Gahryman Arkadagymyzyň başlangyçlary bilen, 2009-njy ýylyň awgust aýynda Türkmenistanyň «Bilim hakynda Kanuny» kabul edildi we bilim ulgamynyň berk hukuk binýady döredildi. 2021-nji ýylyň 5-nji iýunynda «Bilim hakynda» Türkmenistanyň Kanuny rejelenen görnüşde kabul edildi. Bu Kanun ýurdumyzda bilim ulgamynyň işiniň guralyşyny, bilim babatdaky gatnaşyklaryň hukuk esaslaryny düzgünleşdirýär.

Seýle-de bilim işini dolandyrmagyň guramaçylyk esaslaryny we döwlet bilim syýasatynyň ýörelgelerini, bu ulgamyň maksatlaryny, ýerine ýetirýän wezipelerini kesgitleýär. Şoňa laýyklykda, ýurdumyzyň bilim edaralarynda ähli ugurlar boýunça tejribeli, ussat hünärmenleri taýýarlamagyň ylmy esaslary döredildi. Bu günki günde ýurdumyzyň ýokary okuw mekdepleriniň talyplarynyň arasynda okuw dersleri boýunça Döwlet bäsleşikleri, ylmy bäsleşiklerdir başga-da birnäçe ýaryşlar yzygider geçirilip, ösüp gelýän ýaş nesli watançylyk ruhunda terbiýelemekde abyrsyz işler amala aşyrylýar. Ylaýta-da, Berkarar döwletiň täze eýýamynyň Galkynyşy döwrüniň ýene bir ajaýyp ýylynyň “Arkadag Serdarly bagtyýar ýaşlar” ýyly diýlip atlandyrylmagynyň aňyrsynda-da ümmülmez many ýatyr. Çünki biziň ýurdumyzda hormatly Prezidentimiziň saýasynda ýaşlara bildirilýän ynam bimöçberdir.

Türkmen halkymyzda “Bilegi zor birini ýykar, bilimi zor — müňüni” diýen parasatly söz bar. Bu ajaýyp paýhasdan ugur alyp, bilim ulgamyny ösdürmegi iň esasy ugurlaryň biri hökmünde kesgitleýän hormatly Prezidentimiz diňe bir ýurdumyzyň däl, eýsem dünýäniň ösen döwletleriniň abraýly ýokary okuw mekdeplerinde hem kämil bilim almagymyz üçin ähli mümkinçilikleri döredýär. Hormatly Prezidentimiziň taýsyz tagallasynyň netijesinde ýurdumyzda biz — talyp ýaşlaryň giň gözýetimli, saýlap alan hünärimiziň hakyky eýesi bolup ýetişmegimiz üçin döwlet derejesinde yzygiderli alada edilýär. Milli bilim ulgamynyň maddy-enjamlaýyn binýadyny pugtalandyrmak, ýaşlara berilýän bilim-terbiýäniň hilini ýokarlandyrmak döwletimiziň bilim syýasatynyň baş maksatlarynyň biri bolup durýar.

Ýakynda Türkmenistanyň Inžener-tehniki we ulag kommunikasiýalary institutynda ýurdumyzyň ýokary okuw mekdepleriniň talyplarynyň arasynda ilkinji gezek logistika dersi boýunça internet bäsleşigi geçirildi.

Internet bäsleşigi 10 sany ýokary okuw mekdebinden 81 talybyň gatnaşmagynda geçirilip, oňa Türkmenistanyň Oguz han adyndaky Inžener-tehnologiýalar uniwersitetiniň, Türkmen döwlet binagärlik-gurluşyk institutynyň, Ýagşygeldi Kakaýew adyndaky Halkara nebit we gaz uniwersitetiniň, Türkmen döwlet ykdysadyýet we dolandyryş institutynyň, S.A.Nyýazow adyndaky Türkmen oba hojalyk uniwersitetiniň, Türkmen oba hojalyk institutynyň, Türkmenistanyň Serhet institutynyň, Türkmenistanyň Goranmak ministrliginiň Beýik Saparmyrat Türkmenbaşy adyndaky Harby institutynyň, Türkmenistanyň Telekommunikasiýalar we informatika institutynyň, şeýle-de Türkmenistanyň Inžener-tehniki we ulag kommunikasiýalary institutynyň talyplary gatnaşdy.

Internet bäsleşiginde talyplar ýokary netijeler görkezip, degişlilikde baýrakly orunlaryň 30-syna — 7-si birinji, 10-sy ikinji, 13-si üçünji orna mynasyp boldular.

Ýokary okuw mekdebimizden talyp deň-duşlarymyz Nazar Seýidow I orna, Şasoltan Rustamowa II orna; Medine Seýidowa III orna mynasyp boldular.

Bu internet ders bäsleşiginde ýokary netijeleri gazanmagymyzda institutymyzyň  Kärhananyň ykdysadyýeti we dolandyrylyşy kafedrasynyň mugallymlarynyň çekýän irginsiz zähmeti aýratyn bellärliklidir. Talyp deň-duşlarymyzyň gazanýan üstünlikleri bilen mähriban Watanymyzyň  abraýyna goşant goşmak, halal zähmet çekip, ilhalar, kämil ynsanlar bolup ýetişmek biz — ýaşlaryň her birimiziň mukaddes borjumyzdyr. Talyp ýaşlarymyzyň geljekde hem şular ýaly ýeňişli menzillerde iň öňdäki orunlara mynasyp bolmagyny arzuw edýäris.

Meýlis GOÇMYRADOW,
Türkmenistanyň Inžener-tehniki we ulag kommunikasiýalary institutynyň Ykdysadyýet we sanly tehnologiýalary fakultetiniň 2-nji ýyl talyby.