Garaşsyz, baky Bitarap Türkmenistanyň şaýolly taryhynda harby, durmuş-ykdysady we medeni-ruhy ösüşler yzygiderli täze basgançaklara göterilýär. Biziň mukaddes Watanymyzda her bir ýyly döwrebap, çeňňekli we çeňňeksiz mazmun bilen şöhlelendirmek, milli buýsanjymyzy arşyň belentliklerine galdyrmak asylly ýörelgä öwrüldi. Şoňa görä-de, 2026-njy ýylyň “Garaşsyz, baky Bitarap Türkmenistan - bedew batly at-myradyň mekany” diýlip yglan edilmegi, berkarar döwletimiziň galkynyşly ýoluny, arzuw-umytlarymyzyň amala aşýan beýik eýýamyny aňladýan taryhy waka boldy. Bu şygar halkymyzyň köpasyrlyk milli gymmatlyklaryny, bedew ata bolan keramatly sarpasyny we geljege bolan uly ynamyny özünde jemleýär.

Türkmen halky üçin Ahalteke bedewi diňe bir jandar däl, eýsem dostlugyň, wepalylygyň, belent maksatlara okgunlylygyň we döwletlilik ýolunyň beýik nyşanydyr. At - türkmeniň ganaty, hyýaly we myradydyr. Şonuň üçin hem täze ýylyň adynda “bedew batly” we “at-myradyň mekany” diýen mukaddes düşünjeleriň utgaşmagy tötänden däldir. Ol berkarar döwletimiziň halkara giňişlikdäki at-abraýynyň, ykdysady kuwwatynyň we jemgyýetçilik agzybirliginiň bedew bady bilen öňe gitýändigini aýdyň görkezýär. Ýylyň adynda “Garaşsyz, baky Bitarap” düşünjeleriniň bellenilmegi bolsa, biziň baş syasy binýadymyzy täzeden dabaralandyrýar. Bitaraplyk ýörelgesi Türkmenistanyň daşary syyasatynda parahatçylygy, birek-birege hormat goýmagy we hojalyk-ykdysady hyzmatdaşlygy ilerletmegiň durnukly guralydyr. Bu ýylyň çäklerinde amala aşyrylmagy meýilleşdirilýän giň göwrümli çäreler milli Garaşsyzlygymyzyň hem-de baky Bitaraplygymyzyň miwelerini has-da dabaralandyrmaga gönükdirilendir.

2026-njy ýyl Türkmenistanyň sanly ykdysadyýetini, senagatyny we ylym-bilim ulgamyny döwrebaplaşdyrmakda uly sepgitlere ýetýän döwrüne gabat geldi. Ýurdumyzyň ähli sebitlerinde, aýratyn hem Arkadag şäherinde we paýtagtymyz Aşgabatda innowasion tehnologiýalaryň, “akylly” çözgütleriň giňden ornaşdyrylmagy Türkmenistanyň hakykatdan hem täze eýýamyň beýik gurluşyk meýdançasyna öwrülendigini tassyklaýar. Döwrebap senagat toplumlarynyň, sanly bilimiň, saglygy goraýyş ulgamynyň we ulag-logistika geçelgeleriniň batly depginler bilen ösdürilmegi ýurdumyzyň ykdysady kuwwatyny artdyrmak bilen bir hatarda, ilatyň ýaşaýyş-turmuş şertlerini durnukly ýokarlandyrýar. Bedew badyna deňelýän bu ösüşler, her bir raýatyň Watana bolan söýgüsini we zähmet hyjuwyny artdyrýar.

Ahalteke atçylyk sungatynyň, bedewleri köpeltmegiň we milli atşynaslyk mekdepiniň kämilleşdirilmegi döwlet syýasatymyzyň iň möhüm ugurlarynyň biridir. 2026-njy ýylda milli mirasymyzy, milli oýunlarymyzy we şanly taryhymyzy öwrenmek hem-de baýlaşdyrmak boýunça belent sepgitler bellenilýär. Ahalteke bedewiniň gözelligi we ýyndamlygy dünýä medeniýetiniň altyn gaznasyna girip, Türkmenistanyň halkara abraýyny bütin dünýäde dabaralandyrýar. Bu şanly ýyl ýaş nesiller üçin hem uly mekdepdir. Ýaşlary watançylyk, agzybirlik, halal zähmet we milli gymmatlyklara hormat goýmak ruhunda terbiýelemekde 2026-njy ýylyň şygary doly ganat berýär. Ýaşlarymyz mukaddes Watana bolan söýgüsini ylymda, sportda, medeniýetde we zähmetde gazanan uly üstünlikleri bilen subut edýärler.

Türkmenistan diňe bir gözelligiň we bedewleriň mekany bolman, eýsem parahatçylygyň, abadanlygyň we arzuwlaryň hasyl bolýan ýurdudyr. “At-myradyň mekany” diýmek, her bir raýatyň ýagşy niýetleriniň, arzuw-umytlarynyň we mukaddes maksatlarynyň amala aşýan Watany diýmekdir. Jemläp aýtsak, “Garaşsyz, baky Bitarap Türkmenistan - bedew batly at-myradyň mekany” diýen şygar astynda geçýän 2026-njy ýyl Gahryman Arkadagymyzyň hem-de Arkadagly Gahryman Serdarymyzyň ýolbaşçylygynda halkymyzyň agzybirligini, Watana bolan çänsiz söýgüsini we beýik geljege bolan durnukly ynamyny özünde jemleýän taryhy ýyl hökmünde eziz Watanymyz Türkmenistanyň şanly taryhyna altyn harplar bilen ýazylar.

Gülşat HOJAMOWA,
Döwletmämmet Azady adyndaky Türkmen milli dünýä dilleri institutynyň terjimäniň nazaryýeti we amalyyeti kafedrasynyň mugallymy.