Berkarar döwletiň täze eýýamynyň Galkynyşy döwründe röwşen geljegi nazarlaýan türkmen halkymyz eşretli durmuşda ýaşaýar. Hormatly Prezidentimiziň taýsyz tagallalary netijesinde ýurdumyzy durmuş-ykdysady taýdan ösdürmek boýunça beýik işler durmuşa geçirilýär. Bu günki gün “Halkara parahatçylyk we ynanyşmak ýylynda” eziz Diýarymyzyň ähli ulgamlarynda bolşy ýaly, milli ykdysadyýetimiziň nebit-gaz senagaty, energetika, ýeňil senagaty pudaklaryndaky gazanylýan üstünlikler hem guwandyryjy netijelere eýe bolýar.

Hormatly Prezidentimiziň parasatly baştutanlygynda oýlanyşykly alnyp barylýan ykdysady syýasatda ýangyç-energetika pudagy esasy orunlaryň birini eýeleýär. Çünki nebit-gaz pudagy milli ykdysadyýetiň daýanjy bolmak bilen birlikde, ýurdumyzyň halkara söwda-ykdysady gatnaşyklarynda-da ileri tutulýan ugurlaryň biri bolmagynda galýar. Arkadagly Gahryman Serdarymyzyň energetika syýasaty netijesinde bu pudagyň kuwwatlyklary has artdyrylýar we uglewodorod çig mallaryny gaýtadan işlemek, gazhimiýa pudagynyň binýatlaýyn esaslaryny ösdürmek boýunça ägirt uly taslamalar durmuşa geçirilýär. Ylmyň, tehnologiýanyň yzygiderli ösýän şertlerinde, nebit-gaz toplumynyň önümçilik pudaklaryny döwrebaplaşdyrmak meseleleri-de milli ykdysadyýeti ösdürmegiň gün tertibinde durýar.

Häzirki wagtda Türkmenistan gury ýerde dünýäde iri gaz käni bolan “Galkynyş” gaz känini, Hazar deňziniň türkmen kenarynda geljegi uly bloklary işläp taýýarlamak, Gün we ýel energetikasyny ösdürmek, ählumumy bazarlara ygtybarly, durnukly, ekologiýa taýdan arassa energiýany ibermek boýunça taslamalary durmuşa geçirmek babatda halkara hyzmatdaşlygyny ilerledýär. Nebit-gaz toplumynyň möhüm önümçilik düzümleri ýurdumyzyň Balkan, Ahal, Mary, Lebap welaýatlarynda möhüm ykdysady pudaklar hökmünde hereket edýärler. Bu toplumyň çygryna girýän uglewodorod çig mallaryny gazyp çykarmak, gaýtadan işlemek, önümleri daşamak, ýerlemek, gaz geçirijileriň içerki we eksport ulgamlarynyň işini ýola goýmak, maýa goýumlaryny özleşdirip, täze ýangyç ýataklaryny ýüze çykarmak, bu pudagy maliýe taýdan dolandyrmak ýaly köpugurly ykdysady işi netijeli alyp barmak üçin her ugur boýunça ýokary taýýarlykly hünärmenleriň zerurlygy öz-özünden düşnüklidir. Bu işlere sanly ulgamyň, ösen tehnologiýanyň ornaşdyrylmagy netijesinde, hünärmenlere bildirilýän talap hem ýokarlanýar.

“Türkmenistanyň Prezidentiniň ýurdumyzy 2022 - 2028-nji ýyllarda durmuş-ykdysady taýdan ösdürmegiň Maksatnamasynda” milli ykdysadyýetiň eksport kuwwatyny artdyrmak we daşary söwda dolanyşygynyň deňagramlylygyny üpjün etmek boýunça möhüm wezipeler goýulýar. Ýurdumyzyň senagat kuwwatynyň artmagy, önümçilik toplumlarynyň kämilleşdirilmegi şol wezipeleri üstünlikli durmuşa geçirip, ykdysadyýetiň durnukly ösüşiniň binýadyny pugtalandyrmaga ýardam eder. Ýurdumyzda “akylly şäher” maksatnamasynyň ilkinji hem-de ajaýyp nusgasy bolan Arkadag şäheriniň döwrebap binalary, iri senagat we energetika desgalary ýaly taslamalaryň üstünlikli durmuşa geçirilmegi uzak geljegi nazarlaýan ösüşlere ýol açýar.

Garaşsyz, hemişelik Bitarap Türkmenistanyň durnukly ösýän döwlete öwrülmegini şertlendirýän çuňňur oýlanyşykly ykdysady syýasaty durmuşa geçirýän Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak, beýik işleri rowaç bolsun!

Azat ATABAÝEW,
Türkmenistanyň inžener-tehniki we ulag kommunikasiýalary institutynyň Ulaglar fakultetiniň Howa ulaglaryň ulanylyşy kafedrasynyň mugallymy.