Döwrebap dünýäniň öňdebaryjy tejribelerini ulanmak arkaly jemgyýetde sagdyn durmuş ýörelgelerini ykrar etmek babatda hormatly Prezidentimiziň baştutanlygynda üstünlikli amala aşyrylýan «Saglyk» Döwlet maksatnamasynyň ähmiýeti uludyr. Bu maksatnamada bellenilen wezipeleri durmuşa geçirmegiň çäklerinde saglygy goraýyş we durmuş hyzmatlary ulgamynyň işgärleriniň bitirýän hyzmatlary diňe bir ýurdumyzyň çäginde däl, eýsem dünýä döwletleri tarapyndan giň goldawa eýe bolýar.

Berkarar döwletimiziň täze eýýamynyň Galkynyşy döwründe türkmen halkynyň saglygyny goramaga, hil taýdan ýokary netijeleri gazanmaga gönükdirilen täze häzirkizaman saglygy goraýyş ulgamyny emele getirmek boýunça maksatnamalaýyn işler alnyp barylýar. Bu ulgam halkyň saglygyny goramakda geçirilýän işleriň toplumlaýyndygy, ulgamlaýyn häsiýete eýedigi bilen halkara bilermenleriniň ünsüni özüne çekýär. Munuň özi ilatyň saglygyny goramaga degişli dünýädäki öňdebaryjy iş tejribäni özünde jemleýän döwrebap kanunlaryň kabul edilendigini, saglygy goraýyş kömeginiň ilkinji basgançaklarynda bu kömegiň iň bir netijeli görnüşi bolan maşgala lukmançylygyna geçirilendigini, saglygy goraýyş ulgamyna ylmyň we tehnologiýanyň iň täze gazananlarynyň ornaşdyrylýandygyny aňladýar.

Bu bolsa saglygy goraýyşda sagdyn adamlaryň sagatlygyny saklamagyň, keselleriň öňüni almagyň, sagdyn durmuş ýörelgesine eýermegiň öňe sürülýändigini, saglygy goraýşyň ähli derejelerinde gurulýan saglygy goraýyş edaralarynyň iň öňdebaryjy lukmançylyk enjamlary we serişdeleri bilen üpjün edilen täze, häzirki zaman binalarynda ýerleşdirilýändigini, saglygy goraýyş kömeginiň ähli raýatlara deň derejede elýeterdigini görkezýär. Enäniň we çaganyň saglygyny goramak, ýurduň sanitar-epidemiki we ekologiki howpsuzlygyny üpjün etmek meseleleri döwletimiziň alyp barýan saglyk syýasatynda iň bir öňe sürülýän ugurlaryň biridigini guwanç bilen bellemelidiris. Bu günki günde ähli welaýatlarda «Ene mähri» merkezleriniň hereket edýändigi, Bütindünýä Saglygy Goraýyş Guramasynyň Türkmenistany poliomiýelit, gyzzyrma, gyzamyk we gyzylja kesellerinden tutuşlygyna saplanan ýurtlaryň sanawyna goşmagy aýdanlarymyzyň aýdyň tassyklanmasydyr.

Milli saglygy goraýyş ulgamynyň ösüşi ylma we innowasiýalara daýanýan maglumat jemgyýetini, sanly ykdysadyýeti kemala getirmek boýunça hormatly Prezidentimiziň öňde goýan wezipeleri bilen berk baglanyşyklydyr. Munuň özi jemgyýetimiziň iň esasy gymmatlygy bolan raýatlarymyzyň bagtyýar ýaşamagy, halal zähmet çekmegi, agzybir halkymyza, hemişelik Bitarap Watanymyza guwanmagy, saglygy we abadan durmuşy hakyndaky aladanyň Berkarar döwletimizde ileri tutulýan ugurlaryň birine öwrülendigini aýdyň subut edýär. Sagdyn durmuş ýörelgeleriniň tarapdary bolan Arkadagly Gahryman Serdarymyz hemişe milletimiziň genofondunyň has-da berkemegine, sagdyn bedenli, sagdyn ruhly nesliň kemala getirilmegine, köpçülikleýin bedenterbiýe-sagaldyş hereketini we sporty ösdürmek, ilatyň ünsüni sagdyn durmuş ýörelgelerine gönükdirmek, munuň üçin zerur bolan ähli şertleri döretmek meselelerine aýratyn üns berýär.

Güneşli Diýarymyzda alnyp barylýan saglyk syýasatynyň özenini düzýän sagdyn durmuş ýörelgelerine eýerilmeginde kadaly iýmitlenmegiň, zyýanly endiklerden daşda durmagyň, zähmet bilen dynç alyşy sazlaşykly utgaşdyrmagyň, ruhy sagdynlygyň, arassa howada işjeň hereket etmegiň, sportuň dürli görnüşleri bilen meşgullanmagyň sagdynlygyň esasy girewidigi halkymyza köpçülikleýin habar beriş serişdeleriniň üsti bilen yzygiderli wagyz edilýändigini-de ýeri gelende bellemelidiris.

Saglygy goraýyş ulgamynda ýetilýän her bir sepgit täze-täze üstünliklere ruhlandyrýar. Ýurdumyzda sagdyn durmuş ýörelgeleriniň rowaçlanmagyna giň mümkinçilikleri döredýän Gahryman Arkadagymyzyň, Arkadagly Gahryman Serdarymyzyň janlary sag bolsun, beýik işleri rowaçlyklara beslensin!

Aýjahan HOMMYÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň Fakultet pediatriýasy kafedrasynyň assistenti.