Berkarar döwletiň täze eýýamynyň Galkynyşy döwrüniň nobatdaky ýylynyň «Arkadag Serdarly bagtyýar ýaşlar ýyly» diýlip atlandyrylmagy ýaş nesliň kalbynda egsilmez joşguny döretdi. Il arzuwyny hasyl eden bu çözgüt Arkadagly Serdarymyzyň: «Biz ýaşlara eziz Watanymyzyň geljegini gurujylar hökmünde garaýarys» diýen pähim-paýhasa ýugrulan sözleriniň özboluşly dabaralanmasy boldy. Ýurdumyzyň ýaş nesil baradaky döwlet syýasaty özüniň çuňňur mazmuny, belent maksatlary bilen tapawutlanýar. Türkmen halkynyň Milli Lideri Gahryman Arkadagymyzyň oýlanyşykly başlangyçlary, hormatly Prezidentimiziň taýsyz tagallalary arkaly üstünlikli durmuşa geçirilýän ýaşlar syýasaty ýaş raýatlaryň hukuklaryny, azatlyklaryny, döwlet kepilliklerini, jemgyýetde mynasyp ornuny tapmagyny üpjün etmäge gönükdirilendir. Ýurdumyzyň röwşen geljeginiň eýeleri bolan ýaşlaryň tebigy ukyp-başarnyklaryny ýüze çykarmak, goldamak, olaryň ylymly-bilimli, hünärli, giň dünýägaraýyşly kämil şahsyýetler bolup ýetişmeklerini gazanmak hem ýaşlar baradaky döwlet syýasatynyň aýrylmaz bölegidir. Bagtyýar ýaşlaryň buýsanjyny artdyrýan şeýle döwletli tutumlaryň degişli kanunlara, maksatnamalardyr konsepsiýalara daýanmagy alnyp barylýan işleriň netijeliligini ýokarlandyrýar.     

Bagtyýarlyk ýaňlary dünýä dolan mähriban Watanymyzda ýaşlaryň göreldesi bolan Milli Liderimiziň:

- Beýik döwlet, eziz ülke, dogduk depe, asly mekan,
Ählijesi seniň özüň, jan Watanym Türkmenistan!
Keremlidir ene toprak, keramatdyr mawy asman,
Edermendir ogul-gyzyň, jan Watanym Türkmenistan!

- ýaly jöwher paýhasyndan syzylyp çykýan köňül senalarynda ýaş nesillere bildirýän ynamy ýaşlaryň ylym-bilimli, beýik şahsyýetler bolup, kämillikde özlerini ykrar etdirmeklerine aýratyn uly ruhy güýç berýär.

Eziz Diýarymyzda «Berkarar döwletiň täze eýýamynyň Galkynyşy: Türkmenistany 2022-2052-nji ýyllarda durmuş-ykdysady taýdan ösdürmegiň Milli maksatnamasynda» hem-de beýleki milli maksatnamalarda ýurdumyzda ähli ugurlar bilen baglanyşykly bolan ylym-bilim ulgamyny kämilleşdirmek boýunça göz öňünde tutulan maksatlara laýyklykda, dünýä ähmiýetli işler alnyp barylýar. Milli bilim ulgamynyň ösüşini çaltlandyrmagyň çäklerinde, ýaş nesilleri ylym-bilime höweslendirmek, olaryň ukyp-başarnyklaryny ýüze çykarmak we halkymyzyň ruhy-ahlak ýörelgelerine eýerýän kämil şahsyýetler edip ýetişdirmek ugrunda ummasyz tagallalar edilýär. Şolaryň hatarynda ýurdumyzda inžener-tehniki dersler boýunça ýaşlara bilim berýän Türkmenistanyň Inžener-tehniki we ulag kommunikasiýalary institutynda hem bilim ulgamynyň ösüşlerine gönükdirilen anyk maksatlaryň durmuşa geçirilýändiginiň şaýady bolýarys.

Şeýle-de institutymyzyň talyplary bilen ýurdumyzyň bilim ulgamynda ýaşlaryň arasynda yzygiderli geçirilýän okuw sagatlaryna, halkara derejeli bilermenler bilen duşuşyklara, okuw maslahatlaryna we dünýä tejribesini ulanmagyň hem-de okatmagyň täzeçil usullarynyň ornaşdyrylmagyna bagyşlanan aň-bilim çärelerine işjeň gatnaşýarys. Bu bolsa ukyp-başarnygymyzy açyp görkezmäge, gözýetimizi giňeltmäge, iň esasysy bolsa, bilim çygrynyň giňişliklerine aralaşyp, tejribämizi baýlaşdyrmaga ruhlandyrýar.   Nesip bolsa, göwün söýen hünärimizden ýokary bilim alyp, halal zähmetimiz bilen, Watanymyzyň dünýä derejesindäki ösüşleriniň badyna bat goşmagy maksat edýäris.

Berkarar Watanymyzy rowaçlyklaryň ak ýolundan uly ynam, synmaz ruhubelentlik bilen nurana geljege alyp gitjek Arkadag Serdarly bagtyýar ýaşlar ýyly perzentlik borjumyzy hem goşalandyrýar. Gahryman Arkadagymyzyň dana pähim-paýhasyndan, syýasy tejribesinden hem-de atalyk göreldesinden, Arkadagly Serdarymyzyň öňdengörüjilige, kämillige gol beren syýasy işjeňliginden, ýüregi gurmak, döretmek, özgertmek hyjuwyndan möwç urýan ýaş nesliň egsilmez joşgunyndan gözbaş alýan şu ýylymyz täzeden-täze başlangyçlaryň binýady bolar. Döwletimiziň ýaş nesillerine ähli mümkinçilikleri döredip berýän Arkadagly Serdarymyzyň jany sag, ömri uzak bolsun, tutýan tutumly işleri elmydama rowaçlyklara beslensin!n!    

 Şalar ORAZOW,
Türkmenistanyň Inžener-tehniki we ulag kommunikasiýalary institutynyň Sanly tehnologiýalar we kiberhowpsuzlyk fakultetiniň 2-nji ýyl talyby.