Arkadagly Gahryman Serdarymyzyň ylmy ösdürmek, onuň mümkinçiliklerini giňeltmek boýunça durmuşa geçirýän beýik işleri üstünliklere beslenýär. Zehinli ýaşlary ýokary tehnologiýalar ulgamyna çekmek üçin hemmetaraplaýyn we ylmy esasda zerur meýilnamalar kabul edilýär. Häzirki döwürde ýaş alymlar halypalary bilen bir hatarda ylmy-barlag, taslama işlerini üstünlikli alyp barýarlar. Hormatly Prezidentimiziň taýsyz tagallalary netijesinde düýpli, amaly, nazary işläp taýýarlamalar Türkmenistanyň halkara ylmy giňişligindäki abraýynyň barha artmagyna ýardam edýär.

Halk hojalygynyň ähli pudaklary üçin giň gözýetimli ýokary hünärli hünärmenleri taýýarlamak üstünlikli we netijeli durmuşa geçirilýän ylmy-tehniki syýasatyň esasy maksadydyr. Bilşimiz ýaly, hormatly Prezidentimiziň baştutanlygynda okuwçylara we talyp ýaşlara bilim berlişini kämilleşdirmekde tutumly işler alnyp barylýar. Bu ugurdaky işleriň hatarynda orta we ýokary okuw mekdepleriniň döwrebap tehnologiýalar bilen üpjün edilmegini, kabul edilen täze «Bilim hakyndaky» kanunyň rejelenen görnüşini, ýokary okuw mekdeplerine kabul edilýän ýaşlaryň sanynyň ýyl-ýyldan köpeldilýändigini aýdyp bileris.

Ýaşlaryň öz saýlap alan hünärinde ýokary derejeli ylym-bilim alyp, geljekde ökde hünärmen bolup ýetişmegi arzuw edilýär. Arzuwlary hasyl edýän ata Watanymyzda bolsa Arkadagly Gahryman Serdarymyzyň taýsyz tagallalary netijesinde öz hünärine ökde ýaşlaryň kemala gelmegi üçin uly mümkinçilikler döredilip berilýär. Bu döredilýän mümkinçiliklerden ýerlikli peýdalanýan ýaşlar ýurdumyzda we halkara derejesinde geçirilýän halkara ýaryşlara gatnaşyp, üstünlikli çykyş edýärler we baýrakly orunlary eýeleýärler.

Häzirki döwrüň talaplaryna laýyklykda, ylym ulgamynyň düzümi, dolandyrylyşy hem-de hukuk binýady döwrebaplaşdyrylýar. Ylmy-tehniki ösüşiň gazananlaryny özleşdirmäge, täze tehnologiýalary we innowasiýalary ornaşdyrmaga iri maýa goýumlary gönükdirilýär. Döwrebap bilimleri we ylymlary düýpli özleşdirmäge ukyply ýokary hünärli inženerleri hem-dezehinli alymlary taýýarlamak üçin ähli zerur şertler döredilýär. Şunuň bilen birlikde, bu ulgamlarda iri halkara guramalary, dünýäniň esasy ylym-bilim merkezleri bilen hyzmatdaşlyk yzygiderli ösdürilýär.

Düýpli ylymlary ösdürmek, alymlaryň täze neslini kemala getirmek, ýaşlary ylmy işe çekmek ýaly möhüm wezipeler Türkmenistanyň Kanunlarynda öz beýanyny tapýar.Mälim bolşy ýaly, ýurdumyzda ykdysadyýeti, durmuş hem-de ynsanperwer ugurlary sanly ulgama geçirmäge aýratyn ähmiýet berilýär. Ähli ýerde döwrebap kompýuter ulgamlary we aragatnaşyk serişdeleri, elektron resminama dolanyşygy ornaşdyrylýar.

Berkarar döwletiň täze eýýamynyň Galkynyşy döwründe türkmen alymlarynyň daşary ýurtly hyzmatdaşlary bilen gatnaşyklarynyň çägi ep-esli giňedi. Dünýäniň abraýly ylym we bilim merkezleri bilen ysnyşykly gatnaşyklar ýola goýuldy.Paýtagtymyzda yzygiderli geçirilýän halkara ylmy forumlar hem ylym ulgamynda hyzmatdaşlygy has-da giňeltmäge gönükdirilendir. Ýurdumyzyň işewürleri milli Liderimiz tarapyndan döredilen amatly şertlerden netijeli peýdalanýarlar. Häzirki wagtda işewürlerimiz önümçiligiň we marketingiň ösen tehnologiýalaryny giňden özleşdirmek bilen, halkara derejesine çykýarlar. Bularyň ählisi Türkmenistanyň durmuş-ykdysady we innowasion-tehnologiýalar babatda dünýäniň sazlaşykly ösýän döwletleriniň birine öwrülýändiginiň hem-de ählumumy ylym giňişligine üstünlikli goşulyşýandygynyň aýdyň beýanydyr.

Halkara parahatçylyk we ynanyşmak ýylynda her bir gününi, sagadyny ylym-bilime, sowat öwrenmäge bagyş edýän ýaşlar Arkadagly Gahryman Serdarymyzyň tagallalary bilen ylmyň täze gazananlaryny özleşdirýärler. Olaryň öňünde bir maksat bar, ol hem Gahryman Arkadagymyzyň sargytlaryna wepaly, öz hünärine ussat hünärmenler bolup ýetişmekdir.

Ýurdumyzyň geljegi bolan ýaş nesle ylym-bilim endikleri bilen birlikde ruhy ahlak ýörelgeleri hem çuňňur öwredilýär. Ýurdumyzda watan söýüji, adamkärçilikli, ylymly, ýokary hünärli ýaşlaryň ösüp ýetişmegi babatynda uly işleri durmuşa geçirýän Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Gülnara SAPARMÄMMEDOWA,
Myrat Garryýew adyndaky Türkmenistanyň Döwlet lukmançylyk uniwersitetiniň Farmakologiýa kafedrasynyň uly mugallymy, lukmançylyk ylymlarynyň kandidaty.