Bahar - ýaşaýşyň, ömrüň başlangyjy! Köňülleriň soltany bahar! Eýsem seniň waspyňy etmedik, seniň gül-gülälekli mahmal ýaýlalaryňa, ýaşyl maýsalaryňa, hoştap howaňa, mymyk ýelleriňe melul bolmadyk adam barmyka?! Pasyllaryň soltany hasaplanylýan baharyň gelmegi bilen, bu barlykda oýanyş, direliş başlanýar. Güllere bark bolup oturan türkmen sährasy! Sen şu pursat nähili gözel, nähili ajaýyp! Belki, seniň ynsan göwni bilen beýik sazlaşygyň öz dünýäň bilen biziň dünýämize bolan mahalyň bolup geçýändir. Ýumruk ýaly ynsan göwni nähilii mert, kuwwatly hem bolsa, ol duýga gezek gelende ejizdir. Belki, şonuň üçin bolsa gerek, seniň ala-baharlaryň ynsanlaryň hersini bir ahwala salýar.

Baglarda agaçlar pyntyk ýaryp, täzeden döreýiş döwrüni başdan geçirýän tebigatyň uzyn taryh gatynda ýene bir täze sahypa ýazylyp başlanýar. Ol taryh gatlaryna tebigat gözelliklerinden ruhlanan raýatlaryň ýagşy amallary, eden sogap işleri, birek-birege bolan söýgüsi bahar bägülleri bilen ýazylýar. Baharyň gelmegi bilen giň ýazylyp ýatan sähralar, gür baglar, dag-dereler ýaşyl reňke boýalyp, üstünde keşde çekilen mysaly açylan güller gözleri gamaşdyrar. Baglarda guşlaryň mahmal owazy, hoşboý ysyny dünýä ýaýýan älemgoşar mysaly gülleriň üstüne kebelekleriňdir bal arylarynyň gonmagy, säheriň mymyk howasy bahar buşlukçylary.

Bahar pasly kebeleklere meňzeş. Kebelegiň bir özünde barlygyň ýedi reňki janlanan. Baharyň älemgoşarynda hem hut şu reňkler jemlenen. Ol reňkler üýtgeşik sazlaşygy we täsirliligi bilen ynsanda ýaşaýşa bolan mukaddes söýgini döredýär. Bu söýgini joşduryp, öz yşkynda däli-diwana öwürýär. Kebelek ýagyş-ýagmyrlardan soň peýda bolýar. Bahar hem ýagyşdan soň öz görküni açýar. Baharda erikleriň, şetdalydyr almalaryň owadan reňbe-reň gülleri, ýaşyl maýsalaryň jana şypaly ysy bark urýar. Şol pursat bolsa ýüreklerimiz joşgundan, ylhamdan, hyjuwdan püre-pürlenýär. Baharda ýazlaga çykmak, hiňňildikde göwün solpuňy çykaryp uçmak, owlak-guzularyň arasynda şolar bilen deň bökjekleşýän körpejeleriň şat owazlaryny diňlemek, säher-sabada semeniniň ýüzündäki Äşe bilen Patmanyň el yzlaryny görüp arzuw etmek, läle kakmak, küşt depmek uly bagt. Bularyň ählisi bahar paslynyň ynsana bagyş edýän şatlyklary.

Dünýäde iň gowy zatlary, iň näzik zatlary bahara deňeýärler. Güller hem baharyň bezegi. Ol şeýle näzik, naşyja başlary bilen yhlas ede-ede ene Ýeriň gaýmagyny serpäge-de, ýagty ýalança inýärler. Şeýdibem, Zeminiň synasyna gül lybasy bolup ýapylýarlar. Bu gün gök dona büürenen goja Zeminiň ajaýyplygyny türkmen zenanlarymyzyň kalby ýaly, kaddy-kamaty deýin dünýäni has-da nurlandyrýar. Tenekär türkmen topragyny ýaşyl begrese büräp, onuň süňňüne dirilik suwuny siňdirip, ýaşaýşyň, diriligiň, ylahy gözelligiň nusgasy bolup gelen ýazda ynsan göwni galkynyp, onuň ruhy täzelenýär. Ol kalby perzentlerine yssy mähirden doly eneler mysaly tutuş dünýäni ala-ýaz edip bilýär. Türkmen topragynyň kesewi dürtseň gögerýän bereketli topragynda, abraý-şan getirjek maýsaly meýdanlarynda diriliş başlandy, Ýeriň ýüzüni läle-reýhan gül-çeçekden nagyşlap bezelýär.

Ynsan elmydama gözellige teşne. Ýöne suwsan çagyň ähli suwuň seni gandyrmaýşy ýaly, pasyllaryň ählisi-de teşne kalby gandyryp duraýanok. Ýöne, bahar gadam goýanda welin, diňe ynsanyň däl, goja tebigatyňam gursagy ýarylara gelýär. Çünki, baharyň gelmegi bilen ýaşyl ýaýlalarda türkmeniň ak öýleri dikilip, toý gazanlary goşadan atarylýar. Bahar täzelenişiň, arzuw-maksatlara ýetmegiň pasly. Arly gyşyň sowugyndan soň, gülüp bakan Gün nuruna diňe bir bedenimiz däl, eýsem, ýüregimiz hem joşýar. Hiç bir ynsanyň hereketsiz oturasy gelmeýär. Köňül tebigaty küýseýär. Säher dogan Güne salam berip gördüňizmi? Halkymyzda «säher salamy» diýen söz bar. Her gün älemi ýagtyldyp duran Güne seredip, Säher salamy ynsan bilen tebigaty has hem jebisleşdirýär. Tebigat ynsana ajaýyplyklary bagyş edýär. Täze pikirler, täzeçe meýilnamalar döwri, jemgyýeti ösdürmäge ruhlandyrýar.

Gülşirin GURJANOWA,
Türkmenistanyň inžener-tehniki we ulag kommunikasiýalary institutynyň Ulaglar fakultetiniň Suw ulagynyň ulanylyşy kafedrasynyň mugallymy.