Berkarar döwletiň täze eýýamynyň Galkynyşy döwründe Türken halkynyň Milli Lidei Gahryman Arkadagymyzyň döwlet gurluşyny kämilleşdirmek, halkyň ýaşaýyş derejesini ýokarlandyrmak, ykdysady kuwwaty artdyrmak boýunça öňe sürýän başlangyçlary häzirki wagtda hormatly Prezidentimiz, Arkadagly Gahryman Serdarymyzyň baştutanlygynda üstünlikli dowam etdirilýär. Milli gymmatlyklara, asylly ýörelgelere uly üns berilýär we olar döwrebap derejede ösdürilýär. 

Toý-baýramlara beslenýän mukaddes watanymyzda asyrlaryň dowamynda ata-babalarymyzdan miras bolup, nesillerden-nesillere geçip gelýän il bolup geňeş etmek, halka sala salmak ýaly asylly ýörelgeler täze many-mazmun bilen baýlaşdyrylyp, üstünlikli dowam etdirilýär. Mukaddes Garaşsyzlygymyzyň şanly 35 ýyllygynyň öňüsyrasynda – 23-nji sentýabrda geçiriljek Türkmenistanyň Halk Maslahatynyň mejlisi bu mizemez hakykatyň nobatdaky subutnamasy bolar.

Milli Liderimiziň gatnaşmagynda geçirilen Türkmenistanyň Halk Maslahatynyň Prezidiumynyň mejlisi ýurdumyzda umumymilli foruma görülýän taýýarlyk işlerine resmi taýdan badalga bermekde möhüm waka boldy. Gahryman Arkadagymyz Halk Maslahatynyň ýurdumyzyň Mejlisi, Türkmenistanyň Hökümeti, jemgyýetçilik birleşikleri bilen bilelikdäki işleri dowam etdirip, Watanymyzy mundan beýläk-de hemmetaraplaýyn ösdürmek boýunça netijeli işleri alyp barmalydygy hakynda hem aýtdy. Şeýle hem bu mejlisde Gahryman Arkadagymyz häzirki döwürde Diýarymyzda sanly ulgamyň işini ösdürmek, Arkadag şäheriniň mysalynda şähergurluşyk maksatnamasyna sanlylaşdyrmak wezipelerini girizmek babatda zerur tagallalaryň edilmelidigine ünsi çekdi.

Türkmen halkynyň döwlet gurluşy babatda köp asyrlyk taryhymyzda ata-babalarymyz tarapyndan örän baý tejribeler toplanyp, pederlerimiziň ygtyýarly jemgyýetçilik wekilleri bilen ählihalk ýygnaklary geçirilipdir. Munda iň wajyp syýasy, ykdysady, durmuş meseleleri çözmek baradaky asylly däplerden ugur alnyp, umumy ykrar edilen demokratik ýörelgelere eýerilipdir. Häzirki wagtda hem şol asylly ýörelgeler dowam edýär. Ilatymyzyň giň gatlaklaryny möhüm jemgyýetçilik-syýasy çözgütleriň kabul edilmegine gatnaşmagyny üpjün etmek maksady bilen, halk häkimiýetiniň ýokary wekilçilikli edarasy bolan Türkmenistanyň Halk Maslahatyna uly orun degişli bolup durýar.

Türkmen halkynyň taryhy köklerine nazar aýlasak, agzybirlikde çözgüt kabul etmek, ýaşulularyň paýhasyna daýanmak, umumy bähbidi şahsy isleglerden belentde goýmak ýaly ajaýyp ýörelgeler asyrlar aşyp gelýär. Halk Maslahaty şol gadymy demokratik ýörelgeleri häzirki döwrüň döwlet gurluşynyň talaplary bilen utgaşdyrýan, türkmen döwletlilik pelsepesiniň täze eýýamdaky özboluşly beýany hökmünde ýüze çykýar. Şu jähetden, geçirilen Türkmenistanyň Halk Maslahatynyň Prezidiumynyň mejlisiniň hem döwletimiziň syýasy-jemgyýetçilik durmuşynda möhüm waka bolandygyny buýsançly bellemek gerek.

Şu ýyl, «Garaşsyz, baky Bitarap Türkmenistan — bedew batly at-myradyň mekany» ýylynda ýokary derejede geçiriljek Halk Maslahaty il-ýurt hem-de tutuş adamzat ähmiýetli işleriň üstünlikli amala aşyryljakdygynyň aýdyň kepilidir. Biziň ajaýyp ýurdumyzyň ösüş aýratynlygy, ilkinji nobatda, halkymyza goýulýan aýratyn sarpa, diňe halk bähbitli, döwlet ähmiýetli alnyp barylýan işler bolup durýar. Döwletlilik ýörelgelerimiz dowam etdirilýär, taryhda yz galdyran, beýik işleri bitiren pederlerimiziň, meşhur şahsyýetlerimiziň mertebesi saklanylýar. Ýurdumyzyň geljegi bolan ýaşlaryň kämil şahsyýetler bolup ýetişmekleri üçin uly aladalar edilýär. Olara asylly ýörelgelerimiz, däp-dessurlarymyz düşündirilýär, wagyz edilýär.

Belent tutumly işlerini diňe halkynyň aladasyna gönükdirýän, ýurdumyzy diňe ösüşlerden ösüşlere alyp barýan Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak bolsun, il-ýurt bähbitli işleri rowaçlyklara beslensin!

Aýjeren BÄŞIMOWA,
Türkmen döwlet maliýe institutynyň talyby.