Garaşsyzlyk ýyllary içinde Türkmenistan dünýä kartasynda özüniň parahatçylyk söýüji daşary syýasaty, güýçli ykdysadyýeti we berk jemgyýetçilik agzybirligi bilen tanalýan kuwwatly döwlete öwrüldi. Mukaddes Garaşsyzlygyň 35 ýyllyk dabaraly baýramyna barýan ýolumyz - bu beýik gurluşyklaryň, ylym-bilimiň ösüşiniň, jemgyýetçilik-syýasy özgerişleriň taryhydyr. Türkmenistanyň Halk Maslahatynyň Başlygy, Türkmen halkynyň Milli Lideri Gahryman Arkadagymyzyň binýadyny goýan beýik ösüş ýoly, şu günki günde Türkmenistanyň Prezidenti, hormatly Serdar Berdimuhamedowyň parasatly ýolbaşçylygynda täze mazmun, belent ruh we egsilmez kuwwat bilen dowam etdirilýär.

Ýurdumyzyň durmuş-ykdysady taýdan ösüşini üpjün etmekde kabul edilen döwlet maksatnamalary yzygiderli durmuşa geçirilýär. Senagatlaşdyrmak, milli ykdysadyýetimizi diwersifikasiýalaşdyrmak, sanly ulgama geçmek we daşky gurşawy goramak boýunça alnyp barylýan işler bu gün özüniň aýdyň miwelerini berýär. Şanly Garaşsyzlygymyzyň 35 ýyllygynyň öňüsyrasynda gazanylan her bir üstünlik ilatymyzyň ýaşaýyş-durmuş derejesiniň ýokarlanmagyna, ýurdumyzyň dünýä giňişligindäki abraýynyň artmagyna hyzmat edýär. Garaşsyzlygyň 35 ýyllyk baýramy mynasybetli ýurdumyzyň ähli welaýatlarynda, şäherdir obalarynda uly gurluşyk-binagärlik işleri bellenilýän meýilnamalara laýyklykda alnyp barylýar.

Özgertmeleriň başynda durýan beýik taslamalaryň biri bolan Arkadag şäheriniň gurluşygynyň üstünlikli dowam etdirilmegi, Ak şäherimiz Aşgabadyň gözelligine gözellik goşýan täze binagärlik toplumlary milli buýsanjymyzy artdyrýar. Şeýle hem ýurdumyzyň sebitlerinde - Ahal, Balkan, Daşoguz, Lebap we Mary welaýatlarynda batly depginler bilen gurulýan önümçilik we durmuş desgalary Türkmenistan döwletimiziň ykdysady kuwwatynyň yzygiderli artýandygynyň aýdyň subutnamasydyr. Oba hojalyk ulgamynda hem türkmen gallaçylarynyň, pagtaçylarynyň we başga-da ekerançylyk bilen meşgullanýan zähmetkeşlerimiziň gazanýan uly üstünlikleri baýramçylyk dabaralaryna aýratyn şowhun goşýar.

Döwletimiziň baş ýörelgesi bolan “Döwlet adam üçindir!” diýen baş şygar Gahryman Arkadagymyzyň hem-de Arkadagly Gahryman Serdarymyzyň alyp barýan syýasatynyň özenidir. Türkmenistanda adamyň bähbitleri, onuň saglygy, bilimi, abadançylygy we döredijilikli zähmet çekmegi üçin ähli şertler döredilendir. Garaşsyzlyk ýyllarynda bilimiň, ylymyň, medeniýetiň we sportuň ösmegine aýratyn üns berildi. Ýaşlaryň döwrebap bilim almagy, dünýä ylymlaryny özleşdirmegi, halkara bäsleşiklerde we sport ýaryşlarynda ýurdumyzyň baýdagyny belende göterýändikleri baýramçylyk günlerinde aýratyn buýsanç bilen bellenilýär.

Türkmenistanyň Garaşsyzlygy onuň hemişelik Bitaraplygy bilen aýrylmaz baglanyşyklydyr. Bitaraplyk syýasaty Türkmenistana dünýä döwletleri we halkara guramalary bilen dostlukly, parahatçylykly we özara bähbitli hyzmatdaşlygy ösdürmäge mümkinçilik berdi. Birleşen Milletler Guramasy tarapyndan birnäçe gezek yzygiderli goldanan Kararnamalar Türkmenistanyň parahatçylyk söýüji, parahatçylygy we durnuklylygy berkitmäge degişli bolup durýan parahatçylyk merkezine öwrülendigini aýdyňlygy bilen görkezdi. Garaşsyzlygyň 35 ýyllygyna bagyşlanyp geçirilýän halkara maslahatlar, forumlar we medeni çäreler ýurdumyzyň daşary syýasatda gazanan üstünliklerini dünýä jemgyýetçiligine ýene bir gezek aýdyň görkezýär. Dünýä bileleşigi Türkmenistany ynamly, parahatçylyk söýüji we çalt ösýän kuwwatly döwlet hökmünde sarpalaýar. Şu beýik döwürde ýaşamak, okamak, bilim almak we döretmek - her bir türkmen raýaty üçin beýik bagtdyr we belent mertebedir. Halkymyzy beýik ösüşlere, bagtyýar geljege ynamly alyp barýan Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, beýik işleri hemişe üstünliklere beslensin!

Anahan SAPAŞOWA,
Türkmenistanyň Prezidentiniň ýanyndaky Döwlet gullugy akademiýasynyň talyby.