Biz ajaýyp Berkarar döwletiň bagtyýarlyk döwründe buýsanyp ýaşaýarys. Ykbaly oýanyp, bagty çüwen halkymyzyň her bir güni uly ösüşlere, şatlykly wakalara, toý - baýramlara beslenýär. Ýaňy-ýakynda eziz halkymyz ýurdumyzyň Garaşsyzlygynyň şanly 30 ýyllyk toýuny uly dabara besläp geçdi. Garaşsyz, baky Bitarap Watanymyzda bolup geçýän beýik özgertmeler halkymyzyň ruhuny belende göterip, kalbyny joşa getirýär. Bagtyýar halkymyzyň jana-jan bähbitlerine gönükdirilen ajaýyp işler günsaýyn artýar. Bu bolsa, hemmeleriň ýüreginde guwanç hem buýsanç duýgularyny artdyryp, şatlygyna şatlyk goşýar.

Şeýle buýsandyryjy wakalaryň biri hökmünde «Türkmenistan – parahatçylygyň we ynanyşmagyň Watany» ýylynyň 1-nji sentýabrynda paýtagtymyzdaky Maslahat kösgünde Gahryman Arkadagymyzyň Bilimler we talyp ýaslar güni hem-de täze okuw ýylynyň başlanmagy mynasybetli umumy okuw sapagyny geçmegini aýtmak bolar.

Gahryman Arkadagymyz bu ýere ýygnananlary ýurdumyzyň jemgyýetçilik durmusynda möhüm orny eýeleýän Bilimler we talyp ýaslar güni mynasybetli tüýs ýürekden gutlady. Şanly baýramyny toýlan Garaşsyz ýurdumyz 30 ýylyň içinde demokratik, hukuk we dünýewi döwlet gurluşynyň binýatlaryny yzygiderli berkitdi. Ykdysadyýetimizi döwrebaplaşdyrmak, döwletimiziň dünýä bileleşigindäki ornuny ýokarlandyrmak boýunça ägirt uly işleri amala aşyrdy. Garaşsyzlygymyzyň ilkinji günlerinden ýurdumyz parahatçylygy, dost-doganlygy dabaralandyrýan oňyn Bitaraplyk ýoluny saýlap aldy. Dünýä döwletleri, halkara guramalar bilen özara bähbitli gatnaşyklary ýola goýdy.

Milli Liderimiz berkarar döwletimiziň ruhubelent ýaşlaryna ýüzlenip: «Biz dünýädäki çylsyrymly maliýe-ykdysady ýagdaýlara garamazdan, milli ykdysadyýetimizi diwersifikasiýa ýoly bilen ösdürýäris» diýip belledi. Döwlet Bastutanymyz bäsdeşlige ukyply, ösüşiň ýokary depginlerini gazanmagyň möhüm serti hökmünde önümçilige sanly tehnologiýalaryň ornaşdyrylýandygyny belläp, bu ugurdan ýaş hünärmenleri taýýarlamaga uly ähmiýet berilýändigini aýratyn nygtady. Sebäbi innowasiýalar, häzirki zaman ylymlary, nanotehnologiýalar, sanly ulgam adamzat jemgyýetini öňe alyp barýar. Sanly tehnologiýalaryň çalt ösmegi bilen, bütin dünýäni öz içine alýan aragatnasyk ulgamy döredilýär, täze pudaklardyr düsünjeler peýda bolýar. Döwrüň bu täzelikleri biziň jemgyýetimize hem giňden ornaşýar.

Hormatly Prezidentimiz sözüni dowam edip, häzirki döwürde senagat taýdan ösen döwleti döretmegiň ýolunda ýurdumyzyň ykdysadyýetiniň pudaklaryny we sebitleri sazlaşykly ösdürmäge uly üns berilýändigini belledi. Ykdysadyýetimiziň pudaklaryna öňdebaryjy tehnologiýalary ornaşdyrmakda, bäsdeşlige ukyply ýokary hilli önümleri öndürmekde, azyk howpsuzlygyny berkitmekde hususyýetçilere uly orun degişlidir diýip, milli Liderimiz sözüni dowam etdi. Häzirki döwürde telekeçiler dürli pudaklarda milli maksatnamalarymyzy durmuşa geçirmäge isjeň gatnaşýarlar. Senagatda, oba hojalygynda, gurlusykda, syýahatçylykda, söwdada we durmuş hyzmatynda, halk senetçiliginde, ulag-aragatnaşyk ulgamynda we beýleki ugurlarda üstünlik gazanýarlar.

Dünýä meşhur kompaniýalaryň awtobuslary, ýeňil we ýük awtoulaglary yzygiderli satyn alynýar. Biziň alyp barýan ulag syýasatymyzy dünýä jemgyýetçiligi giňden goldaýar. Türkmenistanyň başlangyjy bilen Birleşen Milletler Guramasynyň Baş Assambleýasynyň durnukly ulag ulgamyny döretmek boýunça taryhy Kararnamalaryň dördüsini kabul etmegi munuň aýdyň subutnamasydyr.

Geçmişde ýaşap geçen beýik şahsyýetlerimiz bahasyna ýetip bolmajak akyl-paýhas mirasyny döredipdir. Olaryň eserleri nesilleri terbiýelemegiň gymmatly çesmeleri bolup durýar. Adamyň iň gözel häsiýetleriniň biri-de ene-ata, jemgyýete we durmuşa bolan söýgüdir. Halkymyzyň watançylyk hem-de adamkärçilik däpleri durmuş ýoluna gadam basýan nesillerimiz üçin geçmişi, şu güni we geljegi birleşdirýän nusgawy mekdepdir diýip, milli Liderimiz belledi. Watana bolan söýgi ýürekde orun alan iň näzik we päkize duýgudyr. Onuň gymmatyny hiç zat bilen ölçäp bolmaz. Ýürekden çykan sözüň ýürege barşy ýaly, yhlas bilen başyna barlan iş hem ýerine ýetirilmän galmaýar. Her bir işe ýürekden ýapyşyp, merdana halkymyzyň adyny has-da belende götermek, başymyzyň täjine deňeýän eziz Watanymyzyň şöhratyna şöhrat goşmak siziň esasy borjuňyzdyr diýip, hormatly Prezidentimiz ýaşlara ýüzlendi. Milli Liderimiz şu günki beýanyny tamamlamak bilen, duşuşyga gatnaşyjylara berk jan saglyk, uzak ömür, bagtyýar we abadan durmuş, okuwda uly üstünlikleri arzuw etdi.

Gahryman Arkadagymyzyň biz ýaş hünärmenleriň işine ökde we talyplaryň bilimli bolup ýetişmegimiz hakynda edýän aladalaryna jogap edip, geljekde Watanymyza gerekli ynsanlar bolup ýetişmäge yhlas ederis. Goý, Gahryman Arkadagymyzyň jany sag, ömri uzak belent başy aman bolsun!

Ýagmyr BEKIÝEW,
Türkmenistanyň telekommunikasiýa we informatika institutynyň mugallymy.