Berkarar döwletiň täze eýýamynyň Galkynyşy döwründe hormatly Prezidentimiziň taýsyz tagallalarynyň netijesinde halkymyzyň şöhratly taryhy, medeni mirasy we ruhy gymmatlyklary çuňňur öwrenilýär. Munuň özi ýaş nesliň kalbynda taryhymyza, ruhy gymmatlyklarymyza bolan buýsanjyň kemala gelmegine getirýär. Taryhda öz paýhasy bilen meşhurlyk gazanmagy başaran beýik şahsyýetleriň biri-de akyldar şahyr Magtymguly Pyragydyr. Türkmen edebiýatynyň görnükli wekili Magtymguly Pyragynyň eserleri ýaş nesilleri watansöýüjilik ruhunda terbiýelemekde, belent adamkärçilik sypatlaryny kemala getirmekde möhüm ähmiýete eýedir. Akyldar şahyr çeper sözüň ägirdi bolup, onuň goşgulary ýaş nesiller üçin bahasyna ýetip bolmajak gymmatlykdyr. Magtymgulynyň goşgulary her bir adama öz täsirini ýetirýär. Onuň döredijilik mirasynyň häzirki wagtda hem ähmiýeti egsilenok.

Ýurdumyzda geljegimiz bolan ýaşlary bilime ugrukdyrmakda, dünýä tejribelerinden ugur alyp, orta we ýokary okuw mekdeplerinde berilýän bilimiň hilini kämilleşdirmekde, sanly bilim ulgamyny giňden ornaşdyrmakda netijeli işler alnyp barylýar. Umumybilim berýän orta mekdeplerde Magtymguly Pyragynyň ömri we döredijiligi öwredilýär. Ýaş nesilleri terbiýelemekde Magtymguly Pyragynyň döredijiliginiň ähmiýeti çäksizdir. Akyldar şahyrymyz öz goşgy setirlerinde agzybirlik, watansöýüjilik, mertlik, halallyk, päklik, lebzihalallyk, dosta wepalylyk, ynsanperwerlik, zähmetsöýerlik ýaly ýörelgeleri tekrarlaýar. Hut şoňa görä-de, ýaş nesli milliligimiz we ata-babalarymyzyň ýol-ýörelgesi bilen terbiýelemekde Pyragynyň eserleri gymmatly gollanmadyr.

Magtymguly Pyragynyň goşgularyndaky adymyň hem-de tebigatyň berk baglanyşygynyň joşguny okyjylarda watansöýüjiligi, tebigata bolan söýgini döredýär. Derslerde şeýle ähmiýetli maglumatlaryň berilmegi, elbetde, ýaşlarymyzda öz Watanyna, tebigatyna bolan buýsanjy kemala getirýär. Gahryman Arkadagymyz “Magtymguly Pyragy adamzada tämiz ruhly, sagdyn ahlakly, şirin zybanly ajaýyp şygyrlary miras galdyran akyldar şahyrdyr” diýip belleýär. Magtymguly Pyragynyň bitiren uly hyzmaty, ilkinji nobatda, türkmen halkynyň durmuşy bilen bagly, ykbalyna dahylly meseleleri gozganlygyndadyr. Halka agzybirligi, jebisligi ündäp, berkarar döwleti gurmaga çagyrmagyndadyr, kämil ahlak sypatlary özüňde terbiýelemegiň ýollaryny salgy bermegindedir.

Gündogaryň beýik akyldary Magtymguly Pyragynyň mazmuna baý şygyrlary her bir ynsanyň durmuş ýörelgesine öwrülendigi üçin uly meşhurlyga eýedir. Beýik söz ussadynyň döredijiligi watansöýüjilik, agzybirlik, döwletlilik, jebislik, zähmetsöýerlik, myhmansöýerlik, belent adamkärçilik, batyrlyk, ýagşy umytda we ruhubelent bolmak, il-günüň bilen bir jan, bir ten bolmak ýaly meselelere bagyşlanandyr. Mälim bolşy ýaly, ÝUNESKO-nyň Ýerine ýetiriji Geňeşiniň mejlisinde Magtymguly Pyragynyň golýazmalar toplumyny bu guramanyň “Dünýäniň hakydasy” maksatnamasynyň halkara sanawyna girizmek barada çözgüt biragyzdan kabul edildi. Şeýle hem Magtymguly Pyragynyň 300 ýyllyk baýramçylygynyň bu guramanyň Şanly seneler sanawyna goşulmagy beýik akyldaryň şan-şöhratynyň dünýä dolýandygyny, döredijilik dünýäsiniň gymmatynyň has-da artýandygyny aýdyňlygy bilen görkezýär.

Täze 2024-nji ýyly “Pähim-paýhas ummany - Magtymguly Pyragy” ýyly diýip yglan eden Garaşsyz, hemişelik Bitarap Türkmenistan döwletimiz parahatçylygyň Watany hökmünde Magtymguly Pyragynyň döwlet gurmak ýörelgesine daýanýar. Akyldar agzybirligi döwlet gurmagyň esasy şertleriniň biri, parahat we asuda durmuşyň girewi hasaplapdyr. Milli gymmatlyklarymyzy täzeden galkyndyrýan, pederlerimize we olaryň baý döredijiligine uly hormat goýýan, dana pederlerimiziň bize goýan ylmy-edebi mirasyny düýpli öwrenmäge we ýaşlara öwretmäge uly mümkinçilikleri döredýän Gahryman Arkadagymyzyň we Arkadagly Gahryman Serdarymyzyň janlary sag, belent başlary aman bolsun, beýik işleri rowaçlyklara beslensin!

Gülnabat TOŞŞIÝEWA, 
Myrat Garryýew adyndaky Türkmenistanyň döwlet lukmançylyk uniwersitetiniň Patologik anatomiýa kafedrasynyň mugallymy.