Türkmen halkynyň Milli Lideri, Türkmenistanyň Halk Maslahatynyň Başlygynyň Mongoliýanyň Prezidenti bilen duşuşygy

Düýn türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýurdumyza döwlet sapary bilen gelen Mongoliýanyň Prezidenti Uhnaagiýn Hurelsuh bilen duşuşdy.

Gahryman Arkadagymyz belent mertebeli myhmany myhmansöýer türkmen topragynda mähirli mübärekläp, dostlukly ýurduň Baştutanynyň Türkmenistana amala aşyrýan döwlet saparynyň çäklerinde Magtymguly Pyragynyň doglan gününiň 300 ýyllygyna bagyşlanan halkara foruma gatnaşmagynyň iki ýurduň arasyndaky gatnaşyklary medeni-ynsanperwer ugurda has-da ösdürmäge itergi berjekdigine ynam bildirdi.

Mongoliýanyň Prezidenti häzirki wagtda iki ýurduň arasyndaky dostlukly gatnaşyklaryň açyklyga, birek-birege hormat goýmaga we düşünişmäge esaslanýandygyny aýdyp, bu saparyň ikitaraplaýyn hyzmatdaşlygyň ösdürilmeginde möhüm ähmiýete eýe boljakdygyny belledi.

Nygtalyşy ýaly, biziň ýurtlarymyz diňe bir ikitaraplaýyn däl, eýsem, abraýly halkara guramalaryň çäklerinde-de netijeli hyzmatdaşlyk edýärler. Mongoliýanyň Birleşen Milletler Guramasynyň Baş Assambleýasynda Türkmenistanyň öňe süren başlangyçlaryna awtordaş bolup çykyş etmegi hem munuň aýdyň mysalydyr.

Söhbetdeşler söwda-ykdysady hyzmatdaşlyk meselelerine ünsi çekip, bu ugurda ikitaraplaýyn dialogy ösdürmek üçin giň mümkinçilikleriň bardygyny bellediler. Şunuň bilen baglylykda, söwda-ykdysady gatnaşyklaryň çäklerinde ýangyç-energetika, ulag-aragatnaşyk, oba hojalygy ýaly pudaklarda özara bähbitli gatnaşyklary işjeňleşdirmegiň maksadalaýyk boljakdygy aýdyldy.

Gahryman Arkadagymyz iki ýurduň arasynda medeni-ynsanperwer, ylym-bilim, sport, syýahatçylyk ugurlarynda hyzmatdaşlygy mundan beýläk-de ösdürmek üçin ägirt uly mümkinçilikleriň bardygyny nygtap, Türkmenistan bilen Mongoliýanyň dostlukly gatnaşyklarynyň bilelikdäki tagallalaryň netijesinde iki ýurduň halklarynyň bähbidine mundan beýläk-de ösdüriljekdigine berk ynam bildirdi.

Duşuşygyň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow hem-de Mongoliýanyň Prezidenti Uhnaagiýn Hurelsuh birek-birege berk jan saglyk, bagtyýarlyk, döwlet işlerinde uly üstünlikleri, iki ýurduň dostlukly halklaryna bolsa parahatçylyk, abadançylyk, gülläp ösüş arzuw etdiler.

Türkmen halkynyň Milli Lideri, Türkmenistanyň Halk Maslahatynyň Başlygy Ermenistan Respublikasynyň Prezidenti bilen duşuşdy

Düýn türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Ermenistan Respublikasynyň Prezidenti Waagn Haçaturýan bilen duşuşdy.

Gahryman Arkadagymyz beýik türkmen şahyry we akyldary Magtymguly Pyragynyň doglan gününiň 300 ýyllygyna bagyşlanyp geçirilýän halkara foruma gatnaşmak üçin ýurdumyza gelen belent mertebeli myhmany mübärekläp, bu wakanyň diňe bir döwletleriň däl, eýsem, abraýly halkara guramalaryň hem ünsüni çekendigini belledi.

Türkmen halkynyň Milli Lideri ikitaraplaýyn gatnaşyklar barada aýdyp, Türkmenistanyň köp ýyllaryň dowamynda Ermenistan Respublikasy bilen möhüm ugurlarda üstünlikli hyzmatdaşlyk edip gelýändigini kanagatlanma bilen belledi. Prezident Waagn Haçaturýan Aşgabada gelmäge we halkara foruma gatnaşmaga çakylygy üçin tüýs ýürekden hoşallygyny bildirip, özara hormat goýmak, ynanyşmak ýörelgeleri esasynda ýola goýulýan döwletara hyzmatdaşlygyň däp bolan dostlukly häsiýetini nygtady.

Duşuşygyň dowamynda yzygiderli ösdürilýän türkmen-ermeni gatnaşyklarynyň ileri tutulýan ugurlary barada gyzyklanma bildirilip pikir alşyldy. Bellenilişi ýaly, ýurtlarymyz ikitaraplaýyn, şeýle hem köptaraplaýyn görnüşde üstünlikli hyzmatdaşlyk edýärler, abraýly halkara guramalaryň çäklerinde birek-biregi goldaýarlar. Netijeli ykdysady gatnaşyklaryň mundan beýläk-de ösdürilmegi esasy ugurlaryň hatarynda kesgitlenildi. Bu ulgamda, şol sanda söwda, energetika, ulag-kommunikasiýalar ulgamlarynda ýurtlarymyzyň uly mümkinçilikleri bar. Ynsanperwer ulgam döwletara gatnaşyklarda aýratyn orun eýeleýär. Şunda medeni alyşmalaryň işjeňleşdirilmeginiň, bilelikdäki döredijilik çäreleriniň yzygiderli geçirilmeginiň bu ugurdaky netijeli ikitaraplaýyn gatnaşyklara täze itergi berjekdigi bellenildi.

Gahryman Arkadagymyz Gurbanguly Berdimuhamedow hem-de Prezident Waagn Haçaturýan Türkmenistanyň we Ermenistan Respublikasynyň däp bolan syýasy-diplomatik, söwda-ykdysady, medeni-ynsanperwer gatnaşyklary mundan beýläk-de pugtalandyrmagy maksat edinýändiklerini tassyklap, birek-birege we iki ýurduň dostlukly halklaryna iň gowy arzuwlaryny beýan etdiler.

Türkmen halkynyň Milli Lideri, Türkmenistanyň Halk Maslahatynyň Başlygy Russiýa Federasiýasynyň Tatarystan Respublikasynyň Ylymlar akademiýasynyň prezidenti bilen duşuşdy

Düýn türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Russiýa Federasiýasynyň Tatarystan Respublikasynyň Ylymlar akademiýasynyň prezidenti Rifkat Minnihanow bilen duşuşdy.

Myhman Gahryman Arkadagymyza duşuşmaga döredilen mümkinçilik üçin hoşallygyny beýan edip, Magtymguly Pyragynyň doglan gününiň 300 ýyllygynyň giňden bellenilýän günlerinde ýurdumyzda bolmagynyň çäklerinde Türkmenistanyň Prezidentiniň Permanyna laýyklykda «Magtymguly Pyragynyň 300 ýyllygyna» atly ýubileý medaly hem-de ýadygärlik nyşany bilen sylaglanylmagynyň özi üçin uly mertebedigini aýtdy. Şunuň bilen baglylykda, ol türkmen halkynyň Milli Liderine hem-de hormatly Prezidentimize tüýs ýürekden hoşallygyny beýan etdi.

Gahryman Arkadagymyz hoşniýetli sözler üçin minnetdarlyk bildirip, dostlukly ýurduň Ylymlar akademiýasynyň ýolbaşçysynyň beýik şahyr Magtymguly Pyragynyň edebi mirasyny öwrenmekde we wagyz etmekde alyp barýan işleriniň möhüm ähmiýetini belledi. Nygtalyşy ýaly, Türkmenistan bilen RF-niň Tatarystan Respublikasy beýleki ulgamlar bilen bir hatarda, ylym-bilim ulgamynda-da üstünlikli hyzmatdaşlyk edýärler. Döredijilik wekiliýetleriniň özara saparlary, bilelikde geçirilýän medeni çäreler bu ulgamda gatnaşyklaryň pugtalandyrylmagyna ýardam edýär.

Myhman Türkmenistanda ylym ulgamynyň ösdürilmegine, ýurduň ykdysadyýetiniň dürli pudaklaryna innowasion tehnologiýalaryň ornaşdyrylmagyna aýratyn ähmiýet berilýändigini belledi.

Duşuşygyň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow we Russiýa Federasiýasynyň Tatarystan Respublikasynyň Ylymlar akademiýasynyň prezidenti Rifkat Minnihanow birek-birege iň gowy arzuwlaryny beýan etdiler. 

Türkmen halkynyň Milli Lideri, Türkmenistanyň Halk Maslahatynyň Başlygy Russiýa Federasiýasynyň Tatarystan Respublikasynyň Baştutany bilen duşuşdy

Düýn türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýurdumyza sapar bilen gelen Russiýa Federasiýasynyň Tatarystan Respublikasynyň Baştutany Rustam Minnihanow bilen duşuşdy.

Myhman mähirli kabul edilendigi üçin tüýs ýürekden hoşallyk bildirip, doganlyk Türkmenistana ýene-de gelmäge dörän mümkinçilige örän şatdygyny belledi. Bellenilişi ýaly, Tatarystan Respublikasynda türkmen halkynyň Milli Lideriniň dostluk, hoşniýetli goňşuçylyk gatnaşyklaryna esaslanýan netijeli dialogyň pugtalandyrylmagyna saldamly şahsy goşandyna ýokary baha berilýär.

Gahryman Arkadagymyz belent mertebeli myhmany Magtymguly Pyragynyň doglan gününiň 300 ýyllygynyň giňden baýram edilýän günlerinde myhmansöýer türkmen topragynda mähirli mübärekläp, Türkmenistanyň Tatarystan Respublikasy bilen gatnaşyklarynyň okgunly we netijeli häsiýetini belledi. Şol hyzmatdaşlyk Russiýa Federasiýasy bilen döwletara dialogyň çäklerinde üstünlikli ösdürilýär. Tatarystanyň Baştutanynyň Türkmenistana saparynyň ähmiýeti barada aýdyp, türkmen halkynyň Milli Lideri onuň halklarymyzyň arasyndaky dostlukly gatnaşyklaryň ýokary derejesine we bu gatnaşyklaryň ruhy gymmatlyklaryň umumylygyna esaslanýandygyna şaýatlyk edýändigini belledi.

Nygtalyşy ýaly, Tatarystan Respublikasy ýurdumyzyň ozaldan gelýän ygtybarly hyzmatdaşlarynyň biridir. Ýokary derejede yzygiderli geçirilýän duşuşyklardyr gepleşikler däp bolan gatnaşyklaryň pugtalandyrylmagyna ýardam edýär. Türkmenistany we Russiýa Federasiýasynyň Tatarystan Respublikasyny ynsanperwer ulgamda öňden gelýän netijeli gatnaşyklar baglanyşdyrýar. Bu babatda ylym, bilim, medeniýet ugurlary, ýokary hünärli işgärleri taýýarlamak boýunça özara gatnaşyklaryň baý tejribesi toplandy. Tatarystanyň wekiliýetleri, alymlary, medeniýet işgärleri ýurdumyzda geçirilýän iri halkara maslahatlara, döredijilik festiwallaryna işjeň gatnaşýarlar. Gahryman Arkadagymyz şu günki duşuşygyň türkmen-tatar dostlugyny we hyzmatdaşlygyny pugtalandyrmakda ýene-de bir ädim boljakdygyna ynam bildirdi.

Duşuşygyň dowamynda türkmen halkynyň Milli Lideri Türkmenistanyň Russiýa Federasiýasy bilen ýola goýlan netijeli gatnaşyklaryň çäklerinde Tatarystan Respublikasy bilen köpugurly hyzmatdaşlygy giňeltmek ugrunda alyp barýan işlerini mundan beýläk-de dowam etdirmäge meýillidigini tassyklady.

Duşuşygyň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow hem-de Russiýa Federasiýasynyň Tatarystan Respublikasynyň Baştutany Rustam Minnihanow birek-birege berk jan saglyk, alyp barýan döwlet işlerinde üstünlikleri arzuw etdiler.
 

Türkmen halkynyň Milli Lideri, Türkmenistanyň Halk Maslahatynyň Başlygynyň Türkiýe Respublikasynyň Beýik Millet Mejlisiniň Başlygy bilen duşuşygy

Düýn türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýurdumyza sapar bilen gelen Türkiýe Respublikasynyň Beýik Millet Mejlisiniň Başlygy Numan Kurtulmuş bilen duşuşdy.

Myhman ikitaraplaýyn hyzmatdaşlygyň möhüm meselelerini ara alyp maslahatlaşmaga döredilen mümkinçilik üçin hoşallygyny beýan etdi hem-de Türkiýe Respublikasynyň Prezidenti Rejep Taýyp Ärdoganyň hormatly Prezidentimize hem-de Gahryman Arkadagymyza iberen mähirli salamyny ýetirdi.

Milli Liderimiz beýik türkmen şahyry Magtymguly Pyragynyň 300 ýyllyk ýubileýine bagyşlanan halkara foruma gatnaşýandygy üçin Türkiýäniň parlamentiniň ýolbaşçysyna minnetdarlyk bildirdi we doganlyk ýurduň Prezidentine iň gowy arzuwlaryny beýan etdi.

Biz şu ýyl beýik türkmen şahyry, Gündogaryň meşhur akyldary Magtymgulynyň doglan gününiň 300 ýyllygyny giňden belleýäris. Bu şanly waka mynasybetli paýtagtymyz Aşgabatda “Magtymguly Pyragy” medeni-seýilgäh toplumyny gurduk. Ol ýerde beýik akyldaryň heýkeli oturdyldy. Şeýle hem seýilgähde Ýunus Emräniň heýkelini açdyk diýip, türkmen halkynyň Milli Lideri belledi. Şunuň bilen baglylykda, Magtymguly Pyragynyň 300 ýyllygy mynasybetli türk alymlary we magtymgulyşynaslary tarapyndan şahyryň goşgularyny türk diline terjime etmek, ony giňden ýaýmak boýunça alnyp barylýan işleriň möhüm ähmiýeti nygtaldy. Söhbetdeşler ikitaraplaýyn gatnaşyklaryň uzak möhletleýin, strategik häsiýete eýedigini nygtap, halklarymyzyň dil, medeniýet we ruhy taýdan umumylyga eýe bolmagynyň döwletara gatnaşyklaryň yzygiderli ösdürilmegine oňyn täsirini ýetirýändigine ünsi çekdiler.

Bellenilişi ýaly, Türkmenistan bilen Türkiýe Respublikasynyň arasynda syýasy-diplomatik, söwda-ykdysady, medeni-ynsanperwer ugurlarda ýokary derejeli gatnaşyklar alnyp barylýar. Türkmen-türk döwletara hyzmatdaşlygynda parlamentara gatnaşyklara hem möhüm orun degişlidir. Şunuň bilen baglylykda, Gahryman Arkadagymyz türkmen tarapynyň parlament diplomatiýasy ugrundaky hyzmatdaşlygyň has işjeň alnyp barylmagyna taýýardygyny tassyklady. Ýurtlarymyz ikitaraplaýyn görnüşde bolşy ýaly, köptaraplaýyn görnüşde, şol sanda abraýly halkara guramalaryň çäklerinde-de üstünlikli hyzmatdaşlyk edýärler. Türkmenistanyň halkara guramalarda, hususan-da, Birleşen Milletler Guramasynda öňe sürýän başlangyçlaryny Türkiýe Respublikasynyň yzygiderli goldamagy munuň aýdyň mysalydyr. Şeýle hem duşuşygyň dowamynda ikitaraplaýyn hyzmatdaşlygyň beýleki ileri tutulýan ugurlary boýunça gyzyklanma bildirilip pikir alşyldy.

Duşuşygyň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow we Türkiýe Respublikasynyň Beýik Millet Mejlisiniň Başlygy Numan Kurtulmuş birek-birege berk jan saglyk, alyp barýan işlerinde üstünlikleri, iki ýurduň halklaryna bolsa parahatçylyk, abadançylyk arzuw etdiler.