Gadam basylan 2024-nji ýylyň «Pähim-paýhas ummany Magtymguly Pyragy» ýyly diýlip atlandyrylmagy her birimizde çäksiz buýsanç we şatlyk duýgusyny döredip, Berkarar döwletiň täze eýýamynyň Galkynyşy döwründe beýik akyldar şahyrymyza goýulýan hormat-sarpanyň has belent derejelere göterilendigini dabaralandyrdy.

Hormatly Prezidentimiz Serdar Berdimuhamedowyň belleýşi ýaly, «Akyldar şahyrymyz Magtymgulynyň eserleri bu gün türkmen kalbynyň owazy bolup, dünýä ýaň salýar. Dana Pyragyny dünýä beren halkymyzyň mertebesi Ýer ýüzünde hemişe belentdir». Bu gün halkymyz dana şahyrymyz Magtymguly Pyragynyň arzuwlan zamanasynda — berkarar döwletde ýaşamak bilen, şirin dilli söz ussadyň döredijiligine uly sarpa goýýar. Täze, 2024-nji ýylda Gündogaryň beýik akyldary we şahyry Magtymguly Pyragynyň doglan gününiň 300 ýyllygynyň dünýä derejesinde giňden bellenip geçiljekdigi hem munuň aýdyň subutnamasydyr.

Bu günki gün Gahryman Arkadagymyzyň başlangyçlary hormatly Prezidentimiziň baştutanlygynda döwlet we jemgyýetçilik durmuşynyň ähli ugurlaryny öz içine alýan düýpli özgertmeler arkaly üstünlikli durmuşa geçirilýär. Demokratiýany pugtalandyrmaga, ykdysadyýeti döwrebaplaşdyrmaga, ilatyň ýaşaýyş-durmuş derejesini ýokarlandyrmaga gönükdirilen giň gerimli işler tutuş ýurdumyzy gurşap aldy. Halkymyz bu asylly başlangyçlary gyzgyn goldap, olary durmuşa geçirmäge işjeň gatnaşýar. Bu bolsa döwletimiziň durmuş-ykdysady taýdan ösüş depginlerine oňyn täsirini ýetirdi. Türkmenistan saýlap alan syýasy-ykdysady ugry dünýäde uly goldaw tapyp, halkara jemgyýetçiligiň ünsli synlaýan, hormat goýýan we guwanýan ýurduna öwrüldi. Hormatly Prezidentimiz Täze ýyl gutlagynda 2023-nji ýylda Türkmenistanyň gazanan diplomatik üstünlikleriniň Bitarap döwletimiziň öňe sürýän umumadamzat ähmiýetli başlangyçlarynyň halkara giňişlikde uly goldaw tapýandygyny ýene-de bir gezek aýdyň görkezýändigini belledi. “Daşary syýasatda Bitarap Watanymyzyň dünýädäki ornuny has-da berkideris. Ýer ýüzüniň döwletleri we halkara guramalary bilen hyzmatdaşlygy täze many-mazmun bilen baýlaşdyrarys” diýip nygtady. Bu sözleriň aňyrsynda uly hakykat bar. Munuň özi Türkmenistanyň dünýä bileleşigi bilen hyzmatdaşlygy giňeltmek meselelerine örän ünsli çemeleşýändigini aýdyň görkezýär.

Garaşsyz ösüşiň täze taryhy döwründe ýurdumyzyň ileri tutýan ugurlary kesgitlenildi — 2052-nji ýyla çenli Türkmenistany durmuş-ykdysady taýdan ösdürmegiň strategiýasy kabul edildi. Bu maksatnamada öňde duran wezipeleri netijeli ýerine ýetirmäge, jemgyýeti hil taýdan has-da kämilleşdirmäge, özgertmeleri üstünlikli durmuşa geçirmek üçin ýurduň mümkinçiliklerini, kuwwatyny, Garaşsyzlyk ýyllarynda toplan tejribesini döredijilikli, başarjaňlyk bilen peýdalanmaga, ylmyň we tehnologiýalaryň gazananlaryny önümçilige ornaşdyrmaga möhüm ähmiýet berilýär. Türkmenistany dünýäniň ösen ýurtlarynyň derejesine çykarmak, halkymyzy mundan beýläk-de bolelinlikde ýaşatmak wezipesi öňde goýuldy. Bazar gatnaşyklaryna tapgyrma-tapgyr, birsydyrgyn geçmek bu maksada ýetmegiň esasy guraly hökmünde kesgitlenildi. Bu işde, esasan, ylmy-tehnologik ösüşe hem-de halkara gatnaşyklaryň işjeňleşdirilmegine bil baglanylýar.

Häzir Türkmenistan milli we dünýä ähmiýetli iri taslamalaryň amala aşyrylýan ägirt uly gurluşyk meýdançasyna öwrüldi. Olar senagat-önümçilik toplumlarydyr, ulag ýollarydyr, aragatnaşyk ulgamlarydyr, ýaşaýyş jaýlarydyr, stadionlardyr we beýleki durmuş-medeni maksatly desgalardyr. Munuň özi Diýarymyzyň ykdysady kuwwatynyň barha artýandygynyň, halkymyzyň durmuş derejesiniň has-da gowulanýandygynyň aýdyň nyşanydyr. Çünki raýatlaryň parahat, asuda ýaşaýşyny üpjün etmek, hakyky ykdysady ösüşler esasynda ony yzygiderli ýokarlandyrmak döwlet syýasatynyň özenini düzýär.

Gahryman Arkadagymyz Gurbanguly Berdimuhamedowyň «Pähim-paýhas ummany Magtymguly Pyragy» atly ajaýyp goşgusy täze taryhy döwrümizde türkmeniň akyldar şahyrynyň sarpasynyň uludygy hakdaky hakykatyň özboluşly beýanydyr. Şonuň bilen baglylykda, Gahryman Arkadagymyzyň ýiti zehininden, jöwher paýhasyndan dörän «Pähim-paýhas ummany Magtymguly Pyragy» goşgusyndan ugur alnyp, Türkmenistanyň Mejlisiniň karary esasynda 2024-nji ýylyň «Pähim-paýhas ummany Magtymguly Pyragy» ýyly diýlip atlandyrylmagy ildeşlerimiziň watançylyk ruhuny has belende göterip, beýik döwrümize bolan buýsanjyny goşalandyrdy.

Halkymyzy beýik söz ussady Magtymguly Pyragynyň arzuwlan ajap eýýamyna ýetiren, berkarar Watanymyzy ösüşiň we döredijiligiň ýoly bilen öňe alyp barýan hormatly Prezidentimiziň hem-de Gahryman Arkadagymyzyň döwletli tutumlary has-da rowaçlyga beslensin, «Pähim-paýhas ummany Magtymguly Pyragy» ýyly düşümli bolsun!

Bazar HALMEDOW,
Myrat Garryýew adyndaky Türkmenistanyň Döwlet lukmançylyk uniwersitetiniň Patologik anatomiýa kafedrasynyň mugallymy,
Lukmançylyk ylymlarynyň kandidaty.