Berkarar döwletiň täze eýýamynyň Galkynyşy döwründe biziň buýsanjymyz bolan ak mermerli paýtagtymyz Aşgabadyň okgunly ösüşleri netijesinde onuň täze keşbi kemala gelýär. Tanalmaz derejede özgerýän paýtagtymyz milli binagärligiň hem-de öňdebaryjy halkara tejribesiniň esasynda özgerýär. Hormatly Prezidentimiziň şähergurluşyk maksatnamasyna laýyklykda ata-babalarymyzyň binagärlik senedi beýik sungat derejesine ýetirilýär.

Ak şäherimiz Aşgabadyň ençeme desgalary Ginnesiň rekordlar kitabyna girizildi, olaryň arasynda Türkmenistanyň Döwlet baýdagy, Oguzhan suw çüwdürimler toplumy, “Türkmenistan” teleradioýaýlymlar merkeziniň binasy, Aşgabadyň Halkara howa menzili, “Älem” medeni-dynç alyş merkezi, şol sanda bellenilmäge mynasypdyr. Ak mermer örtükli binalaryň köplügi boýunça gözel paýtagtymyz Aşgabadyň Ginnesiň rekordlar kitabyna girizilmegi türkmen halkymyzyň abraý-mertebesini has-da belende göterdi.

Häzirki wagtda Aziýanyň merjen şäherine öwrülen Aşgabat şäherimiz ak mermerli täsin desgalary we binalary, paýtagtymyza görk berip oturan ajaýyp seýilgähleri bilen haýran galdyrýar. «Ak mermerli Aşgabat» monumenti, «Ylham», «Altyn asyr», «Garaşsyzlyk», «Bagtyýarlyk», «Aşgabat», täze gurlup ulanmaga berlen «Laçyn» medeni dynç alyş seýilgähleri bu gün halkymyzyň gelim-gidimli ýerine öwrüldi.

Arkadagly Serdarymyz raýatlarymyzyň medeniýetli dynç almagynda, şäher gurşawynyň durmuş we ekologiýa üpjünçiligini gurnamakda seýilgähleriň gurluşygyna aýratyn üns berýär. Tanalmaz derejede özgerýän paýtagtymyzyň görküne görk goşýan seýilgähleriň sany barha artýar. Mälim bolşy ýaly, Gahryman Arkadagymyzyň hormatyna «Arkadag» diýlip atlandyrylan täze medeni we dynç alyş seýilgähi dabaraly ýagdaýda açylyp ulanylmaga berildi. Medeni çäreleri geçirmek we dynç almak üçin niýetlenen bu desga 7 gektar meýdany tutýar. Bu seýilgäh «Oguzkent» myhmanhanasy, Senagatçylar we telekeçiler birleşmesiniň we Türkmenistanyň Döwlet ösüş bankynyň dolandyryş binasy bilen özara sazlaşyp gidýär. Bu ýerde milli öwüşginlere beslenen täsin galdyrýan görnüşler özüne çekijiligi bilen tapawutlanýar.

Merkezi girelgede Oguz hanyň sekizburçly ýyldyzy görnüşinde suw çüwdürimleri ikä bölýän sekiz metrlik sagatly diň ünsüňi özüne çekýär. Bu ýerde çagalaryň oýun meýdançalarynyň ikisi hem-de maşgala bolup dynç almak üçin ähli amatlyklar döredilipdir. Belent arka gurluşy bolsa dabaraly çäreleri geçirmek üçin niýetlenip, ol uly meýdançany tutýar. Halkynyň abadan, asuda durmuşda ýaşamagy üçin ähli mümkinçilikleri döredip berýän hormatly Prezidentimiziň şäherimiziň ýaşaýjylary we onuň myhmanlarynyň medeniýetli dynç almaga amatly ýagdaýlary, oňaýly şertleri döretmek barada alyp barýan bimöçber işlerini «Arkadag» seýilgähiniň mysalynda hem aýdyň görýäris.

Ak şäherimiz Aşgabadyň gözelligine gözellik goşýan «Arkadag» seýilgähi paýtagtymyzyň owadan binalary bilen sazlaşyp, täsin gözelligi döredýär. Häzirki wagtda hormatly Prezidentimiziň şähergurluşyk maksatnamasyna laýyklykda, Aşgabadyň täze binagärlik keşbi parahatçylygyň, abadançylygyň we bagtyýarlygyň nyşany hökmünde dünýä nur saçýar.

Indi däbe öwrülen baýramlaryň biri hem 25-nji maýda gözel paýtagtymyzyň nurana keşbini dünýä ýaýýan, onuň ýaşaýjylarynyň we myhmanlarynyň şatlygyna şatlyk goşýan, ýurdumyzda giňden bellenilýän Aşgabadyň güni döwlet derejesinde uly dabara bilen giňden bellenilip geçirilýär. Goý, halkymyzyň buýsanjy merjen şäherimiz Aşgabady ösüşlerden-ösüşlere alyp barýan türkmen halkynyň Milli Lideriniň hem-de Arkadag Prezidentimiziň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Gyzylgül ÖWEZMYRADOWA, 
Türkmen oba hojalyk institutynyň talyby.