Türkmenistanyň Prezidentiniň
“Türkmeniň altyn asyry” bäsleşigine

Haýrullanyň kakasy Gaýbulla aga ömrüniň 42 ýylyny demir ýolda işläp geçirdi. Onuň işden boş wagtlary halk hojalyk ýükli otlularyň gatnawy, demir ýoluň abatlanylyşy baradaky berýän gürrüňleri heniz orta mekdepde okap ýören oglunda gyzyklanma döredýärdi. Ol öz ýanyndan kakasy ýaly demir ýolda işlemegi arzuw edýärdi. Şol arzuwlary hem Haýrulla Nurullaýewi 1980-nji ýylda Özbegistanyň Daşkent şäherindäki ulag we inženerçilik institutynyň gapysyndan getirdi. Bu ýokary okuw jaýynyň gurluşyk fakultetini gatnaw ýollarynyň inženeri hünäri boýunça tamamlan Haýrulla Nurullaýew Türkmenabat rels kebşirleýji otlusynda ussa bolup zähmet ýoluna başlady.

Ýaş hünärmeniň erjelligi, zähmetsöýerligi, başarjaňlygy hemmäniniň ünsüni özüne çekýärdi. Bary-ýogy bir ýyla golaý wagt geçip-geçmänkä onuň ugurtapyjylygy, başarjaňlygy, işine gaýymlygy göz öňünde tutulyp, şol wagtky Demir ýoluň Aşgabat böleginiň birleşdirilen edarasynyň düzümine geçirildi. Bu ýerde topar ýolbaşçysy, hereket howpsuzlygy bölüminiň derňewçisi wezipelerinde işlän halypa halal zähmeti bilen ýoldaşlaryna görelde boldy. Onuň guramaçylyk ukyplary göz öňünde tutulyp, 1995-nji ýylda zähmeti goramak we ekologiýa bölüminiň başlyklygyna bellendi. Bu ýerde 5 ýyllap zähmet çeken Haýrulla aga 2000-nji ýyldan 2013-nji ýyla çenli ýol hojalygy bölüminiň esasy hünärmeni, başlygyň orunbasary wezipelerinde zähmet çekdi.

Her bir işgär bilen ýaş aýratynlyklaryna görä, dilini tapyp, işleşmek uly ussatlygy, jogapkärçiligi talap edýär. Bu zatlaryň hötdesinden aňryýany bilen gelýän Haýrulla aga “ýigide müň dürli hünär hem azdyr” diýen pähimden ugur alyp, bagtyny mugallymçylyk kärinde hem synap görmegi makul bildi. Birnäçe ýyllaryň dowamynda halypalyga ýeten Haýrulla aga, demir ýol pudagynda öwrenen tejribesini ýaşlara sapak hökmünde bermegi öz öňünde maksat edinip goýdy. Bu maksady hem ony 2013-nji ýylda Aşgabat şäherindäki demir ýol ulaglary orta hünär okuw mekdebiniň gapysyndan getirdi. Bu ýerde 3 ýyllap ýaşlara sapak beren Haýrulla aga demirýolçy bolmagyň inçe syrlaryny, onuň dürli ugurlaryny we mümkinçiliklerini açyp görkezmek ugrunda tagallasyny gaýgyrmady. 2017-nji ýyldan häzirki wagta çenli “Türkmendemirýollary” agentliginiň tehniki kadalaşdyryjy namalar bölüminiň hünärmeni bolup işleýän halypa ýoldaşlary tarapyndan uly hormatdan peýdalanýar. Tejribeli demirýolçy hökmünde onlarça işgäre halypalyk edýän Haýrulla aganyň zähmet ýoly ýaşlara görelde mekdebi diýsek ýalňyşmarys. Munuň özi käriňe, hünäriňe garamazdan zähmet adamsy üçin uly bagt ahbetin! Bu ýerdäki halypalaryň hemmesi-de şägirtligi gören adamlar. Haýrulla aganyň özi-de işe gelen ilkinji günlerinden halypalyk goluny uzadan tejribeli demirýolçylar Gündogdy Kaşlykow, Aleksandr Nikolaýnikow dagylary häli-häzirem ýadyndan çykaranok.

Nurullaýewleriň maşgalasyna hakyky demirýolçylar maşgalasy diýsek ýalňyşmarys. Çünki, Haýrulla aganyň ähli doganlary hem, maşgala agzalary hem bu pudagyň işgäri. Umuman aýdylanda 4 doganyň ählisi demirýolçy. Olardan Seýdulla Türkmenabat rels kebşirleýiş otlusynda, Nasrulladyr Abdulla Türkmenabat ýol we desgalar edarasynda abraý bilen zähmet çekýärler. Haýrulla aganyň gyzy Dinara bolsa “Türkmendemirýoltaslama” institutynda hünärmen bolup işleýär.

Hawa, biregne 40 ýyllap demir ýol pudagynda yhlasly zähmet çeken halypanyň durmuşynda  ýatdan çykmajak “güýzleriň” köplügi has-da guwandyryjy. Bütin ömrüni bir käre bagyşlan Haýrulla Nurullaýew birnäçe gezek Şa serpaýyna mynasyp boldy. 2016-njy ýylda “Garaşsyzlygyň 25 ýyllygy” ýubileý medaly bilen sylaglanan halypa, ýaňy-ýakynda şanly Garaşsyzlygymyzyň 30 ýyllygy mynasybetli hem “Gaýrat” medaly bilen sylaglandy. Iki gezek şa serpaýyna mynasyp bolan halypa, bu pursatlary “Hormatly Arkadagymyzyň ynamyna mynasyp bolandygyma çäksiz buýsanýaryn”, “Ýatdan çykmajak pursatlar”, “Çeken zähmetime döwletimiziň beren ýokary bahasy” ýaly sözler bilen ýatlaýar. Bütin ömür halallyk bilen öz zähmetini ykbala öwüren halypanyň, çekýän zähmetine döwlet tarapyndan mynasyp sarpa goýulandygy üçin Gahryman Arkadagymyza alkyşy çäksiz.

Halypa hünärmeniň zähmet ýoly baradaky ýakymly ýatlamalaryny, gürrüňlerini dykgat bilen diňläp durşumyza bolsa Berkarar döwletimiziň bagtyýarlyk döwründe ata-babalarymyzdan miras galan halypa-şägirt gatnaşyklaryna ak ýol açyp, oňa täze, döwrebap röwüş beren hormatly Prezidentimize minnetdarlygyň, buýsanjyň ýene bir ýola kalbyňa dolýar. Tamara gelnejämiz bilen sylag-hormatly maşgalabaşy hökmünde tanalýan Haýrulla aganyň hormatly Prezidentimiziň eýe eden Berkarar döwletimiziň bagtyýarlyk döwründe ýurdumyzda zähmet adamsy baradaky aladanyň döwlet derejesine çykýanlygyndan hem göwni diýseň hoş. Bu işleriň sakasynda duran we  ýurdumyzyň abraý-mertebesini barha beýgeldýän Gahryman Arkadagymyza bu günki gün tutuş dünýä guwanýar, alkyşlaýar. Il alkyşy bolsa altyna deňelýär.

Jangeldi IŞANKULYÝEW,
“Türkmeniň ýüpek ýoly”.