Arkadagly Serdarymyzyň: «Biz berkarar döwletimiziň dünýä giňişliginde diňe bir ýokary ykdysady kuwwaty bolan ýurt hökmünde belli bolman, eýsem, ruhy we döredijilik babatda hem ýokary kuwwatly mümkinçilikleri bolan ýurt hökmünde ykrar edilmegini gazanmalydyrys» diýip bellemegi bolsa, aň-bilim, medeni babatda uly işleriň yzygiderli dowam etdiriljekdigine şaýatlyk edýär. Her bir işde tejribäniň, yhlasyň, başarnygyň aýratyn ähmiýetini nygtaýan Gahryman Arkadagymyzyň döredijiligi biziň üçin ägirt uly durmuş mekdebi bolup, çuňňur paýhasa ýugrulan ajaýyp eserleri halkymyzyň medeni hazynasynyň baýlygyna öwrülýär.

Gahryman Arkadagymyzyň halkymyza peşgeş eden «Ömrümiň manysy» atly ajaýyp kitaby hem many-mazmun, akyl-parasat, öwüt-ündew babatda gymmaty egsilmez baýlyk bolup, giň okyjylar köpçüligi tarapyndan gyzgyn garşylandy. Gahryman Arkadagymyz bu kitabynyň girişinde onuň many-mazmunyny açyp görkezip, «Şeýlelikde, milli kada-kanunlarymyz, döwletliligimiz bilen bagly, biziň bütin dünýäde ykrar edilen Garaşsyz, hemişelik Bitarap döwletimiziň ösüşleri bilen bagly hökman aýtmaly sözlerim bar. Şonuň üçin bu kitaba milli ýol-ýörelgämiziň, däp-dessurlarymyzyň, dinimiziň kökleriniň juda çuňdugy, has gadymy döwürlerden gaýdýandygy baradaky pikirlerimi girizdim. Dünýewi döwletimizde milli ýol-ýörelgämizi gaýtadan dikeldýändigimiz, berkidýändigimiz, juda aýawly, päkize saklaýandygymyz, ruhy gymmatlyklarymyzyň sarpasynyň belentdigi baradaky garaýyşlarymy beýan etdim» diýip, kitabyň nähili uly giňişlikleri öz içine alýandygyna we onda giň okyjylar köpçüligini gyzyklandyrýan meseleleriň gozgalýandygyna ünsi çekýär.

Kitabyň bölümleriniň «Ýaşaýyş medeniýeti», «Ynanç hakynda söz», «Müňýyllyklaryň jümmüşinden gaýdýan ýol-ýörelge», «Gadymyýete nazar», «Mukaddes Mekge-Medinä zyýarat», «Milletiň ruhy-ahlak mekdebi» diýlip atlandyrylmagy hem onuň nähili taryhy giňişliklere, pähim-parasat çuňluklaryna aralaşýandygyna göz ýetirmäge mümkinçilik berýär.

Kitabyň eýýäm «Ýaşaýyş medeniýeti» diýlip atlandyrylýan birinji bölümini okap başlanyňdan halkymyzyň asyrlarboýy kemala getiren ruhy-ahlak ýörelgeleri özüniň ähli arassalygy, kämilligi bilen ör-boýuna galýar. Halkymyzyň asylly terbiýe mekdebini öz süňňüne ornadan «Ýagşy ene ýagşy gyza görelde», «Ata ogly ata çeker», «Atany söýen Watany söýer», «Enem-atam — şirin dilli ussadym», «Ene-atany horlanyň dony otdan bolarmyş» diýen ýaly atalar sözleri kalbyň jümmüşine aralaşyp, türkmen halkynyň ahlak ýörelgeleriniň onuň özi ýaly agras hem asyllydygyna şaýatlyk edýär.

Gahryman Arkadagymyz özüniň köpýyllyk iş tejribesine we ynsan häsiýetiniň çuňluklaryna akyl ýetirýän ýiti paýhasyna daýanyp, durmuş meselelerinden we her bir ynsanyň öňünde keserýän kynçylyklardan baş alyp çykmak üçin tutanýerliligiň hem-de maksadaokgunlylygyň zerurdygyny nygtaýar. Gahryman Arkadagymyzyň: «Haýsydyr bir zady ýüregiňe berk düwseň, maksat edinseň, bu ugurda tagallaňy gaýgyrmasaň, ýetilmejek menzil ýok. Munuň şeýledigini durmuşda kän gördüm. Dürli ynsan ykballaryny synlamak arkaly, bu barada özümçe netije çykardym» diýip ýazmagy, biziň her birimize tutanýerliligi, öz işimize yhlasly ýapyşmagy öwredýär hem-de ynsanyň durmuş tejribesiniň, geçen ömür ýolunyň uly mekdep bolup durýandygyny görkezýär.

Gahryman Arkadagymyzyň «Ömrümiň manysy» atly täze kitaby sözüň doly manysynda ahlak hem-de durmuş mekdebi bolup durýar. Onuň halkyň taryhyndan we hakydasyndan gözbaş alyp gaýdýan paýhas çeşmesi teşne kalplary gandyrýar. Goý, Gahryman Arkadagymyzyň hem-de Arkadagly Serdarymyzyň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Alişer IŞMATOW,
Türkmenistanyň döwlet energetika institutynyň 1-nji ýyl talyby.