Mukaddeslikler birleşende ýurduň binýady pugtalanýar, beýik maksatly işler has-da dabaralanýar. Türkmenistanyň Döwlet baýdagy – ýurduň özbaşdaklygyny, özygtyýarlygyny, asudalygyny, halkyň agzybirligini, jebisligini, binýadynyň berkligini, mizemezligini aňladýan mukaddes resmi nyşandyr. Garaşsyz, baky Bitarap Türkmenistanyň Konstitusiýasy bolsa, halkyň agzybirliginiň, erkinliginiň, milli garaýşynyň we ruhy gymmatlygynyň mizemez girewidir. Garaz, bu goşa mukaddeslik bir bitewi jandyr, göwredir.

Ol mukaddeslikler halkymyzyň şöhratly taryhydyr, buýsançly şu günüdir, bagtyýar ertiridir. Çünki, bu günki gün ýurdumyzda goşa baýram – goşa toý hökmünde toýlaryny uludan tutýan mukaddesliklerimize halkymyzyň ar-namysy, lebiz-ygrary, Watana, türkmen topragyna söýgüsi, beýik işlere rowaçlygy, gahryman peder ruhlaryna belent sarpasy siňendir. Bütin halkymyzyň baky buýsanjyna öwrülen ýaşyl Baýdagymyz hem mundan 35 ýyl öň Garaşsyz Türkmenistanyň Döwlet Baýdagy ynsanperwerligi, watansöýüjiligi, ruhubelentligi terbiýeleýän döwlet nyşanlarynyň biri hökmünde belentde pasyrdady.

Aslynda türkmen Tuguny ar-namysyny goraýşy dek gorapdyr. Oguz han Türkmen döwründe-de Tugy götermek, alyp gitmek gabat gelen, adama ynanylmandyr. Tug götermek uly dereje bolansoň, ol gaýratly, edermen, abraýly adamlara ynanylypdyr. Söweşlerde Tug hemmeleriň gözüniň alnynda pasyrdapdyr. Tuguň pasyrdysy goşunyň ruhuna aýratyn täsirini ýetiripdir. Bu günki gün ýalkymy dünýä düşýän mukaddes Garaşsyzlygymyzyň we baky Bitaraplygymyzyň synmaz nyşanyna öwrülen ýaşyl Tugumyz bilen baglanyşykly taryhy çeşmelerde öz mynasyp ornuny tapan şu günler hem Baýdagymyzyň hemişe eý görlüp gelnendigine şaýatlyk edýär.

Ir wagtlarda bir serkerdebaşy öz goşunyndaky baýdak göteriji esgerini ýanyna çagyryp: «Sen indi garradyň, goşuna eýermersiň, öňümizde bolsa uly söweşler ýatyr. Baýdagy indi başga birine ynanaýsak nähili bolar?!»  diýip, oňa ýüzlenipdir. Onda esger serkerdebaşysyna garap: «Ýok, meniň ellerimi baýdak götermekden mahrum etme! Indi garrylyk hem ýetişip gelýär. Ýöne, ýaşymyň soňunda onuň abraýyny alaýyn. Men onuň bilen soňky damja ganyma çenli duşmanlara garşy söweşesim, onuň astynda ýeňşe ýetesim gelýär!» – diýipdir. Serkerdebaşy şonda oňa minnetdarlyk terzde baş atyp: «Söweşde siziň ýaly mert, goç ýigitlerimiz, ynamdar adamlarymyz arkamda dag ýaly il-günüm bolsa şu baýdagymyz bize diňe üstünlik, ýeňiş getirer!» – diýipdir.

Halkymyzy şu eşretli  döwre-döwrana ýetiren hormatly Prezidentimiziň: «Döwlet Baýdagymyz biziň milli guwanjymyzdyr, şatlygymyza şatlyk, ruhumyza ruh goşýan, täze galkynyşlara, beýik ýeňişlere galkyndyrýan egsilmez ruhy güýçdür» diýip buýsanç bilen aýdýan sözlerinde bolsa, bu günki gün ýalkymy dünýä düşüp, Ýer ýüzüne nur saçýan ýaşyl Tugumyza bolan uly buýsanç, çäksiz söýgi bar.

Berkarar döwletimizde yglan edilen 2026-njy — «Garaşsyz, baky Bitarap Türkmenistan — bedew batly at-myradyň mekany» ýylynda amala aşyrylýan işleriň ählisi bolsa, Gahryman Arkadagymyzyň we Arkadagly Gahryman Serdarymyzyň halkymyzyň ýaşaýyş-durmuş şertlerini has-da gowulandyrmak baradaky taýsyz tagallalarynyň netijesidir. Goý, halkyny bagtly geljege alyp barýan türkmen halkynyň Milli Lideriniň hem-de Arkadag Prezidentimiziň janlary sag, ömürleri uzak bolsun! Halk üçin, Watan üçin, eşretli döwür üçin yhlas siňdirip, durmuşa geçirýän tutumly işleri mundan beýläk hem rowaç alsyn!

Gülbahar NAZAROWA,
Türkmenistanyň Telekommunikasiýa we informatika institutynyň Menejment we innowasiya tehnologiýalary kafedrasynyň öwreniji mugallymy.