Berkarar döwletiň täze eýýamynyň Galkynyşy döwründe Gahryman Arkadagymyz mähriban halkymyza özüniň ýene-de bir ajaýyp eserini — «Ömrümiň manysy» atly täze kitabyny peşgeş berdi. Bu kitapda Gahryman Arkadagymyz ýurdumyzyň her bir raýatyna ömrüniň her gününi döwrümize, milli däp-dessurlarymyza mynasyp ýaşamagy, durmuşyny ýagşylyklara beslemegi, halkymyzyň ynamyna, söýgüsine mynasyp bolmagy, berkarar döwletimizi mundan beýläk hem beýgeltmäge goşant goşmagy sargaýar. Türkmeniň ýaşaýyş medeniýetini, şöhratly taryhyny dünýä beren ata-babalarymyzyň ynam-ygtykadyny, ruhy-medeni gazananlaryny, milli gymmatlyklarymyzy taryhy we ylmy maglumatlar hem-de özüniň ýakymly ýatlamalary arkaly giňişleýin düşündirýär. Täze neşirde ynsan ýaşaýşynyň baş özeni bolan adamkärçilik, hakykata nazar salmak ýaly düşünjeler nakyllardyr atalar sözleri, alymdyr danalaryň şygyrlary arkaly manyly-mazmunly gürrüň berilýär.

Gahryman Arkadagymyz: «Hakyky ynsan Hakyň söýen ynsanydyr» diýip, halkymyzyň gözel häsiýetleriniň müňýyllyklaryň jümmüşinden gelýändigini, diniň, ýol-ýörelgäniň hem özenine siňip, Magtymguly ýaly beýik akyldarlaryň eserinde hem aýdyň şöhlelenýändigini belleýär.

Alym Arkadagymyz bu kitapda hünär saýlamak, onda-da dogry we höwes edýän ugruňy saýlamak barada durmuş hakykatlary arkaly mysal getirip, özüniň oý-pikirlerini uly-kiçiniň ýaş aýratynlygyna görä aýdyň beýan edýär. «Hünär meselesi — adamyň ykbaly. Ykballar birleşip, halkyň ykbalyny emele getirýär. Halkyň ykbaly bolsa, ýurduň, döwletiň ykbalydyr» diýmek bilen, nesillere bilim-terbiýe bermegiň, hünäre ugrukdyrmagyň ýurdumyzyň dünýä bilen gatnaşyklaryna, halkymyzyň bagtly geljegi bilen baglanyşdyryp gidýän bir pursadyna ünsümizi çekýär.

Gahryman Arkadagymyz halkara guramalaryň Aşgabatdaky wekilhanalarynyň ýolbaşçylary bilen bolan duşuşygynda agtygy Kerim bilen ÝUNISEF-iň ýurdumyzdaky wekilhanasynyň ýolbaşçysynyň arasynda orta mekdeplerde bilim berlişiniň hili baradaky söhbetdeşliginiň arassa iňlis dilinde bolandygyny, ýaşlygyna garamazdan, Kerimiň daşary ýurt dilleriniň öwredilmeginiň hökmany ugurdygyny, käbir ýöriteleşdirilen mekdeplerde hytaý, nemes, ýapon, koreý, fransuz, italýan dilleriniň çuňlaşdyrylyp öwredilýändigini iňlis dilinde gürrüň berendigini ýatlaýar.

Munuň özi ýurdumyzyň ylym-bilim ulgamynda ýokary netijeleriň gazanylandygyny, ýaş nesillerimizi giň dünýägaraýyşly, medeniýetli, halkara dillerini suwara bilýän adamlar edip ýetişdirmek boýunça saýlap alan ugrumyzyň örän dogrudygyny görkezýär. Ýaşlaryň dünýä dillerini kämil bilmekleri geljekde olaryň ýokary hünärli adamlar bolup ýetişmekleri üçinem, halkara giňişliginde ýurdumyza mynasyp wekilçilik edip bilmekleri üçin hem zerurdyr. Hat-da dil bilmek başarnygynyň has ýitiligi bilen gaýry halka öz diliniň kadalaryny türkmen bolup öwreden Mahmyt Zamahşarynyň mysalynda hem örän jaýdar görmek bolýar.

Geçmişde ata-babalarymyzyň guran döwletlerinde ylmyň ösüşi, alymlar, şahyrlar, pirler, sopular, akyldarlar barada, din ýolunda baş goýan ägirtler, mertler dogrusynda ylmy maglumatlary gürrüň berýän kyssalar taryha edil aýnadan bakýan ýaly aýdyň açylyp görkezilýär. Gahryman Arkadagymyz «Ömrümiň manysy» atly kitabynda meşhur şahsyýetleriň öz durmuşyndaky başdangeçirmeleri bilen biziň üçin ýatdan çykmajak we ömrümiziň manysyna öwrüljek jümleleri beýan edýär. Bu kitapda: «Perzent daragt bolsa, kökleri ata-enedir. Daragtyň saýasy-da, miwesi-de köklerine baglydyr. Perzent çeşme bolsa, gözbaşy ata-enedir. Çeşmäniň durulygy, arassalygy hem gözbaşyna baglydyr» ýaly jümleler arkaly ata-ene we perzent gatnaşyklary, hormat-sylag, ilhalar ogul-gyzy terbiýelemek barada maşgala gymmatlygynyň özenini düzýän ýörelgeler beýan edilýär. Sebäbi ata-babalarymyz öz nesillerini hünär, düşünjelilik, zerur dilleri öwrenmek, Watany jandan ileri söýmek, tutanýerlilik, zehiniňi ýerinde ulanmak we zähmetsöýerlik babatdaky beýik mekdebiň, beýik ruhy akademiýanyň gujagynda ýetişdiripdirler.

Ýaşaýşyň şeýle kämil nusgasyny döreden halkymyz «Okan il ozar, okamadyk il tozar», «Ylym — akylyň ýarysy» diýipdir. Biziň döwrümiz hem ylmyň we bilimiň döwri. Gahryman Arkadagymyzyň hem-de Arkadagly Serdarymyzyň parasatly syýasaty netijesinde ylmyň, sanly bilimiň barha kämilleşýändigini nazara alyp, olardan baş çykarýan, döredilýän mümkinçilikleri netijeli we ýerlikli ulanmagy başarmak üçin öz üstünde dyngysyz zähmet çekýän, dünýä dillerinden baş çykarýan ylymly-bilimli nesilleriň halk üçin, ýurt üçin örän zerurdygyny birjik-de ünsden düşürmeli däldiris.

Goý, Gahryman Arkadagymyzyň dünýä nusgalyk döwlet syýasatyny mynasyp dowam etdirýän Arkadagly Serdarymyzyň ýagşy niýetler bilen başy başlanan işleri elmydama üstünliklere beslensin! Hormatly Prezidentimiziň jany sag, ömri uzak, ili abat bolsun!

Ýazjuma NURJAÝEW,
S.A.Nyýazow adyndaky Türkmen oba hojalyk uniwersitetiniň talyby.