Ata Watanymyzda mähriban halkymyz bu gün Arkadagly Gahryman Serdarymyzyň baştutanlygynda abadançylygyň hözirini görüp, asuda ýaşaýar, döredijilikli işleýär, ynamly gurýar. Syýasatda, ykdysadyýetde, medeniýetde, ylymda, bilimde gazanylýan üstünlikler, ýetilýän sepgitler has-da guwandyryjydyr. Gazanylýan bu taryhy ýeňişlerde, şöhratly üstünliklerde ýurdumyzda jemgyýetimize peýdaly zähmet bilen meşgullanýan her bir raýatyň, şol sanda zenanlaryň-da mynasyp zähmet goşantlarynyň bardygy aýratyn guwandyryjy hakykatdyr. Türkmen jemgyýetinde gelin-gyzlarymyza hemişe aýratyn hormat, aýratyn sarpa bilen garalypdyr. Berkarar döwletimiziň bagtyýar zenanlary jemgyýetçilik ösüşiniň ähli ugurlaryna: syýasy, ykdysady, sosial, medeni ugurlaryna işjeň gatnaşýarlar. Bu ugurlarda gazanylýan üstünliklere mynasyp goşant goşýarlar.

Berkarar döwletiň täze eýýamynyň Galkynyşy döwründe Gahryman Prezidentimiz türkmen jemgyýetiniň zenanlary hakynda uly aladalary edýär. Biziň ýurdumyzda zenanlar mynasyp hormat bilen gurşalandyr. Munuň özi milli Liderimiziň ýöredýän döwlet syýasatynyň ileri tutulýan ugurlaryndan biridir. Häzirki täze taryhy döwürde zenanlarymyz türkmen topragynda giňden ýaýbaňlandyrylan özgertmelere işeňňir gatnaşmak bilen, öý-ojagynyň eýeleri, asylly borçlaryna wepaly bolmaklarynda galýarlar.

Türkmen zenanlarynyň mertebesiniň nähili beýikligini olaryň milliligimize mahsus bolan ajaýyp häsiýetlerinde görýäris. Elleriniň hünäri bilen behişdi ýatladýan gözelligi döretmegi başarýan zenanlarymyz her bir öýüň bezegi, buýsanjy, guwanjy, bagtydyr. Aslynda adamzat öz pikirini beýan etmek bilen hem nähili adamdygyny görkezýär. Gözel nusgalary hala çitip, özleriniň garaýyşlaryny, ajaýyp pikirlerini beýan edip bilen enelerimiz durmuşda duş gelýän kynçylyklary ejizlemän, mertlik, edermenlik, gaýduwsyzlyk bilen ýeňip bilýän, hemmä nusga, görelde bolup bilýän mähribanlardyr, gahrymanlardyr, dünýäniň manysydyr. Olar gözelligi beýan etmekde hiç hili söz ulanmazdan, ýürekden çykan wasplaryny sungat eserleri bilen beýan etmegi başaryp bilipdirler.

Zenan mertligi barada döredilen eserler, birnäçe taryhy şahslar bu günki günde gaýtalanmaýan görelde alarlyk beýik nusgalardyr. Berkarar döwletiň täze eýýamynyň Galkynyşy döwründe gelin-gyzlarymyz ene-mamalarymyzyň biziň döwrümize çenli ýetiren iň gadymy nusgalaryny bu günki günde has-da kämilleşdirip, has gözel nusgalary döredip bilýärler. Gaýtalanmajak milli sungaty, deňi-taýy bolmadyk milli gymmatlyklary, haly we haly önümlerini, beýleki el işlerini öz aýratynlyklary bilen amal etmekde irginsiz zähmetini gaýgyrmadyk ene-mamalarymyz durmuşda ýaşaýşyň lezzetini diňe gözel keşplere siňdirip bilipdirler.

Garaşsyz, hemişelik Bitarap Türkmenistanyň durmuş-ykdysady taýdan ösdürmek babatda esasy maksatnamalary amala aşyrmaga, şol sanda maşgalany berkitmäge, eneligi we çagalygy goramaga hem-de zenanlaryň zähmet we jemgyýetçilik işeňňirligini ýokarlandyrmaga ýardam bermek maksatlaryny türkmençiligiň maşgala we maşgala gatnaşyklary babatdaky garaýyşlarynyň esasynda seljermek bilen durmuşa ornaşdyrmaga ähmiýet berilýär. Munuň özi Türkmenistanyň Zenanlar Birleşiginiň Merkezi Geňeşi tarapyndan yglan edilýän “Ýylyň zenany”, “Ýylyň maşgalasy” bäsleşiklerini geçirmek, “Sagdyn maşgala” atly sport çäreleriniň mysalyndan hem bellidir. “Ýylyň zenany” bäsleşigi çeper ellilik, jemgyýetçilik işjeňligi bilen bagly ugurlarda gönüden-göni türkmençilik ýörelgelerine laýyk gelýär. Türkmenistanyň Zenanlar birleşigi tarapyndan yglan edilýän “Gülüň owadan” atly keçe bäsleşigi hem şunuň bir mysalydyr. Bäsleşikleriň şu mazmuny türkmençiligiň eli işlilik babatdaky garaýyşlaryny has berkidýär. Mälim bolşy ýaly, zenan maşgalanyň eliniň işliligi onuň jemgyýetdäki ornunyň esasyny kesgitläpdir diýilse hem dogry bolar. Çünki türkmen zenanynyň el işleri intellektual tejribäni hem talap edýär. Türkmen halysy, keşdesi we keçesi çeperden çeperleriň, has zehinliniň saýlanmagyny şertlendirýär. Sebäbi ol işler iňňän inçe bolmak bilen, ýiti zehiniň we paýhasyň önümi bolup durýar. Şonuň üçin hem el işleriniň bäsleşikleriň mazmunynda uly ornunyň bolmagy türkmen zenanynyň özerkliligini häsiýetlendirýär. Islendik döredijilik işi hem erkin pikirleriň önümi bolup durýar. Türkmenistanyň Zenanlar birleşiginiň Merkezi geňeşi tarapyndan yglan edilýän “Ýylyň zenany” atly bäsleşigiň jemgyýetçilik işjeňligini açyp görkezmek bilen bagly ugurdaky täsirliligine ünsüň çekilmegi wajypdyr. Türkmençilikde zenan maşgalanyň jemgyýetçilik işjeňligi onuň el işlerine ussatlygyny, köpçülige görelde bolmagyny, deň-duşlaryna we ýaşlara ýardam bermek başarnygyny göz öňünde tutýar.

Goý, dünýäniň görki, Zeminiň durky bolan zenanlary hormatlap, giň mümkinçilikleri döredýän türkmen halkynyň Milli Lideriniň hem-de Arkadagly Gahryman Prezidentimiziň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Ogulbabek ARAZNAZAROWA,
Myrat Garryýew adyndaky Türkmenistanyň Döwlet lukmançylyk uniwersitetiniň Lukmançylyk fizikasy we informatikasy kafedrasynyň mugallymy.