Türkmen halkynyň akyldar şahyry Magtymguly Pyragynyň döredijiligi, ajaýyp goşgulary halkara derejesinde uly meşhurlyga eýedir. Şahyryň döreden goşgulary, olarda öňe sürýän pikirleri çuňňur many-mazmuna eýe bolup, okyjylaryň kalbynda orun alýar. Täze taryhy eýýamda akyldar şahyryň ajaýyp eserleri ylmy esasda öwrenilýär we dünýä ýaýylýar. Ynsan kalbyna şygyrlary bilen ýagşylyk, halallyk, watansöýüjilik şuglasyny çaýýan, ruhy lezzet berýän akyldar şahyrymyz Magtymguly Pyragynyň nakyla öwrülen, öwüt-ündew berýän ajaýyp setirleriniň terbiýeçilik ähmiýeti diýseň uludyr. Dünýä okyjylary şahyryň eserlerini çuňňur sarpa goýmak bilen okaýarlar, şygyrlaryň çeperçiligine, many-mazmunyna haýran galýarlar.

Türki medeniýetiň halkara guramasynyň (TÜRKSOÝ) hemişelik geňeşiniň ýerleşýän ýeri bolan Türkiýe Respublikasynyň Bursa şäherinde geçirilen mejlisinde türkmen halkynyň akyldar şahyry Magtymguly Pyragynyň 300 ýyllygy mynasybetli 2024-nji ýyly “Türki dünýäniň beýik şahyry we akyldary Magtymguly Pyragy ýyly”, Türkmenistanyň gadymy Änew şäherini bolsa 2024-nji ýylda “Türki dünýäniň medeni paýtagty” diýip yglan etmek hakynda türkmen tarapynyň öňe süren başlangyçlary biragyzdan goldanyldy. Bu hoş habar türkmen halkyny buýsandyrdy. Munuň özi Gahryman Arkadagymyzyň we Arkadagly Serdarymyzyň milli medeniýetimizi, edebiýatymyzy çuňňur öwrenmekde, dünýä ýaýmakda uly tagallalary edýändigini aýdyň beýan edýär.

Akyldar şahyrymyz Magtymguly Pyragynyň ömrüni we döredijiligini öwrenmekde Gahryman Arkadagymyz hem-de Arkadagly Gahryman Serdarymyz ajaýyp nusga görkezýär. Türkmen halkynyň Milli Lideriniň nusgalyk kitaplarynda milli ýörelgelerimiz, akyldar şahyryň döredijiligi barada çuňňur manyly pikirler beýan edilýär. Gahryman Arkadagymyzyň “Türkmeniň döwletlilik ýörelgesi” atly kitabynda: “Magtymguly akyldar halkymyzyň akyl-paýhasa bolan yhlasly ymtylmasyny beýik derejä göterdi. Il-halkyň paýhasynda özleşdirilen bu ýörelgeler durmuş ulgamyna öwrüldi. Şonuň esasy hem geljekki nesilleriň ykbaly barasyndaky düýpli aladalardadyr” diýlip bellenilýär.

Magtymguly Pyragynyň terbiýeçilik älemi Watan mukaddesligine bagyşlanandyr. Akyldar şahyr öz şygyrlarynda bir döwlete, bir Watana gulluk etmegi, onuň mukaddesligini, asudalygyny gorap saklamagy ündeýär. Akyldar şahyrymyzyň miras galdyran, asyrlar aşyp, bize gelip ýeten watançylyk taglymy, röwşen pelsepewi pähimleri, aýdyň pikirleri ösüp gelýän ýaş nesiller üçin aýratyn ähmiýete eýedir. Garaşsyz döwleti gurup, bagtyýar geljege ynamly garaýan halky jebisleşdirmek, agzybir, asuda ýaşamak, bir döwlete gulluk etmek belent üstünliklere ýetmegiň esasy ýoludyr. Magtymguly Pyragynyň paýhasy ähli ildeşlerimiziň ýürek töründe orun alýar. Bu gün Magtymguly Pyragynyň çuňňur pähim-paýhasa ýugrulan dürdäne şygyrlary watançylygyň, ynsanperwerligiň we döwletliligiň waspyna öwrülip, dünýä dillerinde belent ýaňlanýar.

Berkarar döwletiň täze eýýamynyň Galkynyşy döwründe Magtymguly Pyragynyň mertebesi has-da belende göterildi, onuň agzybirlik, dostluk-doganlyk baradaky pikir-garaýyşlary okyjylaryň ünsüni has-da özüne çekýär. Şahyryň ylym-bilim, watançylyk, belent adamkärçilik ýaly öwüt-ündewli goşgulary uly gyzyklanma bilen okalýar. Akyldar şahyrymyz Magtymguly Pyragynyň döredijiligi edebiýat nukdaýnazaryndan hem, dil bi-limi esasynda hem öwrenilýär. Akyldar şahyryň ýagşylyk, belent adamkärçilik, ýagşy sözlemek hakdaky goşgulary ähli döwürlerde hem okyjylary özüne çekipdir. Ildeşlerimiz Magtymgulynyň döredijilik dünýäsine çuňňur gyzyklanma bildirip, onuň goşgularyny üns bilen okaýarlar.

«Pähim-paýhas ummany Magtymguly Pyragy» ýylynda türkmen medeniýetiniň we sungatynyň ösüş aýratynlyklaryny çuňňur öwrenmek, has-da kämilleşdirmegini, täze derejelere göterilmegini üpjün etmek boýunça ýurdumyzda uly işler alnyp barylýar. Magtymguly Pyragynyň ajaýyp goşgulary dünýäniň ençeme dillerine terjime edildi. Bu hem şahyryň döredijiliginiň dünýäniň okyjylarynyň ünsüni özüne çekýändigini aýdyň beýan edýär. Magtymguly Pyragynyň ajaýyp döredijiligini dünýä ýaýmakda beýik işleri durmuşa geçirýän Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun!

Ogulgerek ŞALYKOWA,
Türkmenistanyň Agrar partiýasynyň Aşgabat şäher komitetiniň Guramaçylyk we syýasy işler bölüminiň müdiri.