Ber­karar­ döw­le­tiň­ tä­ze­ eý­ýa­my­nyň­ Gal­ky­ny­şy döwründe durmuşa geçirýän beýik işler gülläp ösýän Garaşsyz Watanymyzyň ykdysady kuwwatyny günsaýyn berkidýär. Häzirki wagtda himiýa senagatynda başy başlanan giň göwrümli taslamalar halkara hyzmatdaşlygy pugtalandyrmaga, halkymyza ýokary hilli önümleri hödürlemäge uly mümkinçilik döredýär.

Ýurdumyzyň alyp barýan ykdysady syýasatynda himiýa senagatyna aýratyn orun degişli bolup, ol Türkmenistanyň ykdysadyýetiniň ýokary depginler bilen ösýän pudaklarynyň biridir. Soňky 10 ýylyň dowamynda «Türkmenhimiýa» Döwlet konsernine 3,3 milliarddan gowrak amerikan dollary möçberinde maýa goýuldy. Önüm öndürijilik kuwwaty diňe mineral dökünleriň öndürilişinde häzirki wagta çenli 3 esse artdyryldy. Bäsdeşlige ukyply, dünýä bazarynda uly islegli, ekologiýa taýdan arassa we ýokary tehnologiýaly önümçilikler, halkara ölçegleriniň talaplaryna kybap gelýän himiýa önümleri bu gün döwletimiziň bu pudagynyň daşary ýurtlarda abraýyny üpjün edýär.

Türkmenistan kuwwatly önümçilik düzümleriniň döredilmegini, ýurdumyzyň öz çig mal serişdeleriniň hem-de tebigy baýlyklarynyň binýadynda ýokary hilli önümleriň möçberlerini we görnüşlerini artdyrmagy ugur edinmegi netijesinde hyzmatdaşlyk gatnaşyklaryny giňeltmäge gyzyklanma bildirýänleriň sany barha artýar. Ýurdumyzda alnyp barylýan «Açyk gapylar» syýasatynyň  dabaralanmasy netijesinde daşary ýurt maýa goýumlary üçin amatly şertler döredilip, açyk we okgunly ösýän türkmen bazarynda daşary ýurt kompaniýalarynyň işlemegi üçin oňyn şertler döredilýär.

«Türkmenistanyň Prezidentiniň ýurdumyzy 2019 — 2025-nji ýyllarda durmuş-ykdysady taýdan ösdürmegiň Maksatnamasyna» laýyklykda, dünýäniň ösen tehnologiýalar tejribesine we innowasiýalara daýanyp, milli ykdysadyýetimizi döwrebaplaşdyrýarys, ýurdumyzy durmuş taýdan ösdürmekde guwandyryjy üstünlikleri gazanýarys.

Bu maksatnamanyň çäginde ykdysadyýetimizi doly döwrebaplaşdyrmaga, kuwwatly senagat düzümini döretmäge gönükdirilen toplumlaýyn özgertmeler üstünlikli durmuşa geçirilýär. Senagat kärhanalarynda innowasiýalary, öňdebaryjy tehnologiýalary hem-de iň gowy daşary ýurt tejribesini giňden ornaşdyrmaga-da aýratyn ähmiýet berilýär. Şonuň bilen birlikde, senagat pudagynyň düzümlerinde gaýtadan işleýän innowasion toplumlary döretmek, ýerli çig mal esasynda pudak üçin zerur bolan serişdeleriň öndürilýän möçberlerini köpeltmek, bilelikdäki kärhanalaryň işini ýola goýmak, ýokary hünärli işgärleri taýýarlamak boýunça strategik wezipeler durmuşa geçirilýär.

Ýurdumyzyň himiýa senagaty, çig mala bagly gaýtadan işleýän ulgamlary toplumlaýyn we innowasion esasda döwrebaplaşdyrylýar. Häzirki wagtda bu ulgam dünýä ylmynyň we tejribesiniň iň öňdebaryjy gazananlaryna esaslanýan türkmen ykdysadyýetini senagat taýdan ösdürmegiň esasy ugrudyr.

Türkmenistanda halk hojalyk toplumyny senagatlaşdyrmaga gönükdirilen tutumly başlangyçlar senagat pudaklarynyň okgunly ösüşine-de itergi berýär. Geljegi uly hem-de eksport ugurly bu pudaklarda Diýarymyzyň täze ykdysady belentliklere çykmagyna, halkymyzyň abadançylygyna gönükdirilen döwlet syýasatynyň maksatlary öz beýanyny tapýar.

Himiýa senagatynyň ýerli çig mala esaslanýan önümçiliginiň mümkinçilikleriniň doly derejede peýdalanylmagy bilen azyk bolçulygy, içerki bazaryň ýokary hilli önümler bilen üpjünçiligi we himiýa önümleriniň dünýä bazaryndaky bäsdeşlige ukyplylygy ýaly strategik wezipeleri üstünlikli çözmäge mümkinçilik döredýär. Milli ykdysadyýetimiziň çig malsyz ösüş ýoluny üpjün etmekde, dünýä bazarynda uly isleg bildirilýän önümleriň görnüşlerini we öndüriliş möçberlerini artdyrmakda, eksport kuwwatlylygyny ýokarlandyrmaga niýetlenen önümçiliginiň giňeldilmeginde senagat ulgamynyň çig mallary gaýtadan işleýän beýleki pudaklary bilen birlikde, himiýa senagatyna hem uly orun degişlidir

Ber­karar­ döw­le­tiň­ tä­ze­ eý­ýa­my­nyň­ Gal­ky­ny­şy döwründe ýokary tehnologiýalary ulanýan milli ykdysadyýetimiziň ähli pudaklaryny sanly ykdysadyýete geçirmek döwlet syýasatynyň ileri tutulýan meseleleriniň birine öwrüldi. Bu bolsa, ilki bilen, ýurdumyzyň pudaklarynyň işiniň mundan beýläk-de kämilleşmegine, IT tehnologiýalaryň we häzirki zaman hyzmatlarynyň giňden ornaşdyrylmagyna bagly bolup durýar.

Goý, Berkarar döwletiň täze eýýamynyň Galkynyşy döwrüniň «Halkyň Arkadagly zamanasy» ýylynyň her bir güni uly üstünliklere beslensin, eziz Watanymyzyň, mähriban halkymyzyň şan-şöhraty asyrlardan-asyrlara uzasyn! Gahryman Arkadagymyzyň ösüşli ýoluny dowam etdirýän hor­mat­ly ­Pre­zi­den­ti­miz ­Ser­dar Berdimuhamedowyň­ jany sag, ömri uzak bolsun, alyp barýan ýurt bähbitli işleri uly üstünliklere beslensin!

Selbi ORAZMÄMMEDOWA,
Magtymguly adyndaky Türkmen döwlet uniwersitetiniň Organiki däl we analitiki himiýa kafedrasynyň mugallymy.