Häzirki döwürde ýurdumyzda telekeçileri goldamak, kiçi we orta telekeçiligi has-da ösdürmek ugrunda uly işler amala aşyrylýar. 2008-nji ýylda döredilen Senagatçylar we telekeçiler birleşmesi Türkmenistanyň hususy işewürliginiň 28 müňden gowrak wekilini özünde jemleýär. Birleşme ykdysadyýetiň döwlete degişli bolmadyk bölegini, ýagny hususyýetçiligi ösdürmek, telekeçilik başlangyçlary goldamak hem-de döwrebap işewürlik düzümlerini kemala getirmek boýunça giň gerimli işler alnyp barylýar.

Bilişimiz ýaly, paýtagtymyz Aşgabatda ýerleşýän Söwda-senagat edarasynda Senagatçylar we telekeçiler birleşmesiniň döredilmeginiň 15 ýyllygyna bagyşlanyp mart aýynyň 17 – 23-i aralygynda  sergi geçirilýär.

Sergä Türkmenistanyň Senagatçylar we telekeçiler birleşmesiniň dürli ugurda iş alyp barýan 200-den gowrak agzalary gatnaşýar. Telekeçiler sergide öz önümlerini we gazanan üstünliklerini görkezýärler. Olaryň 15 ýylyň dowamynda gazanan üstünlikleri, mynasyp bolan güwänama we diplomlary barada giňden tanyşdyrýarlar.

Sergide işewür telekeçilerimiziň dürli pudaklara degişli önümlerini görmek mümkin. Meselem, «Talhan» söwda nyşanly çörek we çörek önümleri, «Täze aý», «Balşeker», «Hasar», «Duýgy», «Doganlar ýyldyzy», «Ak gar» haryt nyşanly süýji-köke önümleri, «Tut» haryt nyşanly içgileri, «Ter önüm» hojalyk jemgyýetiniň ýetişdiren gök we miwe önümleri, «Peragat» hojalyk jemgyýetiniň «Nesil» haryt nyşanly gaplanan önümleri we «Eco» haryt nyşanly bir gezeklik gaplary we başgalary mysal etmek mümkin.

Mundan başga-da, sergä «Geljege miras», «Ak gaýa», «Gujurly bilim merkezi», «Aýdyň gijeler», «Derýaplastik», «Sahabatly» hojalyk jemgyýetleri, «Ak hünji» we «Aýbölek» kärhanalary, «Begler ýoly», «Algap», «Çaly» hususy kärhanalary ýaly ykdysadyýetiň dürli pudaklaryndan 200-den gowrak kompaniýalar gatnaşýar.

Sergide işewürleriň halka hödürleýän we eksport edilýän önümlerini, mundan başga-da, telekeçiler tarapyndan daşary ýurtlardan getirilýän dürli hili harytlar görmegiňiz mümkin.

Hususy ulgamda zähmet çekýän her bir raýatymyz döwletimiz tarapyndan goldanylýar. Önümçiligimizi has-da kämilleşdirip, ýurdumyzda mümkin boldugyça importyň möçberini azaldyp, daşary ýurtlardan getirilýän harytlary ýurdumyzda öndürmek üçin öz goşantlaryny goşýarlar.

Mundan başga-da ýurdumyzda öndürilýän önümleri dünýä bazaryna çykaryp, daşary ýurt harytlary bilen bäsdeşlik etmek üçin harytlaryň hilini ýokarlandyrmak maksady bilen dürli önümçiliklerde dyngysyz zähmet çekýärler. Türkmen telekeçileri daşary ýurtlardan getirilýän harytlaryň ornuny tutýan we eksport edilýän önümleriň önümçiliklerini barha işjeň ýola goýýarlar.

Aziza HUDAÝNAZAROWA,
Türkmenistanyň Daşary işler ministrliginiň Halkara gatnaşyklary institutynyň 2-nji ýyl talyby.