Ýakynda Gahryman Arkadagymyzyň ýurdumyzyň bagtyýar ýaşlaryna ajaýyp döredijilik sowgady bolan «Ýaşlara gutlag» atly aýdyma bagyşlanyp, Türkmenistanyň Döwlet medeniýet merkeziniň Mukamlar köşgünde «Gahryman Arkadagymyzyň «Ýaşlara gutlag» eseri — bagtyýar durmuşyň bagt mukamy» atly dabaraly maslahat geçirildi. Onuň dowamynda ýerine ýetirilen aýdym-sazlar bagtyýar ýaşlygyň, ajaýyp döwrümiziň, şanly ýylymyzyň belent waspy bolup ýaňlandy.

Berkarar döwletiň täze eýýamynyň Galkynyşy döwrüniň Arkadag Serdarly bagtyýar ýaşlar ýylynyň al-elwan baharynyň ilkinji günlerinde Gahryman Arkadagymyzyň döreden «Ýaşlara gutlag» atly aýdymy türkmen ýaşlarynyň ak ýolunda pederleriň ak patasy bolup ýaňlandy. Ene-atanyň ýürek duýgusyny özünde jemleýän täze, belent ruhly aýdym bu gün bagtyýar ýaşlaryň ýürekleriniň mähir mukamyna öwrüldi. Milli Liderimiziň ylhamyndan joşup çykan «Ýaşlara gutlag» aýdymy durmuş ýolunyň özboluşly senasyna öwrülmek bilen, ýaşlaryň bagt toýlarynda belentden ýaňlanmaga mynasypdyr. Çünki onda ene-atalaryň ählisiniň kalbyny bir owazda birleşdirýän iň nurana duýgularyň beýany jemlenen.

Milli Liderimiziň her bir eserinde döwrümiziň ruhy joşguny aýdyň duýulýar. Şu ýylyň bosagasynda-da Gahryman Arkadagymyzyň «Dowam bolsun!» atly şygry arzuwlara beslenen täze ýyl aýdymyna, ýürekleriň senasyna öwrüldi. Ol beýik özgertmeleri, ösüşleri bilen taryha zer harplarda ýazylan «Halkyň Arkadagly zamanasy» ýylynyň şanly sepgitleriniň waspnamasy hem-de Arkadag Serdarly bagtyýar ýaşlar ýylynyň ak patasy bolup ýaňlandy. Gahryman Arkadagymyz: «Parasatly ata-babalarymyz nesillere ajaýyp däpleri miras galdyrypdyrlar. Agzybirlik, zähmetsöýerlik, ýaşuly nesle hormat-sarpa goýmak halkymyzyň asyrlarboýy durmuş kadasyna öwrülip geldi. Biziň ýaşlarymyz şol däpleri dowam etdirmelidirler. Ösüp gelýän nesilleri şu ýörelgeler esasynda terbiýelemek hemmämiziň wezipämiz bolmalydyr» diýip sargyt edýär. Milli Liderimiziň atalyk sargytlaryna, nusgalyk göreldesine eýerip, her bir türkmen raýatynyň işde ýa-da durmuşda gazanan we gazanýan üstünligi Watanymyza abraýdyr, şandyr, ýurdumyzyň beýik ösüşlerine goşantdyr.

Adama adamdan gaýry ýakyn dostlaryň, hemralaryň biriniň kitap hasaplanylmagy ýöne ýere däl. Çünki kitap bize ýokary medeniýeti, paýhasly pikirlenmegi, oýlanyşykly hereket etmegi, durmuşda dogry ýoly saýlap almagy öwredýär. Kitap ruhubelent we ynamly ýaşamaga kömek edýär. Türkmen halky ähli döwürlerde kitaba, şahyrlara, ýazyjylara, ylym-bilimli adamlara uly hormat goýup gelipdir. Ajaýyp zamanamyzda bu ýörelge dowamat-dowam bolmak bilen, Gahryman Arkadagymyzyň gymmatly eserleri ýolumyza şamçyrag bolup nur saçýar, milli Liderimiziň kitaplarynyň her biri özüniň many-mazmun taýdan çuňlugy, diliniň çeperligi, okyjy üçin sada hem düşnükli dilde ýazylandygy bilen tapawutlanýar.

Hawa, türkmen halky kitaba hemişe aýratyn gadyr bilen garapdyr. Ata-babalarymyzam ýaş nesilleri kitaplarda öňe sürülýän gymmatlyklaryň üsti bilen terbiýeläpdirler. Häzirki döwürde bolsa ýaşlary watançylyk ruhunda terbiýelemekde, olaryň il-güne, Watana gerekli hem peýdaly, halal adamlar bolup ýetişmeklerinde Gahryman Arkadagymyzyň kitaplary ýol görkeziji şamçyragdyr, görelde mekdebidir, paýhaslar hazynasydyr.

Aýnabat AKMUHAMMEDOWA,
Türkmenistanyň döwlet energetika institutynyň 4-nji ýyl talyby.