Arkadagly Gahryman Serdarymyzyň parasatly baştutanlygynda Berkarar döwletiň täze eýýamynyň Galkynyşy döwründe ýurdumyzda ynsan saglygyny goramak babatda uly işler durmuşa geçirilip, sportuň ösmegine, köpçülikleýin bedenterbiýäniň, sagdyn durmuş ýörelgeleriniň rowaçlyklara beslenmegine aýratyn ähmiýet berilýär. Döwletiň we jemgyýetiň iň ýokary gymmatlygy bolan adam we onuň saglygy, abadan durmuşy baradaky alada ýurdumyzda alnyp barylýan döwlet syýasatynda bütin aýdyňlygy bilen ýüze çykýar. Häzirki wagtda Garaşsyz, hemişelik Bitarap Watanymyz bagtyýarlygyň, ruhubelentligiň hem-de sagdynlygyň mekany hökmünde dünýäde giňden tanalýar.

Hakykatdan hem, ýurdumyzyň çar ýanynda gurlup ulanylmaga berilýän stadionlar, sport we bedenterbiýe-sagaldyş toplumlary, sport meýdançalary, okuw mekdepleriniň sport zallary sporta höwesli ýaşlardan dolup durýar. Bularyň ählisi sagdyn bedenli, sagdyn ruhly nesilleri kemala getirmekde hem-de halkyň geljegi bolan ýaş nesliň saglygyny goramakda, milli sporty halkara derejesine çykarmakda uly ähmiýete eýedir. Hormatly Prezidentimiziň durmuşa geçirýän giň halkara hyzmatdaşlyk syýasaty hem ýurdumyzda sportuň okgunly ösdürilmegine ýardam edýär. Halkara Olimpiýa komitetiniň we Aziýanyň Olimpiýa Geňeşiniň agzasy bolan Türkmenistan halkara olimpiýa hereketiniň ösdürilmegine mynasyp goşant goşýar.

Berkarar döwletimizde yglan edilen 2025-nji — Halkara parahatçylyk we ynanyşmak ýylynda hem ýurdumyzda raýatlaryň, esasan hem, ýaş nesliň sporta höwesiniň artmagy üçin ähli şertler döredilýär. Bedenterbiýe bilen sportuň adamyň beden saglygyna, şol sanda ruhy ýagdaýyna edýän täsiri uludyr. Sport adamyň kesellere garşy göreşijilik ukybyny artdyrýar, beden agzalarynyň işjeňligini ýokarlandyrýar. Şol sanda adamda ýeňişlere bolan erki, özüne ynamlylygy, maksada okgunlylygy terbiýeleýär, ünslüligi, çydamlylygy taplaýar. Sport bilen meşgullanýan adam bir-birege bolan hormatyň, özara dostlugyň, agzybirligiň gadyryny bilýär. Türgenlerdir tälimçiler, sport ulgamynyň işjeňleri dünýäde parahatçylyga, asudalyga bolan ymtylyşy ýaýbaňlandyrýan, köpçüligiň arasynda sagdyn durmuş ýörelgeleriniň rowaçlanmagynda görelde görkezýän adamlardyr.

Sport sagdyn durmuşyň binýady bolup, ýaşlaryň ruhubelent, maksada okgunly, başarjaň kemala gelmegine täsir edýän ulgamdyr. Munuň üçin, bilim maksatnamalarynda bedenterbiýe sapagynyň bolmagy, ýurdumyzda okuwçy ýaşlaryň sagdynlygyny üpjün etmek babatynda edilýän aladanyň şöhlelenmesidir. Bu gün ýaş nesiller sportuň dürli görnüşleri bilen meşgullanyp, ýurdumyzyň çäklerindäki bäsleşiklere we dünýä döwletlerinde geçirilýän halkara sport ýaryşlaryna gatnaşyp, ýokary netijelere eýe bolýarlar. Ýeňijiniň münberine çykan türgenlerimizi görenimizde, olaryň gazanan üstünliklerine buýsanyp, ýurdumyzda sportuň kämil derejelere eýe bolýandygyna guwanýarys.

Bedew bady bilen ynamly öňe barýan Diýarymyzda jemgyýetiň ähli ulgamlaryna sagdyn durmuş ýörelgeleriniň giňden ornaşdyrylýandygyna, sport we köpçülikleýin bedenterbiýe bilen meşgullanýan raýatlaryň barha köpelýändigine Halkara parahatçylyk we ynanyşmak ýylynyň ilkinji günlerinden başlap ýurdumyzda geçirilýän çäreleriň, bäsleşikleriň mysalynda hem göz ýetirmek bolýar.

«Bütin durky bilen Watan mukaddesligine uýýan, şöhratly geçmişimize, häzirki günümize hem-de nurana ertirimize buýsanýan ýaşlar biziň geljegimizdir» diýip nygtamak bilen, köpçülikleýin bedenterbiýäni ýaýbaňlandyrmakda, sporty ösdürmekde, sagdyn jemgyýeti kemala getirmekde taýsyz tagallalary edýän Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Zõhre TEJENOWA,
Myrat Garryýew adyndaky Türkmenistanyň Döwlet lukmançylyk uniwersitetiniň Ýokanç keseller kafedrasynyň assistenti.