Türkmenistanyň Prezidenti Serdar BERDIMUHAMEDOW:
— Biz beýik işlerimizi Watanymyza bolan söýgimiz bilen amala aşyrýarys.

Berkarar döwletiň täze eýýamynyň Galkynyşy döwründe ýurdumyz durmuş-ykdysady ösüşlerinde ynamly ädimler bilen öňe barýar. Ykdysady ulgamda ýetilýän belent sepgitler adam bähbitlerine gönükdirilen durmuş maksatnamalaryny üstünlikli amala aşyrmaga mümkinçilik berýär. Durmuş ulgamyny nazarlaýan ykdysady ösüş, ilkinji nobatda, ilatyň ýaşaýşynyň hiliniň ýokary derejesini üpjün etmäge gönükdirilendir.

Gahryman Arkadagymyzyň başlangyjy bilen ýurdumyzda iri möçberli şähergurluşyk taslamalary üstünlikli durmuşa geçirilýär. Olara mysal hökmünde paýtagtymyzda we welaýat merkezlerimizde gurlan ýaşaýyş jaý toplumlaryny, edara binalaryny görkezmek bolar. Ahal welaýatynyň täze, döwrebap edara ediş merkeziniň gurulmagy, Türkmenistanyň Milli Geňeşiniň Mejlisiniň karary bilen «Arkadag şäheri» diýlip atlandyrylmagy halkymyzyň häzirki zaman oňaýlyklarynyň hözirini görüp ýaşamagy, netijeli zähmet çekmegi, okamagy we göwnejaý dynç almagy üçin edilýän yzygiderli aladalaryň netijesidir. Arkadag şäheri diňe bir Türkmenistanda däl, eýsem tutuş sebitde ilkinji «akylly şäher» bolar. Täze şäheriň yşyklandyryş ulgamy, ýol-ulag düzümleri, merkeziň ekologik derejesiniň üpjün edilmegi bilen baglanyşykly täze taslamalar dünýä nusgalykdyr.

Arkadag şäheriniň desgalar toplumy häzirki zaman köpugurly we rahat ýaşaýyş gurşawyny emele getirýär. Döwrebap edara ediş merkezinde täze tehnologiýalar işjeň ornaşdyrylýar. Döwür bilen aýakdaş gitmekde durmuş we ykdysady taýdan ösüş möhüm şert bolup durýar. «Akylly şäherler» bu ösüşleriň ählisini özünde jemleýär. Durmuşa ornaşdyrylýan innowasion taslamalar, olaryň gurluşygynda ulanylýan iň häzirki zaman tehnologiýalary ýurdumyzyň maliýe-ykdysady, aň-bilim, ylmy-tehniki kuwwatynyň uly mümkinçiliklerini görkezýär.

Dünýä derejesinde bäsleşmäge ukyply şäherleriň döredilmegi ýurdumyzyň täze belentliklere we dünýäniň gazananlaryna ymtylýandygyna aýdyň şaýatlyk edýär. Şunuň bilen birlikde, täze şäherde ýerleşýän binalara meşhur şahsyýetlerimiziň atlarynyň dakylmagy ösüp gelýän ýaş nesilleriň watansöýüjilik, halallyk, adamkärçilik ruhunda terbiýelenmekleri babatda wajyp çözgütdir diýip aýtmak bolar. Hususan-da, mugallym, esger, ilhalar ynsan, Gahryman Arkadagymyzyň atasy Berdimuhamet Annaýewiň, meşhur seýis, atşynas Aba Annaýewiň atlarynyň şäherdäki binalardyr desgalara dakylmagy bu beýik ynsanlara halkymyzyň bagtyýar, abadan durmuşy ugrunda görkezen gaýratlaryna, yhlaslaryna nesiller tarapyndan belent sarpa goýulýanlygyndan nyşandyr.

Täze edara ediş merkezi enjamlaşdyrylan edara binalaryny, bilim-terbiýeçilik, medeni ojaklaryny, döwrebap ýaşaýyş jaýlaryny öz içine alýar. Amala aşyrylýan işlerde milliligiň şöhlelendirilmegi şäheriň sazlaşykly keşbini emele getirýär. Şäherde ýaşaýyş jaýlarynyň, edaralaryň töwereginde, köçelerde howpsuzlygy üpjün etmek üçin «akylly» wideogözegçilik ulgamlary, awtoulaglaryň hereketiniň sazlaşygyny üpjün edýän döwrebap ýolyşyklar guralýar. Dünýäniň elektroawtobuslary, elektromobilleri, bu ulaglaryň tehniki häsiýetnamalary hem-de olaryň deslapky zerur sany öwrenildi. Munuň özi durmuş üpjünçilik ulgamlarynyň bökdençsiz işlemeginde öz beýanyny tapar. Şeýle-de, bu ýerdäki gök zolaklar, seýilgähler şäher gurşawy we onuň tebigy aýratynlyklary bilen utgaşýar. Täze merkeziň amatlyklary we artykmaçlyklary Arkadag şäherini dünýäniň iň gözel şäherleriniň birine öwürmäge mümkinçilik berýär.

Arkadag şäheri türkmen binagärliginiň kämil nusgasydyr. Arkadag şäheri Gahryman Arkadagymyzyň döredijilikli işiniň, zehininiň miwesidir. Nesip bolsa, ýurdumyzy özgerdýän beýik işleriň aýrylmaz bölegine öwrülen Arkadag şäheri asyrlara ýaň salar. Ol diňe bir mertebeli türkmen halkynyň diliniň senasy bolman, dünýäniň dilinde hem ýatdan çykmajak aýdyma öwrüler.

Halkymyzyň durmuşyna gönükdirilen bu beýik özgertmeleri amala aşyrýan Gahryman Arkadagymyzyň, Arkadagly Serdarymyzyň janlary sag, belent başlary aman, il-ýurt bähbitli döwletli işleri rowaçlyklara beslensin! Çawy dünýä ýaýran Arkadag şäherimiziň dowamaty dowam bolsun!

Hudaýnazar GURBANGELDIÝEW, 
Türkmenistanyň döwlet energetika institutynyň 3-nji ýyl talyby.