TÄZELENIŞIŇ WE GÖZELLIGIŇ BAÝRAMY
12-03-25
Berkarar döwletiň täze eýýamynyň Galkynyşy döwründe Diýarymyzda Milli bahar baýramy — Halkara Nowruz güni giňden bellenilip geçilýär. Nowruzyň gelmegi bilen goja Zemin, ene toprak juwan keşbe girýär, adamlaryň ruhuna ruh goşulýar, jümle-jahanda täzeleniş başlanýar. Türkmen halkynyň gadymdan gelýän esasy baýramlarynyň biri hem Milli bahar baýramydyr.
Tebigatda bolup geçýän her bir hadysany synçy nazary bilen saldarlan ata-babalarymyzdan galan halk ýorgutlarynda aýdylyşy ýaly, togsan dolup, ýere ýyly gidende, tebigatda täze bir janlanyş peýda bolýar. Şonuň üçinem «Ýylyň gelşi Nowruzyndan bellidir» diýen paýhasly pederlerimiz tutuş täze ýylyň rysgal-berekedini, mal-garanyň, ekin-dikiniň ýagdaýyny bu tebigy öwrülişik bilen kesgitläpdirler.
«Gaýalaryň gary eräp bireýýäm,
Pyntyklady pisse bilen badamlar.
Bahar ýeli aýnalary kakyp dur:
― Bahar gelýär, bahar gelýär, adamlar!»
Şahyr Halyl Kulyýewiň bu goşgy setirlerindäki buşluk köňüllere ýylylyk, ýaz mährini paýlaýar. Çünki tebigatyň gül-gunçalara, lälezarlyga bürenip, ajaýyp keşbe girmegi, her bir göwne üýtgeşik teselli berýär. Şahyr Gurbannazar Ezizow bolsa bahary «Ülkäme toý bolup gelen ýazlarym» diýip wasp edýär. Hakykatdanda, bu ajaýyp pasyl toý-baýrama baý. Milli bahar baýramy hem bu paslyň iň naýbaşy baýramlarynyň biri.
Halkara derejesinde ykrar edilen Nowruz baýramynyň özboluşly däpleri, edim-gylymlary bar. Ol gün ýerine ýetirilýän däpler adamlary biri-birine ýakynlaşdyryp, gatnaşyklaryny berkidipdir. Nowruz — täzelenişiň baýramy. Ol hasyllylygy, dostlugy we mähribanlygy alamatlandyrýar. Gündogar halklarynda Nowruzyň gelmegi täze ýylyň gelmegi hasaplanylýar. Nowruz — täze durmuşyň buşlukçysy, täze umytlaryň, meýilleriň, raýdaşlygyň başlangyjy. Gadymy senenama görä, adatça, 22-nji mart — gije-gündiziň deňleşýän güni. Gije gysgalyp, gündiz uzalyp başlaýar. Şonuň üçin Nowruz «täze gün» diýlip atlandyrylýar, tebigatda täzeleniş bolýar, mylaýym bahar şemaly öwsüp, ýyldyrym çakýar, ýagyş ýagýar, älemgoşar görünýär, agaçlar pyntyklaýar, otlar gök öwüsýär.
Taryhy müňýyllyklara uzaýan bu baýram 2009-njy ýylyň 30-njy sentýabrynda öz halkynyň baý medeni mirasyna, milli gymmatlyklaryna aýratyn sarpa goýýan Gahryman Arkadagymyzyň tagallasy bilen 24 döwletiň goldamagynda ÝUNESKO-nyň Adamzadyň maddy däl medeni mirasynyň sanawyna girizildi.
Güneşli ýurdumyzda Halkara Nowruz güni döwlet derejesinde giňden bellenilip geçilýär. Gözbaşyny taryhyň çuňluklaryndan alyp gaýdýan bu baýramyň ajaýyp däp-dessurlary häzirki wagtda döwrebap dowam etdirilýär. Her ýylda Nowruz baýramçylygy günlerinde tutuş ýurdumyz boýunça bag ekmek dabarasyna badalga bermek asylly däp bolup durmuşymyza ornaşdy.
Bahar paslynyň eziz Diýarymyza toý bolup gelýändigini äleme jar edýän Milli bahar baýramy — Halkara Nowruz güni her birimiziň, aýratyn-da, bagtyýar ýaş nesilleriň kalbynda gülläp ösýän ata Watanymyza, bagtly şu günümize hem-de nurana geljegimize bolan buýsanç duýgularyny terbiýeleýär. Şu günler bagtyýar halkymyz Berkarar döwletiň täze eýýamynyň Galkynyşy döwrüniň baharyny aýratyn joşgun, söýgi, mähir bilen garşylaýar.
Halkara Nowruz baýramyňyz gutly bolsun! Täze günüň, täze ýylyň, baharyň buşlukçysy Nowruz baýramynda ediljek arzuw-niýetler hasyl bolsun!
Maýsa MOMMYÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň patologik anatomiýa kafedrasynyň öwrenji mugallymy.
Ynsanperwerlik, haýyr-sahawatlylyk jemgyýetiň gymmatlyklardyr
Her bir ýurduň bagtyýarlygy, abadançylygy ösüp gelýän ýaş nesil hakdaky aladalardan gözbaş alýar. Şoňa görä-de, Garaşsyz Watanymyzda durmuş goraglylygyny üpjün etmek, maşgalany goldamak, enäniň we çaganyň saglygyny goramak, bu ugurlaryň kanunçylyk binýadyny pugtalandyrmak meselelerine uly ähmiýet berilýär.
GDA giňişliginde medeni-ynsanperwer hyzmatdaşlygy
Mälim bolşy ýaly, ýakynda paýtagtymyzda möhüm halkara çäresi – Garaşsyz Döwletleriň Arkalaşygynyň Hökümet Baştutanlarynyň Geňeşiniň mejlisi üstünlikli geçirildi. Türkmenistanyň Arkalaşykda başlyklyk etmeginiň Konsepsiýasyny amala aşyrmagyň çäginde guralan bu mejlis arkalaşyk we doganlyk ruhy bilen ynsanperwer gatnaşyklary ilerletmegiň, ykdysady hyzmatdaşlygy pugtalandyrmagyň ugrunda täze mümkinçilikleri döretdi.
Halkara gatnaşyklaryň ynsanperwer ugurlary
Garaşsyz, Hemişelik bitarap Türkmenistanyň daşary syýasaty Türkmenistanyň Konstitusiýasy, Türkmenistanyň konstitusion kanunlary, beýleki kadalaşdyryjy hukuk namalary, halkara hukugynyň umumy ykrar edilen ýörelgeleri we kadalary, şeýle hem Türkmenistanyň gatnaşýan halkara şertnamalary we konwensiýalary esasynda amala aşyrylýar.
Berkarar döwletimizde ynsanperwer ýörelgeleriniň dabaralanmasy
Gahryman Arkadagymyzyň beýik başlangyçlaryny mynasyp dowam etdirýän Arkadagly Serdarymyzyň parasatly baştutanlygynda adam hakda alada ýurdumyzda alnyp barylýan durmuş ugurly döwlet syýasatynyň baş ugrudyr. Munuň özi ähli ulgamlarda, ilkinji nobatda, halkyň bähbidine gönükdirilip amala aşyrylýan beýik işlerde, döwletli tutumlarda, Gahryman Arkadagymyzyň nusgalyk göreldesi bilen berk eýerilýän we jemgyýetimiziň agzybirligini has-da pugtalandyrýan ynsanperwer ýörelgelerde aýdyň ýüze çykýar.
ARASSAÇYLYK – SAGDYNLYGYŇ SAKASY
Biziň jan-saglygymyz iýýän zatlarymyza we olaryň hiline baglydyr. Eziz Diýarymyzyň ajaýyp tebigaty, baý ösümlik dünýäsi bar. Tebigatyň goralmagy, arassalygy we gözelligi barada biziň ata-babalarymyz müňýyllyklaryň dowamynda alada edip gelipdirler. Muňa pederlerimiziň ýer-toprak hakynda aýdan atalar sözleri-de, tebigaty baýlaşdyrmak, gözelleşdirmek barada geçiren çäreleri-de aýdyň mysal bolup biler.
HORMATLY PREZIDENTIMIZ SERDAR BERDIMUHAMEDOW:
– Häzirki döwürde Garaşsyz Türkmenistan öz ösüşiniň täze tapgyryna gadam basdy. Bu döwür «Berkarar döwletiň täze eýýamynyň Galkynyşy» diýlip atlandyryldy. Ösüşiň şu täze döwründe biz öz öňümizde has belent maksatlary goýduk.