Berkarar döwletiň täze eýýamynyň Galkynyşy döwründe, "Garaşsyz, baky Bitarap Türkmenistan - bedew batly at-myradyň mekany" ýylynyň her bir sahypasy täze ösüşler bilen ýazylýar. Bilim ulgamynda amala aşyrylýan düýpli özgerişler, ozaly bilen, başlangyç synp basgançagyndan gözbaş alýar. Emma başlangyç synpda sapak geçmek diňe bir programma laýyklykda sowat öwretmek däl-de, eýsem, çaganyň kemala gelip başlan “menligini” kämilleşdirmek, onuň içki dünýäsini owadan reňkler bilen bezemek sungatydyr.

Başlangyç synp okuwçysy üçin mekdep - bu uly we nätanyş dünýä. Şol dünýäniň ilkinji ýolgörkezijisi bolsa mugallymdyr. Hormatly Prezidentimiziň, Arkadagly Gahryman Serdarymyzyň belleýşi ýaly, ýaş nesliň terbiýesi döwletimiziň geljegidir. Mugallym sapaga giren pursatynda diňe bir okuw kitabyny däl, eýsem öz mährini we sabyr-takatyny hem bile getirýär.

Başlangyç synplarda okatmagyň esasyny - ynam tutýar. Çaga mugallymyna ynansa, ol ylma hem ynanýar. Şonuň üçin hem, täze eýýamyň mugallymy her bir okuwçynyň özboluşly zehinini, onuň häsiýetiniň inçe taraplaryny duýmagy başarmalydyr. Başlangyç synp mugallymy hökmünde aýtsam, nähili ýer şarynyň her künjegi özboluşly bolsa, her bir körpäniň kalby hem özboluşly bir “düjnýädir”. Şol dünýäniň baýlyklaryny açyp görkezmek mugallymyň ussatlygyna baglydyr.

Häzirki wagtda ýurdumyzda durmuşa geçirilýän “Türkmenistanda tebigy we takyk ylmy ugurlara degişli dersleri okatmagyň Konsepsiýasy” başlangyç synp okuwçylaryndan diňe bir ýat tutmagy däl, eýsem sebäp-netije baglanyşygyny gurmagy talap edýär. Sapakda bir meseläniň çözgüdini tapan çaganyň gözlerindäki şatlyk - bu hakyky bilimiň miwesidir. Emma bilim terbiýe bilen berkidilmese, ol durnukly bolmaýar. Gahryman Arkadagymyzyň öz eserlerinde nygtaýyşy ýaly, milli mirasymyz, pederlerimiziň edep mekdebi başlangyç synp sapaklarynyň süňňüne siňmelidir. Okuwçy harplary öwrenende “W” harpy bilen “Watan” sözüniň mukaddesligini, “E” harpy bilen “Ene” mähriniň belentligini aňyna guýmalydyr. Bu bolsa bilimiň diňe bir akyl üçin däl, eýsem kalp üçin hem niýetlenendigini subut edýär.

Täze eýýamda geçilýän her bir başlangyç synp sapagy - bu mugallymyň monology däl, eýsem okuwçy bilen guralýan janly we döredijilikli söhbetdir. Sapakda çaga ýalňyşmakdan gorkmaly däl. Mugallymyň wezipesi ýalňyşy düzetmek däl-de, okuwçynyň özüniň dogry çözgüde gelmegine ýol görkezmekdir. Mugallymyň elde ýasalan görkezme esbaplarynyň, dürli maketleriň we şekilleriň kömegi bilen çagalar dünýäniň gurluşyny amalyýetde öwrenýärler. Bu bolsa olarda “özüm ýasadym, özüm düşündim” diýen duýguny oýaryp, özüne bolan ynamyny artdyrýar. Matematika sapagyndaky sanlar ýa-da ene dili sapagyndaky goşgular çaganyň döredijiligini oýarmalydyr.

Jemläp aýdanymyzda, başlangyç synpda okatmak - bu durmuşyň iň uly we iň jogapkärli başlangyjydyr. Türkmen halkynyň milli Lideri Gahryman Arkadagymyzyň hem-de hormatly Prezidentimiz Arkadagly Gahryman Serdarymyzyň saýasynda bilim ulgamynda döredilen mümkinçilikler bizi täze sebitlere ruhlandyrýar. Biz her bir sapakda diňe bir maglumat bermän, eýsem kämil ynsanlary, şöhratly Türkmenistanymyzyň mynasyp ogul-gyzlaryny ýetişdirmegi maksat edinýäris. Halkymyzyň geljegini ylym we bilim bilen gurşap alýan, mugallymlaryň mertebesini belentde tutýan Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak, beýik tutumlary elmydama rowaç bolsun!

Dildar JUMAKULYÝEWA,
Lebap welayatynyň Çärjew etrabynyň 20-nji orta mekdebiniň başlangyç synp mugallymy.