Berkarar döwletiň täze eýýamynyň Galkynyşy döwründe Köpetdagyň gözel künjeginde täze, döwrebap şäher — Arkadag şäheri kemala gelýär. Bu şäheriň aýratynlyklary, onda döredilýän şertler dogrusynda entek kän-kän söhbet ediler. Onda halkymyzyň köňül islegi öz beýanyny tapdy. Çünki bu şäher döwrümiziň Gahryman Arkadagymyzyň irginsiz yhlasynyň, hemişelik üns-aladasynyň ajaýyp miwesidir.

Türkmen topragynyň çar künjegi, şol sanda gadymy Ahal ýaýlasy-da geçen taryhy döwürleriň medeni ösüşleriniň janly şaýadydyr. Geçmişde bu ýerde ýaşan zähmetsöýer ilatyň tebigat bilen ysnyşykly ýaşap, şäherleri, obalary gurandygyny, ýelden ýüwrük atlary ýetişdirendigini welaýatyň çäklerindäki taryhy ýadygärliklerde tapylan tapyndylardan hem görmek bolýar. Bu babatda alym Arkadagymyzyň «Türkmenistan — Beýik Ýüpek ýolunyň ýüregi», «Türkmen medeniýeti» ýaly gymmatly kitaplarynda ylmy taýdan esaslandyrylan mysallar getirilýär. Olarda Türkmenistanyň dürli künjeklerinden, şol sanda merkezi Köpetdagyň eteklerinden awçylyk, balyk tutmak, ir-iýmiş çöplemek, haýwanlary eldekileşdirmek bilen baglanyşykly taryhy tapyndylaryň zähmetiň we paýhasyň gudraty bilen ynsan durmuşyny özgerden ilkinji medeni hadysalardygy beýan edilýär.

Arkadag şäheriniň gurulmagy bilen bagly alnyp barylýan işler şöhratly taryhymyza, merdana pederlerimize goýulýan belent sarpanyň aýdyň nusgasydyr. Biz munuň şeýledigine Milli Geňeşiň Mejlisiniň kararyna laýyklykda «Arkadag şäheri» adynyň berilmegi, onuň çäginde ýerleşýän medeni maksatly desgalara döwletimize, halkymyza wepaly hyzmat eden, syýasy, ykdysady we medeni ösüşlerimize uly goşant goşan meşhur şahsyýetlerimiziň atlarynyň dakylmagy bilen bagly çözgütleriň beýan edilmegi ildeşlerimiziň giň goldawyna mynasyp boldy. Milli Liderimiz Gurbanguly Berdimuhamedowyň ýurdumyzy hemmetaraplaýyn ösdürmekde amala aşyran we aşyrýan işleriniň bimöçberdigini ähli halkymyz bilen birlikde bu gün bütin dünýä ykrar edýär.

Türkmen halkynyň gadymy taryhynyň, özboluşly däp-dessurlarynyň, baý medeni mirasynyň dikeldilýän we çuňňur öwrenilýän, milletiň ruhy taýdan galkynýan zamanynda dürli döwürlerde ýurdumyzy syýasy, durmuş-ykdysady we medeni taýdan ösdürmäge aýratyn uly goşant goşan adamlara uly sarpa goýulýar, olaryň atlary ebedileşdirilýär. Öz Watanyna we halkyna wepaly hyzmat etmegiň ajaýyp nusgasyny görkezen, ähli bilimini, tejribesini ýurdumyzyň gülläp ösmeginiň bähbidine bagyşlan meşhur şahsyýetleriň zähmet we durmuş ýoly şu günki ýaşlar üçin görelde mekdebi bolup hyzmat edýär.

Täze taryhy döwrüň aýdyň nusgasy bolup kemala gelýän Arkadag şäherinde şeýle görnükli şahsyýetlerimiziň atlarynyň ebedileşdirilmegi olara goýulýan hormat-sarpanyň näderejede uludygynyň, döwürlerdir nesilleriň arasyndaky baglanyşygyň mizemezliginiň nyşanydyr. Ýagşy işleri bitiren ynsanlardan diňe ýagşy at galýar. Gahryman Arkadagymyzyň «Dowam bolsun!» atly ajaýyp şygrynyň sözleri bilen aýtsak, uly dünýäni ýaz ýaly ýagşy adamlar bezeýär!

Daýanç ALLANAZAROW,
Türkmenistanyň döwlet energetika institutynyň 3-nji ýyl talyby.