Berkarar döwletiň täze eýýamynyň Galkynyşy döwründe Diýarymyzda ýaşlaryň hemmetaraplaýyn sazlaşykly ösmegi üçin döwlet derejesinde uly tagallalar edilip, olaryň bagtyýar durmuşda ýaşamaklary, döwrebap bilim, oňat dynç almaklary bilen bagly meseleler hemişe üns merkezinde saklanýar. Ýaşlaryň hukuk hem-de durmuş goraglylygyny üpjün etmek, aň-bilim, zähmet başarnyklaryny ýüze çykarmak babatda tutumly işler durmuşa geçirilýär. Bu meseläni amala aşyrmagyň iň bir ygtybarly ýoly bilim ulgamynyň maglumatlaşdyrmak derejesini ýokarlandyrmak bilen baglydyr. Kompýuter serişdeleriniň we telekommunikasiýalaryň ösmegi netijesinde, ýurtda bilim ulgamyny kämilleşdirmekde hil taýdan täze maglumat-bilim beriş ugurlary döredilýär.

Berkarar döwletiň täze eýýamynyň Galkynyşy döwri ýurduň bilim ulgamynyň öňünde täze syýasy, ykdysady, jemgyýetçilik esaslary bilen şertlendirilen täze meseleleri goýýar. Olaryň oňyn çözgüdi bolsa berilýän bilimiň ýokary derejesini üpjün etmekden ybaratdyr. Şulardan ugur alyp, türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň pähim-paýhaslary esasynda ýurdumyzyň ylmy-tehniki, innowasion syýasatyny durmuşa geçirmek, bäsleşige ukyply, serişde we energiýa tygşytlaýjy, ekologiýa taýdan howpsuz ýokary tehnologiýalary we innowasiýalary döretmek hem-de önümçilige ornaşdyrmak maksady bilen ylym-bilim maksatly işlere aýratyn ähmiýet berilýär.

Türkmen halkynyň Milli Lideri Gahryman Arkadagymyz: “Her bir döwletiň binýadynyň berkligi, ösüşiniň ýokary depgini, ýaşaýyş-durmuş derejesi ýurtda alnyp barylýan bilim-ylym syýasaty bilen berk baglydyr” diýip, bilim edaralarynyň işgärleriniň öňünde çuňňur jogapkärli wezipeleri goýýar. Gahryman Arkadagymyzyň şu sözlerinden ganatlanyp, peder kesbini mynasyp dowam etdirýän Arkadagly Gahryman Serdarymyz bilim ulgamynda ägirt uly özgerişleri durmuşa geçirip, ýaş nesliň kämil derejede bilim almaklary üçin, olaryň ýokary derejeli hünärmenler bolup ýetişip, kuwwatly Watanymyzyň şan-şöhratyny has-da belende götermekleri ugrunda köpugurly tutumlara badalga berdi. Bu ugurda ýaşlara aýratyn bil baglaýan hormatly Prezidentimiz olaryň kämil şahsyýetler bolup ýetişmekleri üçin ýurdumyzyň bilim ulgamynyň binýady bolan umumybilim berýän orta mekdepleriň mugallymlarynadyr bilim işgärlerine aýratyn wezipeleri esaslandyryp berdi.

Geljegimizi has-da nurlandyrjak, ýurdumyzy kuwwatlandyrjak, belent ahlakly, watansöýüji ýaşlary terbiýeläp ýetişdirmek Arkadagly Gahryman Serdarymyzyň parasatly ýolbaşçylygynda alnyp barylýan döwlet syýasatynda ileri tutulýan ugurlaryň biridir. Täze taryhy döwürde ýurdumyzyň daýanjy bolan ýaşlara uly ynam bildirilýär. Bu gün ýaşlarymyz ýurdumyzyň ähli ulgamlarynda tutanýerli zähmet çekmek, jemgyýetçilik durmuşyna işjeň gatnaşmak bilen, ata Watanymyzyň bedew batly ösüşlerine mynasyp goşantlaryny goşýarlar.

Biziň ýaşaýan döwrümiz sanly ulgamyň ähli ugurlara ornaşdyrylýan, innowasion ösüşleriň gazanylýan zamanasydyr. Şonuň üçinem ýaşlar sanly ulgamyň giň mümkinçiliklerinden peýdalanmak bilen, ýurdumyzda kabul edilen oýlanyşykly maksatnamalaryň, badalga berlen özgertmeleriň tiz durmuşa geçirilmegi üçin ukyp-başarnyklaryny gaýgyrmaýarlar. Bagtyýar ýaşlaryň elmydama öň hatarda bolmagy bizi buýsandyrýar.

Bilim ulgamynyň işini halkara ülňülere laýyk getirmekde üstünlikli durmuşa geçirilýän düýpli tutumlar ýaş nesliň döwrebap bilim we terbiýe almagyna, saýlap alan hünärleri babatda bilimlerini has-da artdyrmagyna, giň dünýägaraýyşly adamlar bolup ýetişmegine ýardam edýär. Munuň özi milli bilim ulgamynda yzygiderli alnyp barylýan özgertmelerde baş maksatlaryň biridir. Halkara parahatçylyk we ynanyşmak ýylynda şeýle asylly maksatlaryň rowaçlyklara beslenmeginde ähli şert-mümkinçilikleri döredýän Gahryman Arkadagymyza hem-de Arkadagly Gahryman Serdarymyza hoşallyklarymyz çäksizdir.

Sähragül GURBANOWA,
Myrat Garryýew adyndaky Türkmenistanyň Döwlet lukmançylyk uniwersitetiniň Lukmançylyk fizikasy we informatikasy kafedrasynyň mugallymy.