Mälim bolşy ýaly, häzirki döwürde Garaşsyz Türkmenistan öz ösüşiniň täze tapgyryna gadam basdy. «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasy» diýlip atlandyrylan ösüşiň şu täze döwründe Hormatly Prezidentimiziň başlangyçlary esasynda bagtyýar halkymyzyň ýaşaýyş-durmuş derejesini mundan beýläk-de ýokarlandyrmak boýunça giň gerimli işler amala aşyrylýar.

Hormatly Prezidentimiz Serdar Berdimuhamedow özüniň Türkmenistanyň Prezidenti wezipesine dalaşgärlik Maksatnamasynda Mukaddes Garaşsyzlygymyzyň şan-şöhratly 30 ýyllyk ösüş ýoluny dowam etdirmek, bilen mähriban halkymyzyň ýaşaýyş-durmuşynyň ýokary derejesini üpjün etmäge gönükdirilen maksatnamalary üstünlikli amala aşyrmagyň baş maksadydygy barada aýdypdy. Gahryman Arkadagymyzyň nusgalyk görüm-göreldesine eýerýän Arkadagly Serdarymyz häzirki täze eýýamda üstünlikli alyp barýar. Munuň şeýledigini “Halkyň Arkadagly zamanasy” ýylynyň 8-nji aprelinde hormatly Prezidentimiziň milli ykdysadyýetimiziň pudaklaryny ösdürmegiň şu ýylyň birinji çärýeginiň jemleri jemlenen Ministrler Kabinetiniň mejlisinde gol çeken buýsançly Karary aýdyňlygy bilen tassyklaýar.

Berkarar döwletiň täze eýýamynyň Galkynyşy döwründe ýurdumyzyň welaýatlarynda täze binagärlik we şähergurluşyk keşbini kemala getirmek, şeýle hem ulag we kommunikasiýa toplumyna degişli edaralaryň işgärleri üçin has oňaýly ýaşaýyş şertlerini döretmek maksady bilen, gol çekilen bu resminamada beýan edilişi ýaly, Ministrler Kabinetiniň ýanyndaky Ulag we kommunikasiýalar agentliginiň “Türkmenaragatnaşyk” agentligine ulag we kommunikasiýa toplumyna degişli edaralaryň işgärlerine satmak maksady bilen, Balkan welaýatynyň Türkmenbaşy şäherinde ähli amatlyklary bolan, 4 gatly, 60 öýli 5 sany ýaşaýyş jaý toplumynyň taslamasyny düzmek hem-de ony ýanaşyk ýerlerini abadanlaşdyryp gurmak barada “Ynamly hyzmatdaşlar” hojalyk jemgyýeti bilen şertnamany öz serişdeleriniň hasabyna baglaşmaga ygtyýar berildi.

Bu taryhy Karar diňe bir Ulag we kommunikasiýalar ulgamlarynyň agzybir zähmetkeşleriniň däl, eýsem tutuş türkmen halkynyň buýsanjyny has-da goşalandyrdy. Munuň özi hem bolsa täze ýaşaýyş jaý toplumlarynyň gurulmagy ýurdumyzyň welaýatlaryň, etraplarynyň durmuş şertlerini gowulandyrmak, ähli durmuş düzümlerini yzygiderli kämilleşdirmek boýunça nobatdaky anyk ädimlerdir. Şunuň bilen baglylykda, ýurdumyzyň raýatlaryna berilýän uzakmöhletli ýeňillikli karzlaryň şäherleriň we obalaryň ýaşaýjylary üçin oňaýly ýaşaýyş jaýlaryny edinmäge bolan elýeterliligi üpjün edýär. Ýeri gelende soňky ýyllarda ýaşaýyş jaý gurluşyklarynyň artýan geriminiň netijesinde, güneşli Diýarymyzda müňlerçe maşgalalar ajaýyp ýaşaýyş jaýlarynyň öýleriniň eýeleri bolandygyny aýratyn nygtamak gerek. 

Gurluşyk işlerine 2022-nji ýylyň aprel aýynda başlamak hem-de ýaşaýyş jaý toplumyny 2024-nji ýylyň aprel aýynda ulanmaga doly taýýar edip tabşyrmak bellenilen ulag we kommunikasiýalar ulgamlarynyň agzybir zähmetkeşleri üçin bu künjekde täze döwrebap ýaşaýyş jaýlarynyň gurlup berilmegi baradaky başlangyçlar täze 30 ýyllyk döwrümizde bagtyýar halkymyzyň ýaşaýyş şertlerini gowulandyrmak baradaky tutumly başlangyçlaryň amala aşyrylýandygyna şaýatlyk edýär. Munuň üçin bagtyýar halkymyzyň Hormatly Prezidentimize alkyşlarynyň çägi ýok. Çünki, taryhy resminama gurýan döwletiň gurplydygyny ýene bir gezek tassyklady. Goý, hormatly Prezidentimiziň jany sag, ömri uzak, belent başy aman bolsun!

Jumadurdy SAPARGELDIÝEW,
Türkmen oba hojalyk institutynyň Tebigy bilimler kafedrasynyň mugallymy.