Arkadag Serdarly bagtyýar ýaşlar ýylynyň taryhy wakalary ýurt ykbalynda täze sahypalary açýar. Garaşsyz Diýarymyzyň jemgyýetçilik-syýasy durmuşynda ýokary ähmiýete eýe bolup, ýyl senenamasyna altyn harplar bilen ýazylan wakalaryň biri hem Halk Maslahatynyň mejlisiniň ýokary guramaçylykly we üstünlikli geçirilmegi bilen baglydyr. Türkmen halkynyň Milli Lideri Gahryman Arkadagymyzyň başlyklyk etmeginde geçirilen bu döwletli maslahata gatnaşmak bize hem nesip etdi. Paýtagtymyzyň Maslahat köşgünde dabaraly ýagdaýda geçen bu maslahat Garaşsyzlyk ýyllarynda gazanylan üstünlikleriň, ýetilen belent sepgitleriň we öňde duran täze menzilleriň özboluşly beýanyna öwrüldi.

Ata-babalarymyzyň sekiz asyrlap küýsän döwletliligi, garaşsyzlygy, erkinligi türkmen topragynda baky berkarar boldy. Magtymguly atamyzyň:

…Bir suprada taýýar kylynsa aşlar,
Göteriler ol ykbaly türkmeniň.

diýip islän berkarar döwletiniň şany hormatly Belent Serkerdebaşymyzyň parasatly baştutanlygynda äleme dolýar. Garaşsyz bolup ýaşamagyň, döwletli bolup ömür sürmegiň neneňsi mertebedigine, nähili beýiklikdigine düşünen pederlerimiz bu topragyň erkinligi üçin birjik-de yhlasyny, şirin janyny aýamadylar.

Pederlerimizden gelýän asylly ýörelgeler 24-nji sentýabrda paýtagtymyzda Watanymyzyň mukaddes Garaşsyzlygynyň 32 ýyllygynyň öňüsyrasynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlyklyk etmeginde geçirilen Türkmenistanyň Halk Maslahatynyň mejlisinde has-da belentden dabaralandyryldy. Döwletimiziň durmuşynda taryhy ähmiýetli waka öwrülen umumymilli forumyň gün tertibine ýurdumyzy mundan beýläk-de okgunly ösdürmäge, halkymyzyň abadan we bagtyýar durmuşyny üpjün etmäge gönükdirilen düýpli özgertmeleri amala aşyrmagyň ileri tutulýan wezipeleri girizildi.

Hormatly Prezidentimiz Arkadagly Serdarymyz hem-de türkmen halkynyň Milli Lideri Gahryman Arkadagymyz demokratiýany ösdürmekde raýat jemgyýetini kämilleşdirmegiň, dünýä ölçeglerine laýyklykda adamyň we raýatyň hukuklaryny, azatlyklaryny üpjün etmegiň, hukuk taýdan goramagyň, syýasy ulgamy ösdürmegiň, şeýle-de kämilleşdirmegiň tapawutlandyryjy aýratynlyklaryna yzygiderli üns berýärler. Munuň özi ilatyň döwleti hem-de jemgyýeti dolandyrmaga işjeň gatnaşmagynda, raýatlaryň durmuş, syýasy hukuklarynyň täze mazmun bilen baýlaşmagynda öz beýanyny tapýan demokratiýany kämilleşdirmegiň yzygiderli işiniň ýurdumyzyň döwlet we jemgyýetçilik durmuşynyň ösüşiniň baş kanunalaýyklygy hökmünde çykyş etmegine oňaýly täsir edýär.

Şu gezekki taryhy maslahatda halkymyzyň, Watanymyzyň bähbidine örän köp wezipeler, örän köp tutumlar öňe sürüldi, halk wekilleriniň teklipleri diňlenildi. Halk maslahatynyň taryhy çözgütleri bilen birlikde, hormatly Prezidentimize Türkmenistanyň iň ýokary tapawutlandyryş derejesi ― «Altyn Aý» altyn nyşanynyň gowşurylmagy bilen, Türkmenistanyň Gahrymany diýen belent adyň dakylmagy ähli türkmenistanlylaryň başyny göge ýetirdi. Munuň özi döwlet Baştutanymyzyň baştutanlygynda amala aşyrylýan döwlet syýasatynyň ählihalk tarapyndan goldawa mynasyp bolýandygynyň, peder ýoluny mynasyp dowam etdirýän Arkadagly Serdarymyzyň mähriban halkymyzyň söýgüsini gazanandygynyň aýdyň beýanydyr.Ýaşlarda gujuram bar, gaýratam.

Goý, mukaddes Garaşsyzlygymyzyň gudraty bilen gazanýan ýeňişlerimiziň, ýetýän belent sepgitlerimiziň dowamy dowamat bolsun! Dünýäde parahatçylygy pugtalandyrýan, ata Watanymyzy gülledip ösdürýän Gahryman Arkadagymyza we Gahryman Prezidentimize egsilmez alkyşlar aýdýarys!

Bagtygül JORAÝEWA,
Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenhowaýollary» agentliginiň Türkmenabat halkara howa menziliniň buhgalteri. TKA-nyň başlygy.