Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Gahryman Serdarymyzyň başda durmagynda Arkadag Serdarly bagtyýar ýaşlar ýylynyň 1-nji sentýabrynda Bilimler we talyp ýaşlar güni mynasybetli türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň Arkadag şäheriniň Ruhyýet köşgünde bilim işgärleriniň, talyp ýaşlaryň we mekdep okuwçylarynyň gatnaşmagynda geçiren umumy sapagy ýaş nesillerimiziň durmuşynda ýatdan çykmajak şanly seneleriň biri boldy. Bu taryhy ähmiýetli sapak ýaşlarda ruhy galkynyşy döretdi.

Eziz Watanymyzda ýaşlaryň döwrebap bilim almagy, öz saýlan ugurlary boýunça ökde hünärmenler bolup ýetişmegi üçin ähli mümkinçilikler durmuşa ornaşdyrylýar. Ýurdumyzda bilim ulgamynda amala aşyrylýan özgertmeler, gurlup, ulanylmaga berilýän orta we ýokary okuw mekdepleri ýaş nesilleriň kämil bilimli bolup ýetişmeklerine mümkinçilik berýär.

Berkarar döwletiň täze eýýamynyň Galkynyşy döwri bilimiň we okatmagyň ýokary ösüş derejesi, ylmy-tehniki gazanylanlaryň ornaşdyrylmagy bilen şertlenen ýurdumyzyň özgertmeler ýoly bilen okgunly öňe barýan zamanasydyr. Hormatly Prezidentimiziň taýsyz tagallalary netijesinde soňky ýyllarda ýurdumyzda iň täze kompýuter tehnologiýalary we multimedia ulgamlary bilen enjamlaşdyrylan döwrebap bilim edaralarynyň giň düzümi emele getirildi. Sanly bilimiň ösdürilmegi netijesinde, okuw maksatly dürli maglumat çeşmeleri, uly maglumat gorlary, bilim portallary, internet sahypalary döredildi. Gündelik okuwlarda ulanylýan sanly serişdeler adaty okuwyň päsgelçiliklerini ýeňip geçmäge, bilim maksatnamalaryny özleşdirmegiň depginini, okatmagyň görnüşlerini we usullaryny saýlamaga ýardam berýär.

Ýaşlar üçin ýokary okuw mekdepleriniň internet sahypalarynyň ähmiýeti has-da uludyr. Olar şol sahypalaryň üsti bilen ýokary okuw mekdebini, taýýarlygyň ugurlaryny, hünärleri saýlamaga mümkinçilik alýarlar. Ýokary okuw mekdepleriniň internet bilim portallarynda ýokary okuw mekdebiniň elektron okuw toplumlary, okuw sapaklarynyň tertibi, olimpiadalar, elektron kitaphana we beýleki maglumatlar ýerleşdirilýär.

Arkadagly Gahryman Serdarymyzyň baştutanlygynda ýurdumyzda sanly ykdysadyýeti ösdürmek boýunça durmuşa geçirilýän möhüm işler sanly tehnologiýalary ornaşdyrmagyň hasabyna raýatlara hödürlenilýän elektron bilim hyzmatlarynyň gerimini giňeltmek babatynda çäksiz mümkinçilikleri döredýär. Bu zatlar biz — bagtyýar talyp ýaşlary diýseň begendirýär we Watanymyza mynasyp döwrebap hünärmenler bolmaga höwesimizi goşalandyrýar.

Orazjan ORAZJANOW,
Türkmenistanyň Inžener-tehniki we ulag kommunikasiýalary institutynyň Demir ýol ulaglary fakultetiniň 1-nji ýyl talyby.