Durmuş diýeniň salymyny bermän aýlanyp dur. Ýaşlyk öwrenmegiň döwri, güýç-kuwwatyň, zehiniň köp bolýan wagty. Şol güýji ýerlikli peýdalanmak ynsan ömrüniň datly geljegini düzýär. Häzirki wagtda Watan söýgüsiniň belentliginde durmuşa döredijilikli çemeleşýän, döwrüň sesine ses goşýan, döwür bilen aýakdaş gidýän ýaş neslimizi kemala getirmek ugrunda alnyp barylýan beýik işler aýdyň geljegimiziň esasyny düzýär. Barha ösýän, özgerýän durmuşymyzyň özenine göz ýetirýän, täzeçe pikirleri döredijiligine siňdirýän ýaşlaryň kalbynda gaýnap joşýan ylhamlaryny ýüze çykarmaga giň ýol açylýar.

Eziz Diýarymyzda ýaşlaryň döwrebap bilim almaklary, döwrüň ösen talaplaryna gabat gelýän tehnologiýalardan baş çykarmaklary, sportuň islendik görnüşleri bilen meşgullanyp, sagdyn durmuş ýörelgesini alyp barmagy, dünýäniň çar künjeginde bilimlerini artdyrmaklary üçin uly mümkinçilikler döredilýär. Biziň döwletimizde ýaşlaryň bilimine, yhlasyna, zähmetine sarpa goýulýar. Ýaşlaryň arasynda halkara we milli bäsleşikleriň yzygiderli geçirilmegi, “Ýaşlar barada döwlet syýasaty hakynda” (rejelenen görnüşi) Türkmenistanyň Kanunynyň kabul edilmegi ýaşlary ylma çekmekde, halk hojalygynyň dürli pudaklarynda ýaşlary öňe çykarmakda döredijilikli zähmet çekmäge höweslendirýär. Ynsan ömrüniň ajaýyp pursady bolan ýaşlyk ýyllary toplanan bilim, zehin geljekde Watan üçin haýyrly bolmaly.

Watanymyzy ösdürmek üçin okamak, öwrenmek, zähmet çekmek, döret-mek bolsa bagtyýar ýaşlaryň baş maksadydyr. Ýaşlykdaky güýjüňi öz saýlap alan hünäriňe siňdirmek uly bagtdyr. Her bir ynsan öz zehinine kybap hünär saýlap alýar. Kämillik ýoluna atarýan ýiti zehin irginsiz zähmet bilen açylýar. Erjel, tutanýerli bolmak zähmetiň rehnetini görmäge çenli alyp barýar. Zähmetiň lezzeti bolsa üstünlikdedir. Adam ýaşaýyş-durmuşyndaky zerurlyklaryny, isleglerini zähmetiň üsti bilen gazanýar. Şonuň üçin zähmete hormat goýmaly, ony durmuşdaky şygaryňa öwürmeli. Zähmet ýerine düşende, hakyky gözellik kemala gelýär. Pederlerimiz tutanýerli zähmet çekmegi, tükeniksiz islegli, gaýduwsyz yhlasly hereket etmegi ýaşlaryň aňyna guýupdyrlar. Olary milli ruhda terbiýelemek, edep-ekramly, lebzine ygrarly edip ýetişdirmekde düre gaplanan öwütleri, nakyldyr atalar sözlerini häzirki günümize miras galdyrypdyrlar.

Atalaryň ýoly - altyn ýol. Olary bagtly, aýdyň geljek üçin dowam etdirmek ýaşlaryň esasy maksatlary bolup durýar. Häzirki ajaýyp döwrümizde ýaşlary döwlet tarapyndan goldamak, olaryň şahsy başarnyklaryna goldaw bermek maksady bilen durmuşa geçirilýän ägirt uly işler oňyn netijeliligiň görkezijisine öwrülýär. Turuwbaşdan, üstünliklere, täze ýeňişlere eýe bolan Arkadag Serdarly bagtyýar ýaşlar ýylymyzda ýaşlaryň ykbalyna täsir etjek, olara goldaw bermegiň anyk ugurlaryny kesgitlejek ähmiýetli çözgütler kabul edildi. Hormatly Prezidentimiziň baştutanlygynda «Ýaşlar barada döwlet syýasaty hakynda» (rejelenen görnüşi) Türkmenistanyň Kanunyndan gelip çykýan wezipeleri durmuşa geçirmegiň ýolunda ýaşlary ýaşaýyş-durmuş şertlerinde goldamagyň, ylym-bilim babatynda zerur şertleri işläp düzmegiň, dünýäniň ösen talaplaryna laýyk bilim bermegiň nusgalyk işleri giň gerimde alnyp barylýar. Bu babatda degişli ministrlikler, guramalar tarapyndan jogapkärli wezipe-ler üstünlikli ýerine ýetirilip, ýaşlaryň bagtyýar durmuşlaryny üpjün etmäge gönükdirilen çäreler yzygiderli amala aşyrylýar.

Ýaşlaryň döwletiň we jemgyýetiň syýasy, ykdysady, medeni, umu-man, ähli ulgamlaryna işjeň gatnaşmagy, şeýle hem belent ruhy-ahlak ýörelgeleriň mynasyp do-wam etdirilmegi ýurdumyzyň kuwwatyny, at-abraýyny has-da belende galdyrýar. Sözüň doly manysynda döwletimiz tarapyndan döredilýän mümkinçilikler, ýaşlarymyzyň ruhy dünýäsiniň ajaýyp binasyny emele getirýän paýhas ýygyndylary, nesil terbiýesinde öňe çykýan adamkärçilik, döwletlilik, ynsanperwerlik ýaly kämil sypatlar bu günki gün döwrümiziň baş ýörelgeleri bolup, köňüllerde orun alýar. Munuň özi durmuşyň gözelligini, zeminiň abatlygyny, Watanymyzyň abadançylygyny kepillendirip, rowaçly menzillerde dowamata atarýar.

Akjemal JUMAÝEWA, 
Lebap welaýatynyň Saýat etrabynyň 53-nji orta mekdebiniň başlangyç synp mugallymy.