Her bir güni taryhy wakalara beslenýän "Arkadag Serdarly bagtyýar ýaşlar" ýylynda paýtagtymyzda Türkmenistanyň Milli Geňeşiniň, ýurdumyzyň jemgyýetçilik wekilleriniň bilelikdäki mejlisiniň ýokary guramaçylykly we uly ruhubelentlik bilen geçirilmegi ýurdumyzda jebisligiň, agzybirligiň nobatdaky dabaralanmasy boldy. Bu döwletli maslahatda kabul edilen taryhy çözgütler watandaşlarymyzyň ýüregini buýsanç duýgularyna gaplady.

Gahryman Arkadagymyzyň Türkmenistanyň Halk Maslahatyny döretmek baradaky başlangyjy il-ulsumyz tarapyndan doly goldanyldy. Şunlukda, Türkmenistanyň Halk Maslahatynyň döredilmegi we watandaşlarymyzyň teklibi esasynda Gahryman Arkadagymyzyň bu halk häkimiýetiniň ýokary wekilçilikli edarasynyň Başlyklygyna bellenilmegi her birimiziň göwün guşumyzy ganatlandyrdy.

Gahryman Arkadagymyzyň ýurdumyzyň döwlet gurluşyny, hukuk ulgamyny kämilleşdirmek, jemgyýetçilik durmuşyny demokratiýalaşdyrmak bilen baglanyşykly öňe süren başlangyçlary ata-babalarymyzyň asyrlaryň dowamynda kemala getiren, adalatlylyga, deňlige, halallyga, ynsanperwerlige ýugrulan, bahasyna ýetip bolmajak tejribesini özünde jemleýär.

Ýurdumyzyň dürli künjeklerinde gurulýan beýik binalar, täze-täze desgalar, ýaşaýyş jaýlary — bularyň hemmesi ykdysady ösüşimiziň örän ýokarydygynyň görkezijisidir. Şeýle ösüşler halkymyzyň bagtyýar durmuşyny üpjün etmäge gönükdirilendir. Garaşsyz, hemişelik Bitarap Türkmenistanda adamyň bagtyýar durmuşy, halkyň abadançylygy baş wezipeleriň biridir. Şu nukdaýnazardan Berkarar döwletiň täze eýýamynyň Galkynyşy döwründe durmuş maksatly beýik işler amala aşyrylýar.

Hormatly Prezidentimiz Serdar Berdimuhamedow şeýle belleýär: «Häzirki döwürde Garaşsyz Türkmenistan öz ösüşiniň täze tapgyryna gadam basdy. Bu döwür «Berkarar döwletiň täze eýýamynyň Galkynyşy» diýlip atlandyryldy. Ösüşiň şu täze döwründe biz öz öňümizde has belent maksatlary goýduk». Ynha, şu belent maksatlaryň her birinde halkymyzyň, eziz Watanymyzyň bähbitlerini görmek bolýar. Ösüşiň döwrebap mümkinçiligini üpjün edýän şeýle döwletli maksatlarda şu günüň we geljegiň esasy ugry kesgitlenendir, ýurdumyzyň ykdysady kuwwatynyň has-da pugtalandyrylmagy göz öňünde tutulandyr.

Milli Liderimiz ýaşlara örän uly ynam bildirýär. Şol belent ynam bu günki gün durmuşymyzyň ähli ugurlarynda aýdyň duýulýar. Şu ýylyň «Arkadag Serdarly bagtyýar ýaşlar ýyly» diýlip atlandyrylmagy şol synmaz ynamyň has-da belent derejä göterilmegidir, ýurdumyzy mundan beýläk-de gülledip ösdürmekde nesillere bil baglanylýandygynyň, olaryň beýik işlerine, uly üstünliklerine garaşylýandygynyň alamatydyr. Bu barada Gahryman Arkadagymyz ýokarda agzalan döwletli maslahatda: «Maksatnamalarda şu ýylda göz öňünde tutulan işler hem köp. Şu ýyly biz ýaşlarymyz bilen baglanyşdyrdyk. Oňa «Arkadag Serdarly bagtyýar ýaşlar ýyly» diýip at berdik. Biz ýaşlarymyzy ýurdumyzyň geljegi hasaplaýarys.

Biziň ösüşlerimiz, ata Watanymyzyň berkararlygy, ýurdumyzyň asudalygy, il-günümiziň abadançylygy ýaşlarymyza baglydyr. Men türkmen ýaşlarynyň bu belent ynamy ödejekdiklerine berk ynanýaryn» diýip nygtady.Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda ägirt uly ösüşler gazanylýar. Öňde durýan maksatlaryň özi hem beýik işlerden, beýik ösüşlerden habar berýär. «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda» getirilen sanlary, öňde goýlan belent wezipeleri bir makalanyň çäginde beýan etmek mümkin däl. Bu beýik işler halkymyzyň bagtyýar geljegini üpjün eder. Şonuň netijesinde ýurdumyzyň ähli künjeginde, welaýatlarda, sebitlerde gazanylýan ösüşleri has-da artdyrar.

Milli Liderimiziň ynamy ýaşlar üçin uly jogapkärçilikdir, şonuň bilen birlikde-de, belent mertebedir! Gahryman Arkadagymyzyň «Döwlet guşy» romanynda belleýşi ýaly, ynam güýçdür, ynam ganatdyr, ynam söýgüdir! Ynam ýaşlaryň maksatly menzillerine ýetmeginde ruhlandyryjy badalga, dogry ýoly salgy berýän çelgidir! Şeýle beýik ynamy ödemekde bu günki gün Arkadagly Serdarymyz ähli türkmen ýaşlaryna nusgalyk görelde bolýar.

Gahryman Arkadagymyzyň ýol-ýörelgesini dowam etdiriji hormatly Prezidentimiz Serdar Berdimuhamedowa belent wezipesinde uly üstünlikleriň ýar bolmagyny arzuw edýäris. Biz bagtly eýýamyň bagtyýar ýaşlary hormatly Prezidentimiziň töweregine berk jebisleşip, ösüşiň täze belentliklerine tarap uly ynam bilen öňe gitmekde baky bitewi güýje öwrüleris, türkmeniň at-abraýynyň, şan-şöhratynyň mizemezdigini tutuş dünýä doldurarys.

«Arkadag Serdarly bagtyýar ýaşlar» ýylynda amala aşyrylýan işleriň ählisi bolsa, Gahryman Arkadagymyzyň we Arkadagly Serdarymyzyň halkymyzyň ýaşaýyş-durmuş şertlerini has-da gowulandyrmak baradaky taýsyz tagallalarynyň netijesidir. Goý, halkyny bagtly geljege alyp barýan türkmen halkynyň Milli Lideriniň hem-de Arkadag Prezidentimiziň janlary sag, ömürleri uzak bolsun! Halk üçin, Watan üçin, eşretli döwür üçin yhlas siňdirip, durmuşa geçirýän tutumly işleri mundan beýläk hem rowaç alsyn!

Ejegül AŞYROWA, 
Türkmenistanyň döwlet energetika institutynyň 1-nji ýyl talyby.