Türkmenistanyň başlangyjy bilen Birleşen Milletler Guramasy tarapyndan «Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek» atly Kararnamanyň kabul edilmegi, Bütindünýä saglyk gününde bolsa, ýurdumyzyň ähli künjeginde welosipedli ýörişleriň giň gerimde geçirilmegi çagalykda iň gyzykly güýmenjämiz bolan welosipediň şan-şöhratyny has-da artdyrdy.

Uly üstünliklere, ösüşlere we şanly wakalara beslenýän Berkarar döwletiň täze eýýamynyň Galkynyşy döwrüniň Halkara parahatçylyk we ynanyşmak ýylynda hem hormatly Prezidentimiziň taýsyz tagallasy bilen halkymyzyň sport bilen meşgullanmagy üçin ähli şertler döredilýär. Tutuş ýurdumyzy gurşap alýan uly, ählihalk sport baýramçylyklaryna bagtyýar raýatlarymyz işjeň gatnaşýarlar. Sport bilen meşgullanyp, ruhubelentligini galdyrýarlar.

Hormatly Prezidentimiziň halkymyzyň gezelenç etmegi, saglygyny berkitmegi üçin welosporty ösdürmek baradaky aladalary ähli ýaşdaky raýatlarymyzyň ruhubelent ýaşamagynda uly ähmiýet eýeledi.

Lukmanlaryň bellemegine görä, welosiped sürmek çagada özerkliligi, ruhubelentligi, çydamlylygy, gujurlylygy terbiýeleýär. Mundan başga-da, çaga tigir sürmegi öwrenmek arkaly gorkulary ýeňip geçmek, maksada okgunly bolmak, töweregindäkilerden nusga almak ýaly endikleri özleşdirýär. Diýmek, bu sport ulagy diňe saglygymyza däl-de, biziň jemgyýetde özümizi alyp barşymyza, zähmetsöýer, düzgün-nyzamly bolmagymyza, geljekde durmuşyň çylşyrymly öwrümlerinde çalt we dogry çözgüt tapmagymyza-da ýardam edýär.

Welosiped sporty sportuň ekologiýa taýdan arassa görnüşi bolmak bilen, ilatyň saglygyny berkitmekde möhüm orun eýeleýär. Şoňa görä-de, ýurdumyzda sportuň bu görnüşi bilen meşgullanýan, ony ulag serişdesi hökmünde peýdalanýan adamlaryň sany yzygiderli artýar.

Elbetde, welosiped diňe bir uzak ýola aşmagyň amatly serişdesi bolmak bilen çäklenmän, eýsem, ol saglygyňy berkitmekde hem diýseň peýdalydyr. Muny öz işine ussat lukmanlardyr alymlar hem tassyklaýarlar. Welosiped sürmegi ýagşy endik edinen adamyň dem alşy hem kadaly bolýar we tutuş bedeniň işjeňligi ýokarlanýar. Bu bolsa ynsanyň has-da ruhubelent bolup, uzak ýaşamagyna, sagdyn bedenli, sagdyn ruhly, dury pikirli bolmagyna uly itergi berýär.

Bütindünýä welosiped gününe hem-de bagyşlanyp geçirilýän ekologik çäräniň çäklerinde paýtagtymyzyň köçelerinde şäheriçi awtobuslardan we ýeňil taksi ulaglaryndan, şeýle hem ilata hyzmat edýän beýleki jemgyýetçilik awtoulaglaryndan başga ulaglaryň hereketiniň çäklendirilmegi hem ýurdumyzda sagdyn durmuşyň ýörelgä öwrülendiginden habar berýär. Bu çäre adam üçin amatly bolan iň oňat howa gurşawyny emele getirmekde uly ähmiýete eýe bolmak bilen, ýurdumyzyň raýatlarynyň beden we ruhy sagdynlygyny ýokarlandyrmaga ýardam berýär. Şu günlerde şäherde hereket edýän ulaglaryň sanynyň göz-görtele azalmagyna, raýatlarymyzyň pyýada ýa-da welosipedli hereketlerine ser salanyňda, çäräniň peýdasynyň bimöçberdigine göz ýetirýärsiň.

Mähriban halkymyz hem hormatly Prezidentimiziň döredip berýän şeýle giň mümkinçiliklerinden netijeli peýdalanyp, sportuň dürli görnüşleri bilen meşgullanmak arkaly öz bedenlerini berkitmek işlerini dowamly alyp barýarlar. Halkymyzyň saglygyny berkitmek üçin şeýle zerur işleri durmuşa geçirýän, beden we ruhy taýdan sagdyn nesilleri kemala getirmegi özüniň hemişelik aladasyna öwren türkmen halkynyň Milli Lideriniň hem-de Arkadagly Gahryman Prezidentimiziň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Begenç MOMMAÝEW,
Myrat Garryýew adyndaky Türkmenistanyň Döwlet lukmançylyk uniwersitetiniň Fakultet hirurgiýa kafedrasynyň assistenti.