Türkmen gallaçylary Watanymyzyň döwlet Garaşsyzlygynyň şanly 30 ýyllygy bellenilýän ýylynda uly zähmet üstünliklerini gazanýarlar. Olar milli Liderimiz Gurbanguly Berdimuhamedowyň döwletimiziň ykdysady kuwwatyny artdyrmak, azyk howpsuzlygyny üpjün etmek, ekerançylygyň hasyllylygyny has-da ýokarlandyrmak boýunça öňde goýan wezipelerinden ugur alyp, şu ýyl bol bugdaý hasylyny ösdürip ýetişdirdiler. Gallaçylarymyzyň durmuşynda dowam edýän gyzgalaňly orak möwsüminde iş depginleri gün-günden ýokarlanýar. Şonuň netijesinde bolsa döwlete galla tabşyrmak baradaky şertnamalaýyn borçnamalaryny ýerine ýetirýän etraplaryň sany barha artýar. Milli Liderimiziň tagallasy bilen gazanylýan şeýle ösüşlere “Türkmenawtoulaglary” agentliginiň “Lebapawtoulag” önümçilik birleşiginiň agzybir işgärleri hem mynasyp gatnaşýarlar.

Berkarar döwletimiziň bagtyýarlyk döwründe daýhanlara döwlet tarapyndan hemme taraplaýyn goldaw berilmegi netijesinde olar oba hojalyk ekinleriniň ýokary hasyl berýän sortlarynyň aňrybaş tohumlary, mineral dökünler, dünýäniň öňdebaryjy önüm öndürijileriniň döwrebap tehnikalary bilen üpjün edilýär. Dänäniň döwlet satyn alyş nyrhynyň yzygiderli ýokarlandyrylmagy, döwletiň galla öndürijiler bilen özara hasaplaşyklarynyň has kämil derejä çykarylmagy üçin häzirki zaman ulgamynyň ornaşdyrylmagy daýhanlary yhlasly, tutanýerli zähmete höweslendirilmegiň çeşmesi bolup hyzmat edýär. Ýetişdirilen galla hasylyny döwlet harmanlaryna ýetirmekde “Lebapawtoulag” önümçilik birleşiginiň sürüjileri hem daýhanlara ýakyndan kömek berýärler. Häzirki wagtda ýurdumyzda gyzgalaňly dowam edýän galla oragy möwsüminde kärhana tarapyndan 480-den gowrak dürli kysymly ýük ulagy işe goýberilipdir.

Bu ulaglaryň 80-e golaýy hormatly Prezidentimiziň tagallasy bilen satyn alnan täze “Kamaz” kysymly ulaglar bolup, olaryň iş öndürijiliginiň ýokary bolmagy aýratyn bellärliklidir. Ýük awtoulaglarynyň sürüjileri bugdaý dänelerini galla kabul ediş nokatlaryna daşamakda yzygiderli zähmet çekýärler. Galla oragyna gatnaşýan awtoulaglara ýerlerde kärhana tarapyndan ýörite gözegçiler bellenip, awtoulaglar ýangyç, çalgy ýaglary we beýleki ätiýaçlyk şaýlary bilen bökdençsiz üpjün edilýär.

Kärhanada birnäçe ýyllaryň dowamynda öz käriniň ussady bolan onlarça tejribeli sürüjilerim zähmet çekmek bilen, olar guşgursak bugdaý hasylynyň her bir dänesiniň bökdençsiz ýygnalmagyny üpjün etmek ugrunda ýokary netijeleri gazanýarlar. Bu ugurda tejribeli sürüjiler aýratyn tapawutlanýarlar. Olar her gün 20 tonnadan gowrak galla hasylyny kabul ediş nokatlaryna daşamak bilen görelde görkezýärler. Olaryň onlarçasy “Iň ökde sürüji”, “Iň köp galla hasylyny daşan sürüji” we ş.m. bäsleşiklere gatnaşyp, möwsümiň soňunda dürli ugurlar boýunça sylaglara we gymmat bahaly sowgatlara mynasyp bolarlar.

Jangeldi IŞANKULYÝEW,
“Türkmeniň ýüpek ýoly”.