk enjamlary bilen üpjün edilen, döwrebap saglyk öýleri, köpugurly hassahanalar, täze, halkara derejeli saglygy goraýyş merkezleri gurlup ulanmaga berildi. Saglygy goraýyş ulgamynyň ösen infrastrukturasynyň üstüni ýetirýän döwrebap lukmançylyk edaralarynyň gurulmagy diňe bir bejeriş işlerine däl, eýsem, keselleriň öňüni almaga gönükdirilen saglygy goraýyş syýasatynyň hem esasy wezipelerine laýyk gelýändigini bellemek gerek.

Ýurdumyzda amala aşyrylýan «Türkmenistanda fiziologiýa ylmyny ösdürmegiň 2024 — 2028-nji ýyllar üçin Milli maksatnamasy», «Türkmenistanda lukmançylyk sagaldyş-dikeldiş çäreleriniň 2024 — 2028-nji ýyllar üçin Milli strategiýasy», «Türkmenistanyň immuno-öňüni alyş boýunça 2024 — 2028-nji ýyllar üçin Milli maksatnamasy» saglygy goraýyş ulgamyny hemmetaraplaýyn ösdürmek barada giň gerimli tagallalaryň edilýändiginiň aýdyň subutnamasydyr.

Bu ugurda gazanylýan üstünlikler barada gürrüň edilende, Garaşsyzlyk ýyllarynda ýurdumyzda saglygy goraýyş ulgamynyň kanunçylyk-hukuk binýadynyň has-da kämilleşdirilendigini hem bellemek gerek. «Raýatlaryň saglygynyň goralmagy hakynda», «Raýatlaryň saglygynyň temmäki tüssesiniň täsirinden we temmäki önümlerini ulanmagyň netijelerinden goralmagy hakynda», «Ene süýdi bilen iýmitlendirmegi wagyz etmek we goldamak hakynda», «Alkogolyň zyýanly täsiriniň öňüni almak hakynda» Türkmenistanyň Kanunlarynyň hereket etmegi adam saglygyny goramagyň döwlet syýasatynyň esasy ugurlarynyň biridigine şaýatlyk edýär. Ýurdumyzyň saglygy goraýyş ulgamynda kabul edilen kanunlardyr maksatnamalar «Il saglygy — ýurt baýlygy» diýen ýörelgeden ugur almak bilen, ynsan saglygyny goramak hem-de sagdyn durmuşy berkarar etmek baradaky tagallalary özünde jemleýär.

Berkarar döwletimizde yglan edilen 2026-njy — «Garaşsyz, baky Bitarap Türkmenistan — bedew batly at-myradyň mekany» ýylynda özgertmeler maksatnamalaryny yzygiderli durmuşa geçirip, Türkmenistan Watanymyzy sagdynlygyň we ruhubelentligiň ýurdy hökmünde bütin dünýäde ykrar etdiren Gahryman Arkadagymyzyň, Arkadagly Gahryman Serdarymyzyň milli saglygy goraýyş ulgamyny has-da kämilleşdirmekde, bu ugurda täze taslamalary durmuşa geçirmekde alyp barýan köpugurly işleri hemişe rowaçlyklara ýaran bolsun!

Ogulabat ANNABERDIÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň Fakultet pediatriýa kafedrasynyň assistenti.