Türkmenistanyň Halk Maslahatynyň Başlygy, türkmen halkynyň Milli Lideri Gurbanguly Berdimuhamedowyň başlangyjy hem-de şäher gurluşygy we binagärlik sungaty babatdaky ýiti zehini bilen Arkadag şäherinde häzirki zaman talaplaryna laýyk enjamlaşdyrylan bilim, saglygy goraýyş, medeniýet edaralary we beýleki binalar gurlup ulanylmaga berilýär.

Arkadag şäherinde milli we häzirki zaman binagärliginiň ösen tejribeleri utgaşdyrylyp, «akylly» şäher konsepsiýasy ýokary derejede durmuşa geçirilýär. Häzirki wagtda täze şäher ägirt uly gurluşyk mekany bolup, ol ýerde şäher häkimliginiň, jemgyýetçilik guramalarynyň, Atçylyk sirkiniň, Atçylyk ylmy-önümçilik merkeziniň, Ruhyýet we Bagt köşkleriniň, kitaphana, drama teatr, muzeý ýaly medeni-aň bilim edaralarynyň, saglygy goraýyş we bilim edaralarynyň, çagalar baglarynyň, şäher derejesindäki kärhanalardyr guramalaryň binalarynyň hem-de köp gatly ýüzlerçe ýaşaýyş jaýlarynyň, durmuş maksatly beýleki desgalaryň gurluşygy tamamlaýjy tapgyrda alnyp barylýar. Bularyň ählisi hormatly Prezidentimiziň: «Biz beýik işlerimizi Watanymyza bolan söýgimiz bilen amala aşyrýarys. Gaýratly zähmetimiz bilen Watanymyzyň beýikligini has-da şöhratlandyrýarys» diýen sözlerinden ruhlanyp, halkymyzyň abadan we bagtyýar durmuşda ýaşamagynyň, ýurdumyzyň mundan beýläk-de gülläp ösmeginiň hatyrasyna halk bähbitli özgertmeleriň üstünlikli durmuşa geçirilýändigini görkezýär.

Ata-babalarymyzyň şöhratly pederlerimize sarpa goýmak, ösüp gelýän ýaş nesli ata Watanymyza buýsanç ruhunda terbiýelemek, ýaşlaryň ruhubelent we sagdyn bedenli bolup ýetişmekleri baradaky wesýetlerine wepaly bolup, ýurdumyzyň bilim, ylym, saglygy goraýyş, medeniýet ulgamlaryny ösdürmekde bitiren hyzmatlaryny hem-de Ahal welaýat häkimliginiň towakganamasyny, Türkmenistanyň Ministrler Kabinetiniň teklipnamasyny göz öňünde tutup, «Döwlet kärhanalaryna, guramalaryna, edaralaryna, geografik we beýleki obýektlere at dakmagyň we olaryň adyny üýtgetmegiň tertibi hakynda» Türkmenistanyň Kanunyna laýyklykda, Türkmenistanyň Milli Geňeşiniň Mejlisi täze, döwrebap edara ediş merkezinde gurlan bilim, saglygy goraýyş, medeniýet edaralaryna we sungat binasyna halkyň ykbalynda abraýly yz galdyran taryhy şahslaryň adyny dakmak hakda karar kabul etdi.

Milli Geňeşiň Mejlisiniň kabul eden karary esasynda, çagalar sagaldyş-dikeldiş merkezine Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedowyň adyny dakmak, merkezi seýilgähdäki belent sungat binasyna döwrümiziň görnükli syýasatçysy, türkmen halkynyň beýik Ogly Gurbanguly Berdimuhamedowyň — Gahryman Arkadagymyzyň adyny dakmak we mundan beýläk ony «Arkadag Binasy» diýip atlandyrmak, Halkara atçylyk ýokary okuw mekdebine Aba Annaýewiň, Ahal welaýat mugallymçylyk orta hünär okuw mekdebine Berdimuhamet Annaýewiň, lukmançylyk orta hünär okuw mekdebine Saçly Dursunowanyň, Ahal atçylyk sirkine türkmen halkynyň milli gahrymany Göroglynyň, welaýat kitaphanasyna Döwletmämmet Azadynyň, drama teatryna Aman Gulmämmedowyň, ýörite sungat mekdebine Sahy Jepbarowyň, çagalar sungat mekdebine Şükür bagşynyň adyny dakmak bellenildi.

Arkadag şäheri täze döwrüň nusgalyk şäheridir. Şonuň üçinem, Arkadag şäheriniň geljekki ýaşaýjylary hem bagtdan paýly ynsanlardyr. Halkymyzyň bagtyýar, eşretli durmuşyny nazarlaýan asyrlara barabar işleri amala aşyrýan Gahryman Arkadagymyzyň, Arkadagly Serdarymyzyň janlary sag, ömürleri uzak bolsun!

Annamuhammet ÇARYÝEW,
Türkmen oba hojalyk institutynyň Buhgalterçilik hasaba alnyşy we audit taýýarlyk ugrunyň 2-nji ýyl talyby.

Mekan ATAÝEW,
Türkmenistanyň döwlet energetika institutynyň 1-nji ýyl talyby.