Ekologik bilimiň we terbiýäniň esasy maksady şahsyýetiň we jemgyýetiň ekologik medeniýetini, aňyny we düşünjesini emele getirmek hem-de ynsanyň ýaşamagyny we ösmegini üpjün edýän tebigat bilen adamyň özara gatnaşygynyň tejribesini ösdürmekdir. Bularyň bary adamlaryň sagdyn ýaşaýyş ýörelgesini, durnukly durmuş-ykdysady ösüşini, Türkmenistanyň ekologiýa abadançylygyny üpjün etmäge ýardam eder.

Ekologik bilim — bu adamlaryň özüni alyp barmagynyň ahlak kadalaryny emele getirmäge gönükdirilen, şahsyýetiň üznüksiz terbiýe, okuw,we ösüş ýagdaýydyr. Ekologik bilim — ekologik düşünjeleri, ukyplary we endikleri öwretmek üçin maksatly guralýan, meýilnamaly we ulgamlaýyn amala aşyrylýan işdir. Bu işleri netijeli alyp barmak we ekologik bilim ulgamyny yzygiderli ösdürmek üçin ekologik taýdan sowatly hünärmen mugallymlary taýýarlamak, okuw-usulyýet binýadyny güýçlendirmek zerur bolup durýar. Ýurdumyzda bu ugur boýunça alnyp barylýan işler özüniň oňyn netijesini berýär, ýagny ekologik bilim we terbiýe meselesine üns berýänleriň sany artýar, okuw dersleriniň ekologiýalaşdyrylmagy bilen bir hatarda, ýöriteleşdirilen ekologiýa dersleri girizilýär, ekologiýa, daşky gurşawy goramak we tebigy serişdeleri rejeli peýdalanmak çygrynda işleýänleriň hünär derejesini ýokarlandyrmaga ýardam berýän usulyýet binýadynyň mazmuny
hil taýdan kämilleşdirilýär.

Ekologik bilimi we bilim ulgamyny ekologiýalaşdyrmagy tapawutlandyrmak bolar. Olar özara baglanyşykly hem bolsalar, käbir jähetde dürli ýagdaýlar bilen häsiýetlendirilýär. Hormatly Prezidentimiziň döwletimiziň bilim ulgamyny ösdürmek we kämilleşdirmek boýunça amala aşyrýan giň möçberli özgertmeleriniň çäklerinde başlangyç, orta we ýokary hünär okuw mekdepleriniň ählisinde bilim alýan talyplara ekologiýa we daşky gurşawy goramak okuw dersini okatmak ýola goýuldy. Ýokary okuw mekdeplerinde hünärmenleri taýýarlamagy kämilleşdirmek maksady bilen, her ýyl “Ekologiýa we daşky gurşawy goramak” dersi boýunça uly işler durmuşa geçirilýär. Ilatymyzyň ekologik düşünjesini has-da artdyrmak maksady bilen, ylmy žurnallardan başga hem gündelik gazetlerde, köpçülige niýetlenen žurnallarda ekologiýa, daşky gurşawy goramaga we tebigy serişdeleri rejeli peýdalanmaga bagyşlanan makalalar yzygiderli çap edilýär.

Tebigaty goramak işine halk köpçüligini, aýratyn hem ýaş nesli çekmek döwrümiziň wajyp ugurlarynyň biridir. Ekologik terbiýäniň has täsirli serişdelerine dürli görnüşli amaly işler degişlidir. Daşky gurşawy gowulandyrmak üçin köpçülikleýin bag ekmek, arassaçylyk işlerini geçirmek çäreleri adamlaryň tebigata bolan garaýşyny oňyn tarapa üýtgedýär. Şol sebäpli döwletiň goldawy bilen ähli raýatlarymyz ýurdumyzyň tokaý gaznasyny artdyrmak, howasynyň ekologik ýagdaýyny gowulandyrmak maksady bilen, Köpetdagyň eteginde, paýtagtymyzyň daş-töwereginde, obalarymyzyň we şäherlerimiziň töwereginde, “Awaza” Milli syýahatçylyk zolagynda, ulag ýollarynyň ugrunda, Bötendag belentliginiň töwereginde döredilýän tokaý zolaklarynyň ösdürilmegine işjeň gatnaşýarlar.

Berkarar döwletimiziň bagtyýarlyk döwründe hormatly Prezidentimiziň başda durmagynda ekologik bilimi we medeniýeti ösdürmek, daşky gurşawy goramak baradaky taýsyz tagallalar ynsanperwer ýörelgäniň üstünlikli durmuşa geçirilýändigini aýdyň beýan edýär.

Orazmyrat ÝARANOW,
S.A.Nyýazow adyndaky Türkmen oba hojalyk uniwersitetiniň  mugallymy.